حمدان العصيمي وسلطان الهاجري
 

سلطان الهاجري


يا حمدان عوضنا ليا غاب مستور
ليا غاب نجم يحل نجم ٍ مكانه
هجمتوا على الدوله بعشرين طابور
ولا ادري رداوة حظ والا ميانه




حمدان العصيمي




لنا دور وانتم يالهواجر لكم دور
وكل ٍ من الثاني ضمنها ضمانه
على غبة الامواج تسعين بابور
وابو زيد ياحذ وزعته في زمانه




الهاجري




ابو زيد علقها على فرعة الكور
يا راع الحصان اللي طويل ٍ عنانه
اذا انك على ما قلت مرغم و مجبور
من اللي تطلب ضربة الخيزرانه




حمدان العصيمي


يبى يسري الطرقي على طلعة النور
وكل ٍ لسانه فالمواقف حصانه
انا في بيوت العز والمجد مذخور
يا راع الكيان اللي رفيع ٍ كيانه


الهاجري



عصاة ٍ منول راسها اعوج مشقور
عوجها فلان وكسرتها فلانه
ليا جيت بن عتقان وصل له الشور
لا يرجي العشا من قرشة البرتكانه



حمدان العصيمي




من الباس يا سلطان ماجور ماجور
حفظنا الديانه عن ضياع الديانه
سباع الخلا يا صاحبي مالها سور
ويخلف نظرها الرمي والجبخانه



سلطان الهاجري





على الجهد ياحمدان مشكور مشكور
حظرنا وكل ٍ يسترح في مكانه
انا خابر ٍ انك مرهف احساس وشعور
وهالحين اشوفك فيك كيد ولعانه



حمدان





شهدنا شهادة حق ما نشهد الزور
ولاهمنا اللي مبتدي عنفوانه
تبى تختم الاوراق في شهر عاشور
وتعلج نصيبك مثل علج اللبانه





الهاجري




لقينا العرب قسمين منهي ومامور
وطير السعد حمدان خيرة خوانه
تطير الطيور الصبح وتوقع طيور
لكن الله الله فالعهد والامانه



حمدان




لنا هيبة ٍ تبقى ليا نفخة الصور
وموت ٍ بعز ولا حياة الجبانه
وابو موتر ٍ مغير رفرف وماطور
نبى ندخله بكره محل الصيانه





الهاجري





وراك التوى وجهك تقل وجه مجدور
وانا ما نويتك بالغدر والخيانه
ليا من سبحت بحور وبحور وبحور
تحصل من الدانات دانه ودانه

الله اكبر الله اكبر


سباع الخلا يا صاحبي مالها سور
ويخلف نظرها الرمي والجبخانه



بيض الله وجهك يالمثالي


:)

دمت بود

طاروق رائع جدا


صح لسان ابو راكان وابو وسام

ولاهنت يالمثالي

آآبداااااع

من حمدآآآن .. الله يحفظه

وابن وسآآآم مو هآك الزود بصراحه .. !!


صحة الاسنه

ولاهنت ..

الله الله

لقاء رائع بين شعراء ماعليهم غبار ..


تحيتي
..

الف شكر لكل من مر من هنا

صح اللة لسان الجميع

لاهنت يالمثالي على هالمحاوره الجميله

وشعراء ماشاء الله متمكنين