ياسلام الله سلامن ماخسر رجلن يقوله=لاوصل للمسلمين ومن تبرى منة خايب
ياسلام الله على ألي مدحهم محدن ينولة=غيرهم والعرف ياخذه الولد من راس شايب
ياسلام الله على درع الوطن واعظم زحولة=الجيوش الي فعايلهم تطمن كل هايب
ياسلام الله عليهم وإن بقت عندي مقولة=ثانية بقولها والشعر ماشابه شوايب
الوطن والعرض والذود وميادين البطولة=ماحماها غير أهلها يوم دقلات الحرايب
يوم كلن سارجن في صحصح البيدا خيولة=والحرار السود تطويها مدابيح الركايب
من قديم الوقت والدنيا لها صولة وجولة=والمغازي والحروب عن النشاما ماتغايب
من قبل ينخى كليب الزير يوم اقفت حلولة=لاتصالح خل نارك فالعدا تشتب شبايب
ومن قبل يرسل ولي العرش للامة رسولة=ويتحدى صفوة عيال آدم سهوم الصعايب
ومن قبل يرفع على الاوتاد للمجد ودخولة=بيرق إبن سعود ويموت الجهل تحت النصايب
خلقت الدنيا على الهيجاء وكلن من قبولة=والمراجل ماتضيع وكل جرحن له طبايب
هو صحيح الوقت الاول راح والروحة عجولة=لكن العادات لو راحت من السبع العجايب
لو تغير وقتنا وأمست مواقيفة خجولة=ما تغير صملة الرجال حلال النشايب
كل وقت وكل حرب وكل ماقف له فحولة=والثوابت ماتزحزحها العواصف والهبايب
ياجيوش المملكة دام الوغا دقت طبولة=لاتهابون المنايا كل موت وله سبايب
الرجل لن عاش والا مات ماتجحد فعولة=والشهادة في سبيل الله من ربي وهايب
واااهني الي قضى نحبة شهيد ولجل دولة=دولتن قامت على الاسلام ماهي مال سايب
قادها عبدالعزيز وهي مثل ريمن جفولة=ورث جَدِة ماخذاها من ورى العالم نهايب
واعتزوا بعده عياله والامان ارخى سدولة=الملوك الي على البيدا يسدون النوايب
شامخة في عزهم تنعم مع الوقت وفصولة=بالامن والدين والرفعة وفعل الخيرطايب
ياجنو الدار يا كل الفخر عرضه وطولة=داركم فارقابكم عهدة ولافيها غرايب
انتم أهل الطيب والنخوة وكلن له حمولة=والثرى الي ظمكم صفوا على حده كتايب
علموا من يحسب الهيجاء مثل لعب الطفولة=علموه انا هل الفزعات واسقوه المصايب
واصمدوا في وجهه ألي ماعرف قدر الرجولة=لو عرف قدرالرجولة ماتخبى فالزرايب
ياهل اليمنى الطويلة دراكم لحدن يطولة=فيكم الهقوة وسهم الموت فالعدوان صايب
شبو النيران في دخان وافنوا من رقوله=واتركوهم عبرتن للوقت وارووهم غلايب
خلو العدوان من قوة هل العوجا ذهولة=والله الي يعطي الجنة وعظم الكفر عايب
قلتها وانا سعودي والسعودي عند قوله=والوطن حمله قوي والموت من شانة وهايب

ياجيوش المملكـة دام الوغـا دقـت طبولـة=لاتهابون المنايـا كـل مـوت ولـه سبايـب
الرجل لن عاش والا مـات ماتجحـد فعولـة=والشهادة في سبيـل الله مـن ربـي وهايـب