الهيـــــــــــــلا *** منتدى قبيلة عتيبة - يا طير غرد للهوى وانفض الريش ,,, فالحوثيين

بسم الله الرحمن الرحيم

هذه قصيده اعجبتني حقيقة لا اعرف صاحبها فحببت ان اضعها بين ايديكم

ياطير غرّد للهوى وأنفـض الريـش=لازالـت أنسـام الهبـايـب لطيـفـه
والجوّ هادي لو دخـل فيـه تشويـش=ومشاعـرك ماهيـب دايـم رهيـفـه
لا يختلـف لونـك فـدوك الخفافيـش=اللـي تحـت جنـح الغـداري لفيفـه
ما تنتهي نشـرة علـوم المطاريـش=واللـي معـه علـم ٍ جديـد ٍ يضيفـه
الغاويه جـاء مـن وراهـا دراويـش=واحدهم أسود وجه .. وأسود صحيفه
تنكـروّا للجـار والملـح والعـيـش=مـا عندهـم غيـر الخيانـه وظيفـه
سلامة الحدّ الجنوبـي مـن الطيـش=ومن العبـث والشرذمـات الضعيفـه
مدري فلول الشرّ تنقز علـى ويـش=وشيطانهـا الاكبـر يصيـح لحليفـه
روس الزيود اللي مافيهـا عراميـش=قامت تعرمش بيـن جيفـه وجيفـه !
يا الحوثي اللي معك رشـاش حتّيـش=هات الرصاصه وأخـذ عنهـا قذيفـه
غشّاش ما تحتـاج للزيـف تغشيـش=والواقـع المشهـود مكشـوف زيفـه
المملكـه ماهيـب مرعـى كداديـش=اللـي تـزوزي بالحمـول الخفيـفـه
مهبط وحي ربّي علـى سيّـد قريـش=نقـدّسـه .. ومقدّسـاتـه شريـفـه
حبّه مثل وبـل المـزون المراهيـش=للمسلميـن أهـل القلـوب النظيـفـه
ما فيه ضيفة قات .. وضيوف تحشيش=و الدين قاصـر والمذاهـب سخيفـه
لا والله إلاّ دار روس المـداغـيـش=يكـرم معزّبهـا .. ومحشـوم ضيفـه
يا قايد الشرطـه ويـا قايـد الجيـش=أمانـة ٍ مــن بينـكـم بالنصيـفـه
حدّ الوطن ماهوب مسـرح تناويـش=وأنتـم كفـو للمعضـلات الكليـفـه
حطوّا عليه سيـاج وأبـراج تفتيـش=بيـن العيـون المبصـره والكفيـفـه
و لا ترحمـون مكبريّـن الطرابيـش=أبـدوا لهـم فـوق الجبـال المنيفـه
تعيـش يـا دار المناعيـر ويعيـش=اللي وقـف مـن دون حـدّك بسيفـه

وسلامتكم