يقول من ينظم بيوت مجده = ابيات منظومه بفن ومهاره
من بحر هايج وان تحرك بمده = مده يجي أعلى من جبال قاره
البارحه جريت صوتي لحده = صوت(ن) تعلى صوت راع المناره
من هاجس(ن) دك الحشا لين هده = سلط جيوشه واطربه صوت طاره
يامل عين(ن) ماتعرف المخده = وعزيل كبد(ن) تصطلي من حراره
أسبابها قوم(ن) غدة مستبده = ناس (ن) تشن الظلم في كل غاره
معهم من الشيطان من كل عده = خاط القميص وزر محكم زراره
وشلون بصبر والصبر باح سده = وصبر(ن) على هالجور ماهو شطاره
عزمت اسرج كل سرج(ن) واشده = واللي مهوب حصان فوقه وثاره
من لايعدك مكسب(ن) لاتعده = لك راس مال اما حسبته خساره
فصل له الملبوس تفصيل قده = واحذر تعم وخل للضرب شاره
جازه بسياته وجازه بصده = خله يذوق من الكدر والمراره
ولابد عسرات اليالي ترده = ويقتص راع الثار في رد ثاره
اما حياة(ن) هانيه مجرهده = واللا عراك ما يوني غباره
وباب(ن) يجيب الريح حنا نسده = الحر حر ويفتهم بالاشاره
هذا كلام اللي بيوته مجده = لامن نظم ينظم بفن ومهاره

المشاركة الأصلية كتبت بواسطة ولد عمهوج (المشاركة 949016) ياهلا والله بأهل الزلفي .. اهل النخوه .. واهل الكرم والطيبة في منتدى ربعهم العتبان. ... ويا هلا و مرحبا اخوي راع الزلفي يالله حيه في محله ... اما بنسبه لعبدالله الروقي شاعر جزل وشاعر قوي في النظم او المحاوره أجزم بأنه سوف يكون خليفة أحمد الناصر لنه يمتلك قصايد ومحاورات قويه في ساحة الشعر صح لسانك يالروقي يعطيك العافيه ولاهنت

المشاركة الأصلية كتبت بواسطة نايف ابن حديد (المشاركة 949092) قصيدة جزله صح لسان قايلها ولاهان ناقلها