للدار عزوعزته بالرياجيل= وللمجد شخصية وللحكم هيبه
وللسيف دور ولسيلسه مكاييل= وللعقل حكمه في الظروف العصيبه
وللشرع عن غيره مكانه وتفضيل= من لا اتخذ غيره ذريعه رضيعه
هذا هو الموجز واجيب التفاصيل= في كل شطر ابداه ولا انتهيبه
هذي صفات اهل الصفه والمفاعيل= وارض حوت بيتين مكه وطيبه
ارض حموها بالسيوف.. المصاقيل= اخوان نوره فالليالي الصعيبه
امثبتين الملك جيل بعد جيل= وتاريخهم جيل لجيل يحكيبه
سلايل اللي يتعب الجيش والخيل= عبدالعزيز ابن الاصول العربيه
ياقف له التاريخ قدر وتبجيل= واليا انتهى به ماقف يبتديبه
واجبال نجد الراسيه والغراميل= وارض وطاه وكل عيطا رقيبه
والسيف ابو حدين والخيل والليل= والسرج والصهوة وكور النجيبه
تشهد وتشهد له رياض ومداهيل= ويوم عبوس وليل ماينسيبه
اقبل معزي والمنايا مقابيل= على عدو جاه واشيب شيبه
حاضر بحاضر ماحصل فيه تاجيل= الفعل حاسم والمضارب عطيبه
برق المصقل في رعود المقاتيل= رد البرى بين الحريب وحريبه
ونادى المنادي وانصتوا له مذاهيل= الحكم لله ثم للي حضيبه
وردوا بتكبير وردوا بتهليل= وسمع وطاعه والمشاعر رهيبه
وزال العسام وهل وبل هماليل= يسقي الديار الممحله والعشيبه
رحمه من الرحمن سيل بعد سيل= مافيه دار مايسيل شعيبه
والناس عقب المر شريوا تهاليل= وكل ينام ومرقده يهتنيبه
يامنزل القرآن وكتاب الانجيل= ياسامع الداعي ويامستجيبه
تجعل لبو تركي مقام ومنازيل= في جنة الفردوس يالله تثيبه
وتحفظ لنا اللي عدلهم يعدل الميل= اعياله اللي طيبهم زاد طيبه
في راي ابو فيصل ولا فيه تبديل= تخضع عدانا بالرضا والغصيبه
الحاكم اللي ماتحله حلاحيل= من هيبته كل الحلاحيل اديبه
تخضع له العالم وترسى الاساطيل= وعلى العدا يوم اللقا يندعيبه
للضد ضد ويثني المد والكيل= ولا احد يضده ضد ما يلتجيبه
محد على رايه لقاله مداخيل= الراي رايه والعرب تقتديبه
هذا وابا استشهد بكلمه من القيل= كلمة زعيم كلنا نعتزيبه
((شرب المصايب مثل شب الفناجيل))= كفو يبو فيصل ولاهي غريبه
قول وفعل ماهيب خدعه وتمثيل= ندري ولابه عالم مادريبه
يابو الوطن واهله وغيث المقاليل= حفظك من لا تعلم الناس غيبه
واطال عمرك يابعيد المناويل= انته محب الشعب وانته حبيبه
وولي عهدك للصعيبات حلحليل= بلسم دوا جرح الحياه وطبيبه
شر على سود القلوب المعاليل= وخير على شعب البلاد الرحيبه
وافي ولله الوفا والتكاميل= نعم العضيد النايب اللي تنيبه
وشعبك شرب حبك ولو تشرب النيل= حبك يذيب الما ولا الما يذيبه
ولو الليالي بالمشاكل محاميل= الشعب وافي والروابط صليبه
واللي يخون العهد من غير تاويل= ماهوب زايد صفنا وش نبيبه
اكبر عدو كنا نعده اسرائيل= وجتنا سرائيل هنيا قريبه
شرذمة تسعى بفتنة وتضليل= وتدفع على الفتنة جثثها ضريبه
ياقاتل نفسك نهايتك في ويل= مافي هذا شكه ولا فيه ريبه
ان كنت لا تعلم مصيبتك بالحيل= وان كنت تعلمها فتلك المصيبه
والله عجايب هالزمان وتهاويل= وش رايكم ياهل العقول اللبيبه
مايصلح العقال غير الجهاهيل= اجل على الدنيا نحط النصيبه
يامدع الاصلاح وتحط وتشيل= وانته من الراعه ضلوعك حطيبه
لا مصلح نفسك ولا من محاصيل= خايب وظنك خاب والراي خيبه
لا جي منافق تدعي بالاباطيل= وتشوه الاسلام يامفتريبه
لعل مالك من مراحك تساهيل= ياللي لجيت مع الوجيه الغضيبه
جعله مراح الفيل واللي على الفيل= لا ردك الله من هذيك المغيبه
خادم يهود وتشتغل بالمراسيل= حمال للاسفار رده وجيبه
ماتعلم انك في مهونة وتذليل= ايات دين ومذهب تدعيبه
الدين واضح مثل نور القناديل= ولا انته بمفتله ولا انته خطيبه
اتكفر العالم بليا دواليل= وتسعى لقتل المسلم وتستنيبه
وتضحك على بعض الضعوف المهابيل= وتزجهم مثل الحطب في لهيبه
واصحابك اللي ينقولن الزنبايل= راحو سريبه كلم في زريبه
ذاقوا من اسبابك عذاب وغرابيل= وقالاخره كل الهه حسيبه
واضرب مثل واصدق للتماثيل= من لايحس العيب ماشاف عيبه
هذي هي اللي مالها ايات تحليل= ان يفعل الانسان مايستعيبه
ياللي تبلبل كلها ايام وتزيل= الذل ما له سلم تعتليبه
تايه مابين الشرق والجدي وسهيل= واللي تقدا فيك ينشق جيبه
لابد ما تقضي عليه المحابيل= ومهما بلغت نهايتك فالحقيبه
وتندم ندم قابيل من قتل هابيل= من طال بد سقمه تراه يغديبه
شانك قليل وكل يوم بتقليل= ياللي وطنك مع العدا تعتديبه
للشر ناس وللشكاله مشاكيل= ومن لا يحسب شرنا يبتليبه
حنا رجال الامن واهل المواصيل= اللي عليك ومن يطيعك تعيبه
وحنا على الخاين عقوبه وتنكيل= وامن الوطن واهل الوطن نعتنيبه
وحنا بهدفات الكراسي نواجيل= لو الضريبه سلك فبره نصيبه
من غلنا على الكبود المغاليل= نحطها بين النحر والتريبه
نكسب رهاب اللي يحط المعاديل= والغلب منا ما علينا غليبه
يادارنا يام الرموش المظاليل= انتي حبيبتنا ونعم الحبيبه
يفداك منا الحي واللي مقاتيل= في واجبك نمشي كتيبه كتيبه
بارواحنا ثم بالدعا والتباهيل= للي صغار النمل يسمع دبيبه
نحمي وطنا ونتقدم زرافيل= على العدا والموت نادر قليبه
والعز بالله ثم حدب المصاقيل= والذل نقمة والتهاون مصيبه

صح لسان شاعرنا المبدع/حبيب بن دغيل العازمي ولاعدمنا هالطله يابو فيصل ويعطيك العافيه أخوي سلطان طلحه تقبل مروري.