يا نجد يوجد بك سلاطين وخدوش=دار يعيش حصانها مع جحشها
لكن اشوفك بالهلابيج مدشوش=وامست بك العقرب تهاجم حنشها
وفي كل دار يصير باطش ومبطوش=وناس ٍ تعقد للمشاكل شوشها
ناس ٍ لها في المجد مطلاع وعروش=وناس ٍ فعايلها تسود خششها
والعيب في رجل للأسرار نابوش =أسرار ربعه بالمجالس نبشها
اللي يشيل الساق والساق معروش =مشتالها من واحد قد عرشها
غشه وقال الحق ورافق هل الهوش=تلقاء المراجل كلها في هوشها
خدش ٍ تقرقش عن هل البيض قرقوش=وللسود شايوش ٍ يشوش لولشها
ولا قط رافق مع هل الطيب طاروش =ولا فيه طرقه فاشله ما طرشها
ودايم فراشه لـ اهل النم مفروش =وإليا سمع كلمه منافق رقشها
وقلبه كبير وبين الأضلاع فشفوش =ووجهه متين لكل سوداُ كدشها
اليا احتاج حلو لسان والوجه باشوش =واليا قضاء لازم رماك إبلشها
اما طلع راشي رشاء كل مريوش =وإلا توكل لليتيم ولطشها
صااحب رخاء عن ماقف الضيق مخروش =ثور ٍ مغابيش الشرف ما غبشها
وإليا نصحته كثّر الهرج والدوش= وعينه على الناصح يطير رمشها
وكنه مركب في الحناحين خرطوش =وسوالفه بين المجالس عفشها
ومن التجارب ما فهم بارد الجوش =شيّب ونفسه ماشيه في جغشها
حتيش لو شيّب على ماش ياخوش =دايم ونفسه من رداه بطفشها
وبعض البشر خلقه على القلب داروش =والله هو اللي حط معها درشها
ونص العرب يمشي مع الناس دابوش =وربي فرق بين الرجال ودبشها
واهل النمايم في قفاء كل داغوش = اللي على الشينه قوي ً عطشها
قضابة المركاء على ماش ودفوش=اللي سوالفها تبين دفشها
نصابة بالدين لو جالها طوش=ياتي لها يوم ٍ يبين فنشها
جحادة المعروف ما تنطح البوش =الله يعجل حملها في نعشها
والحقد في راعيه يطلع له نقوش =وإلا قلوب الناس ما احد ٍ فتشها
ولا فيه عين ٍ مالها حجاج ورموش =لكنْ تعرف مرطها من عكشها
والطيب لو يشراء من السوق بقروش= يمدي غراب الدار رافق وحشها
وين الرجال معطرة كل ناموش =اللي تروّي بالمواقف نمشها
اهل الشهامه مكرمة كل هاتوش =حمّـاية القاله بصكة بوشها
عيني عليهم تسقي الخد برشوش =واللي رزق خلقه على ارض ٍ فرشها
كن الفؤاد من المعاليق محشوش = وروحي من الذكرى يجيها حششها
ما طلعوا من بينهم كل مغشوش= والناس تطلع من عضاها غششها
اليا صار ضرسك بين الأسنان ناهوش =قلعه علاجه عن سنون ِ نهشها
ياويلهم من ماقفِ فيه رابوش =يوم الأوآدم يجمع الله طششها
اليامن يوم الملتقاء حاشهم حوش =تشخص به الأبصار من ما ربشها
يوم الحساب اليا جمع كل مطشوش =يذهل جميع الخلق من ما رهشها
حتى الجبل يصبح كما العهن منفوش =واهل القلوب المؤمنات يخرشها
تمت بذكر الله وقافي على اوش =والناس تعرف خدشها من دغشها
قول ِ يسقي كبود الأبطال نقروش =وحبوب روس اهل الدوادي جرشها

المشاركة الأصلية كتبت بواسطة محمد العتيبي (المشاركة 894609) الله الله صح لسااان ابن سمير ,. وصح لسااانك يابدر على هذه الرائعه تحيتي ..