قم يافهيد وشب نار كبيره
واصرم عليها من الحطب لين تعتز
نار لها مع طلعة الشمس نيره
ليشافها العمسان عقب العمس فز
وهات الدلال وحطهن بالحظيره
واجذب لها جمر الغضا واترك القز
حتى الى جونا الوجيه السفيره
على تنابيل يكزونها كز
يلقون فنجال شرابه بريره
يطرب لها العمسان ليمزها مز
ومن عقبها كبش اشحومه كثيره
الى جت موجيبه يقلط على رز
في روضة عقب المطر مستديره
من سيلها تلقا بجيلنها حز
ليهب ذعذاع النسيم بغديره
تلقا بها الغرنوق والبط والوز
وش خانة الدنيا الختول الغريره
ليما ادرك الرجال باطرافها عز
نفرح بها نبي الشرف والستيره
وعن حاجة تحوج لمن لا يميز
تمسي بها وامن وتصبح مغيره
ولابد من صدفاتها لو تحز
خاب وخسر من حطها له ذخيره
والموت راياته على الناس تهتز
لبد من قبر هيام حفيره
فوقه طويلات النصايب تركز