ماهي غريبة على فيحان وامثاله=المرجله ورث جدانه من اولها
من عهد جده وابوه وعمه وخاله=ماتنزل اهل الوفاء الا في منازلها
الطيب منهم ومعهم طالت احباله=لو تقصر احبال ابوفيصل يطولها
الطيب لو هو رجل قد شرب فنجاله=كلمة نعم بين خلق الله محصلها
تغيّر الناس والحآفي على حاله=عوايده حسب سلمه مايبدلها
ماهمته رتبته والجآه واعمآله=في لازمه كل هاذيّه تجاهلها
ماشاف نفسه بمخراجه ومدخاله=الغطرسه عنه ابوفيصل محولها
ياقف مواقيف عز وتشهد افعاله=الوقفه اللي ينومس فعل فاعلها
مواقفه مع رفيقه موقف الطاله=الوقفه اللي محد غيره بطايلها
يعامله كنه الاوسط من اعياله=وعوايد اهل الوفاء هذا تعاملها
ويشاركه في الحزن ويشيل ماشاله=وناسن تحب الجميل الله مجمّلها
الخلق خلقه سواء كلٍ على فاله=احدن وصل للعلاء وأحدٍ ماياصلها
احدن يحب الوفاء والطيب يسعاله=ويواجه اكبر مصيبه ويتحمّلها
واحدن يحاول لاكنّه تبرك اجماله=مسيرته لو يحاول مايكمّلها
واحدن علوم الوفاء ماهي على باله=روابعه كيف يطبخها وياكلها
دايم قريب النظر في حال يرثاله=نفسه ضعيفه ومشغلته ومشغلها
وعلوم يشفق لها وعلوم بطاله=وعلوم مضمونها ترجع لقايلها
وفيحان عن كل هزله تكرم اسباله=له نظرةٍ فوق .. تحته ماينزلها
وختامها عد نوّاً خيل خياله=وعداد ماهلت الغرا مخايلها
على رسولاً بعث للحق برساله=رسالة الحق لابن آدم موصلها
صلاة ربي عليه وربنا قاله=صلوا على اللي رسالاته مفصّلها