الشاعر الشيخ فالح بن ماطر بن صنيدح من الربضان من الحفاة
يسكن في القاعية وعندما رأى أبناء قبيلته من الحفاة ينتقلون من موقع القرية القديم الى المخطط الجديد حيث المباني الجديدة والطرق المسفلته والمساجد المدارس والتنظيم المختلف لهذا المخطط , تحركت قريحة الشاعر وقال هذه القصيدة , فأحببت ان اشارك بها هنا :

للشعر رقم حساب والسحب تكرار=أسحب ولا أدري ويش كثره رصيدي
يالله تقدينا على درب الابرار=وحسن العمل يوم الوعد ولوعيدي
وتجعل لنا مدخال وصدق ومظهار=ويوم اللقاء من رحمة الله سعيدي
وخلاف ذا عندي تماثيل واخبار=أفيد به من يستمع و استفيدي
ولاني بصورها على شئ ماصار=الا على معنى و علم وكيدي
الربع شدو ما بقي نافخ النار=واللي بقى منهم يطري الشديدي
لزموا بني حافي من الخط ويسار=وزان التسلي في معان القصيدي
اهل الوفاء والدين والطيب والكار=عدوهم ما جو على ما يريدي
كم واحد منهم شرب مر الامرار=يشهد لهم قدم القريب البعيدي
وكم طامعن قدام صولاتهم نار=عقب الطمع تاب و حلف مايعيدي
وياكثر ما ركبوا على قب الامهار=حقب العيون مكظمات الحديدي
وياكثر ماشيف الدويمع فالاخطار=نرعى بها نبت الفياض الجديدي
واليوم نعمة ماتبا كود شكار=والخير ما ينقص علينا يزيدي
وكلن بنا فله على دور و ادوار=وكلن من المد السخي يستفيدي
وشدوا من الصاهد عريبين الاشوار=بعزم الرجال وكل رأي سديدي
خلوا منازلهم للاجــــيال تذكار=الله مـدبـرنا علـى ما يــريـــدي
راحت خراب و فاقد جاره الجار=وينقص عـدد سكانها ما يزيدي

ومن الزمان أخذ العبر بالرحاحيل=اللي منازلهم تهاوى بقعها
ويافكرتي لا جيت بعض المداهيل=ولا شفت فيها عقب حي(ن) رتعها
ألا رسومن دارساتن مواجيل=وخرايمن يزمي السراب أبشمعها
بلاقعن شهب تهاوى زهاليل=الظاهر إن اللي فجعني فجعها
من عقب أهلها لو سقتها المخاييل=مالله نفعها وبركتها نزعها
لاجيتها جضيت من قلت الحيل=ودنياي عندي ضاقبي متسعها
على حلاحيل(ن) تضد الرياجيل=حصنن ماعاد ألا مقالع شيعها

يامنيف سير واستجب للمنادي = سير علينا ياصبي المخاسير
دهنوش تله عن ضجيج البلادي = واحرص على زيته وشد المسامير
انت تعرف عمك عدو الربادي = ويفرح ليا شاف الوجيه المسافير
حنا سكنا فالمبان الجدادي = والماء يجينا عن طريق المواصير
ديرة بني حافي كرام الأيادي = محدن بغاويها شمال من النير
مساجد فيها تصل العبادي = وعماير مثل البكار المغاتير
ومستشفيات عمرة بالمزادي = ومدارس فيها شبابٍ طوابير
وحدائق منها يعج البرادي = نزهة ويسقى زرعها بالنوافير
وجنب عن اللي جعلهم بالخمادي = اهل الرخامة والوجيه المغابير
ان حك عودٍ عود جاهم شرادي = وان صارت الدعوى عوافي ثراثير
يجون للكرمة بليا منادي = لأهل الموليمة يسبقون المسايير
عسالهم يومٍ تذيع الروادي = والا تحلبهم انفلونزا الخنازير
عنهم تكفينا طيور الهدادي = والا الحنادي ماتصيد العصافير