الهيـــــــــــــلا   *** منتدى قبيلة عتيبة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   منتدى دواووين شعراء المنتدى (http://www.otaibah.net/m/forumdisplay.php?f=99)
-   -   ديوان الشاعر المبدع والفذ / عيضه الثبيتي .. (http://www.otaibah.net/m/showthread.php?t=98542)

محمد العتيبي 04-Oct-2009 10:29 PM

ديوان الشاعر المبدع والفذ / عيضه الثبيتي ..
 
بسم الله الرحمن الرحيم



يسعدني أن أقدم ديوان أحد شعراء الهيـــــــــلا *** منتدى قبيلة عتيبة

وأحد شعراء الساحه الذين يتميزون بالقوة والجزاله فيما يقدموه للمتذوقين ..
http://www.mergab.com/montada/image....ine=1198597654

الشاعر / عيضه بن معيوض بن دبيان الثبيتي .. مشرف قسم المحاورة وقصائد الأعضاء




قصيده في خادم الحرمين الشريفين الملك ( عبدالله بن عبدالعزيز ) حفظه الله ..



طوّل الله عمر ابو متعب وكثّر خيره=المليك اللي يمينه بالكرم معهوده
الزعيم اللّي على شعبه فرض تقديره=الكريم اللي ما جود الا كرمه وجوده
وأشهد أن الطيب ذخر للطيبين السيره=والملك عبدالله بطيبه سواة جدوده
قبله اللّي فعلهم فوق الوطن تقريره=صيتهم مايختفي وأفعالهم مشهوده
الملوك اللّي لهم فواق المواطن غِيره=الملوك اللّي علانا أنعامهم ممدوده
محتمين الدار يوم القوم جات مغيره=كم من خبلً طمعنا مابلغ مقصوده
اكسروه ولا نفع في كسره التجبيره=البراء مردود وعيال الردى مردوده
وعندهم ياعنك ماضاعت حقوق الجيره=يشهد التاريخ وأفعال العرب موجوده
وعاش ابو متعب وحنّا من تحت تدبيره=كلنا شعبه وفي وقت اللزوم جنوده
وخيره اللي عمّ دار الخير ديره ديره=مثل همّال الربيع اللي تدن رعوده
الخيال اللي ذعاذيع الهبوب تديره=كل ما اسقى ديرة ً جات الهبوب تقوده
خادم البيتين زيزوم الحمل وبعيره=الزعيم اللي على شعبه بذل مجهوده
وادري أنه كل شعبه مشغلً تفكيره=وقال نفسي عن جميع أهل البلد منشوده
والسعد والخير جانا من بعد تبشيره=يوم بشرنا ووفى في جميع وعوده
هكذا طبع الكريم االلي يشب النيره=والشجيع الي يزيد ولاحد زايد زوده
كل من صلى دعى له فأول التكبيره=ثم يدعي له بعد فركوعه وفسجوده
وفّقه ربي وجعل الله يكثّر خيره=يالعل الخير دايم جوده وماجوده
[/QUOTE]



قصيده القيت في حفل أجتماع قبيلة الثبته أهل السيل الكبير
فالعيد السعيد2/10/1427هـ
في مجلس أهالي السيل الكبير بحضور مشايخ القبيله وأعيانها


الله واكـــبر عـــد من كبّــــــر وهــلّل فــالمسيـــد=الله واكبـــــر والثــــنــاء لــِلـــه رب العـــالميــــن
هل الهـــلال وهلّـــت حـــروف القوافي والقصيد=وأنـــا وشعــري والقــلم وقــت المهمّــه حاضرين
انظـــم قصيـدي واكتـــبه واللبّسه ثـــوبً جـــديد=واطيّــبـــه بالطيـــب وارشـــه بـــورد اليـــاسمين
وأول ما نبـــدأ بالتـــحـــية يا ســـلام الله وأعـــيد =ســـــلام واحــــد ما يكفـّي يا ســـــلامي مرتيــــن
حضـــرت أعـــايدكم وشوفتكم تـــزيد العــيد عيد=يا لله لعــلـّه عيــــدكم مبــــروك ومــن العايــــدين
يالله عسانا كـــل عـــام نعـــيـــّد العـــيد الســـعيد=ونلـــقى بعـــضنا ونتعــــايد يالـــــرجال الطيبــين
واكبـــر فخـــر يــوم انتجمّع من قريب ومن بعيد=والـــرأي واحـــد والقبيــــله وحـّــده والعـــلم زين
وأكبـــارنا وأصـــغارنا تمشي على الرأي السديد=والصــــف واحــــد ماتغيــّره الليــــالي والسنيـــن
من شـــرعنا الإســـلام منهـــجنا هذا العلم الأكيد=والأمر شورى والتوحّد من صفـــات المسلميــــن
يعنـــي هـــنا نـــجلس ســـوى حتـى نفيد ونستفيد=وذكــــرى الحيـــاء والطيبـيـن يـبـيـن لابــدّه يبين
فالمـــجلس اللي مـــنفتح بابه على العـــلم الرشيد=وأول بــــــركــــاته تجمّــــعنا بهاليــــــوم الثميــن
والخيـــر باقي والطـــموح أكـــيد نطـمع فالمزيد=وأمالنـــا تحقـــيقها بأيــدي الـــرجال المخلصـــين
تطويـــر ديـــــــرتنا مهمتـــنا وعنـــها ما نحـــيد=وأمّــا تعـــاونا ما بتصفـــق يســــار بلا يميـــــــن
نبى جـــدار البـيت فالقـــوّه كما الســاس الجــويد=واللي ما يــدري ويش قصدي؟كـل قصدي كلمتين
الســـاس هُـــمّ الأوليــن اللــي خـــذوا مجدً تليــد=وياليـــتـــنا نلــحق شـــويّه مـــن عـــلوم الأوليــن
اجدودنــا اللي لاوطتـــهم وطيـــة الوقــت الشديد=وقفـــوا ســــوى والكــل منـهم يعتبر حصنً زبين
مشــوا على رفق ومعــزّه فالنــــزول وفالشـــديد=وعاشـــوا على طيـــب وشهــامه نازلين وراحلين
وحنـــّا ليـــا منـّا تكـــاتــــفــنا نحقـــق ما نــــريد=مير المـــهم نـــكون فعــلاً فالطـــلب متـــكاتفيـــن
نحاول انحل العقــــد ماهـــو بالسيــــف الحـــديد=بالصبـــر والإيمـــان والإخـلاص والعقل الرزين
العضد جنب العضـــد ويقوم العضيد مع العضيد=والجنب جنب الجنب والشرهه على الجنب المتين
محمد وحامد وابن حامد وابن وادع وعيد=وابن عنيبر والخوامس كلها خشمً وعين
ربعي ثبيت وحبهم يجري مع الدم فالوريد=الجد ثابت والقبيله فالمواقف ثابتين
تاريخهم ثابت على طول الليالي مايبيد=مرجع عتيبه كلها وخوال للهادي الأمين
وبيت القصيده فيه تلقى زبدة العلم المفيد=ياجعل هذا الأجتماع يعود وأنتم طيبين
وعندي رساله هادفه ماهي رساله فالبريد=رسالةً منّي لكم وأنتم علاها شاهدين
عسى حياة الحي تحيــــا والحيـــاه اغـــلا رصيد=هذا هو المضــمون والمقصـــود للنـــاس أجمعين
وختـــامها نشكر هل المجلس على الحفل الفريد=والله يــــــوفقهم على حســـن العمـــل دنيـــا ودين
ويالله عســــــانا كل عــــام نعيـــــّد العيد السعيد=ونعايد الأصحاب والأقراب ومن الــعـــايـــديــــن



دواليب الليالي والأيام


دارت دواليب الليالي والأيام=وتبلّدت ياسعود بعض الأحاسيس
من كثر ماشفنا وعفنا من العام=دنيًا يشيب ابها الذي يرضع الديس
الغرب غازي للعروبه والإسلام=وحنّا على الشاشات صرنا مراويس
صرنا مسارح للمذابح والإجرام=وسيوفنا بعد الفخر عوّدت فيس
نزحف ورى والغرب يمشون قدّام=مرخين أذانينا للتقرير ميليس
مابينا يقضون عبّاد الأصنام=ويكذب علانا هيس بن هيس بن هيس
العام كان الذبح في شعب صدام=وهذا السنه بشار جته التلاميس
والله واعلم من هم اللي ورى الشام=أفكارهم واطماعهم مالها قيس
أفكارهم تنجح وتخطيطهم سام=وتخطيطنا يفشل بكل المقاييس
وصارت رجاوينا كوابيس وأوهام=ولا اردى من الأوهام غير الكوابيس
ننكر..وتكتبها فقط رؤوس الأقلام=ونضيّع اللّي نكتبه فالقراطيس
تاسيسنا على البطوله والإقدام=والظاهر التاسيس يحتاج تأسيس
وصارت مشاكلنا صعيبات وعظام=كبر الجبال الشامخات الدلابيس
وشلنا حمول الظيم بأكوام وأكوام=ماهي حمول العيس ياحادي العيس
هَمّ العرب صار الأغاني والأفلام=ونطّرد الكوره وحنّا مفاليس
وحياه رومنسيّه وحُب وأحلام=من سالفة ليلى إلى سالفة قيس
وتاريخ فريسً نحفظه بالأرقام=واليوم جات أرقام من غير فرّيس
ياجبال مكه صيّحي فوق الاهرام=ويجيبك المغرب بعيد المراميس
يانهر دجله صيح في نجد والشام=وتسمع صدى سينا من جبال بالقيس
ولا والّذي نزل تبارك والأنعام=لن ماصحانا لن نغدي فالدهاليس
أبليس خلاّنا تشاتيت وأقسام=يارب تنصرنا على الغرب وأبليس


مرثية في الشيخ / نحم بن هليل الثبيتي .. ( أبو عتابه ) شيخ قبيلة الثبته والقاضي المعروف ..رحمه الله



هيضّني اسم الشيخ جعله في رياض الصالحيـن=ولعل قبـره بالمـزون اللـي تلـوح بروقهـا
واهني من يرحل وذكره فـي قلـوب الطيبيـن=وكلمة (رحمـه الله) عليـه مـرددًا منطوقهـا
ذكرى الحياء والطيبين يبين من ماضِ السنيـن=والوقت يمضـي والنشامـا ماتضيـع حقوقهـا
كم حيّ فوق الارض يحسب من حساب الميتين=وكم ميتٍ يدفن فالأرض وعاش ذكـره فوقهـا
والناس مـا تذكـر يكـود الطيبيـن الغانميـن=أمانـةً تِحْفـظ وتاريـخ العـرب صندوقـهـا
و أبو محمد ذاع صيته من عصـور الأوليـن=(نجم) على اسمه والقصيده فالكريـم نسوقهـا
عز الرفيق ومسنده.. زين النبا ..ذرب اليميـن=واليا نصـوه عيـال عمّـه فاللـزوم يشوقهـا
واليا وقف في ماقفه ياقف كما الضلـع الزبيـن=اليا وقـف ضـد الرجـال المعتديـن يعوقهـا
أبو عتابه قاض الحقي راعي العقـل الرزيـن=كـم مـن قضيـه حلّهـا وموثّقـه بوثوقـهـا
عدى الروى اللي فوق جمّه واردين وصادريـن=والناس مـن جمّـه تبـل كبودهـا وحلوقهـا
من روس الاد ثبيت واسمه ماتضيّعه السنيـن=لو كان تحت الأرض.. ذكره ما اختفى من فوقها


وآسعد من ربعه العتبان



بسم الله الرحمن مبداء كلامي=مبدا القصيد ومطلع القيفان
ولا خاب من يبدا بذكره كلامه=رب العباد الواحد الرحمان
واردّ من حلو المثايل واغنّي=كلام موزونً على ميزان
هبت هبوب الشعر منّا زمنّا=ببيوت مثل الطرقي العجلان
تسابقنْ مابينهم في ضميري=الكل ودّه يصبح العنوان
واخترت من زين المعاني معاني=وبنيت مبناها على سيسان
بيوت شعرً في ضميري تزاحم=تارد مثل ما يارد الضميان
ارسم معانيها وارتّب حروفها=صنعة عقود الول والمرجان
وانا لياجات المواقف عتيبي=واسعد منهم ربعه العتبان
العزوه اللي من خيار العزاوي=اللي لهم بين القبايل شان
قومً يعرفون القبايل فعولها=زبن الدخيل وسم للعدوان
كم نزّحو لابه وعاشوا مكانها= يوم أنها سيف وفرس وعنان
تربعوا في وسط نجد وخذوها=يوم إدراج الخيل فالميدان
قحص المهار اللي عليها رجالها=تـقضّب المديون للديان
ومصقلاتً عشت النمر والفهد=والطير منها ماضوا جيعان
ربعي هل الطالات لطّامة العدا=لا زادت الشعله على الدخان
أهل الفعول اللّي تبيّض وجيها=لا عدّت الأفعال كان وكان
أفعولها يزري لساني يعدّها=والله مايحصيها كلام لسان
ولو تكتب الأقلام مايكفي الحبر=ويمدي الورق خلّص من الدكان
برقا وروق أهل السلوم العريبه=تاريخهم بالمرجله مليان
سمّوهم الهيلا لكثرة جموعهم=هيل المطر من رايح الأمزان
وذباحة الحائل لكثرة كرمهم=قومً كرام تكّرم الضيفان
ولطامة العايل للطمة عدوهم= قولً على فعلً على برهان
أمجادهم مثل النجوم المطلّه=ماتختفي ياكود للعميان
وحصونهم مثل الجبال الرواسي=امرسّيه مارسّت الضلعان
وأديارهم في قلب نجد الموقّر=وقلب الحجاز الشامخ الفتان
هذي منازلهم وهذي ديارهم=وهذي مسيرة ربعي العتبان
ووالله مايكفي قصيدي بحقهم=لو أنّي اكتب لي 100ديوان


إهداء لــــ(سلطان عتيبه) الشاعر سلطان المنصوري....أثناء مشاركته في شاعر المعنى ..


عاش الذي بالعز يرقا ويرقا=يرقا سنود ومنزله مرتفع فوق
تزرق رماحه فالمواقيف زرقا=ويسبق على الطالات ماهو بمسبوق
قلوب حسّاده من الغبن حرقا=وقلوب عشَّاقه بها زايد الشوق
وصدور عدوانه من الغيض شرقا=وصدور ربعه من تماثيله تروق
سلطان لن غنَّى من الشعر طرقا=تلقى بشعره زبدة الشعر والذوق
ولن جرَّ صوته جاوبت كل ورقا=وحنّا نصفق مِعه في كل طاروق
وقلوبنا في بحر الإبداع غرقا=وسلطان اله فقلوبنا عهد موثوق
يسرق قلوبٍ تعشق الشعر سرقا=ولو صار للشعر ترتيب وفروق
من بينه وبين الشواعير فرقا=فرق الذهب عن باقي بضاعة السوق
واليوم مادون المواقيف درقا=والصبر زين وكل مطرود ملحوق
انَّادي العتبان غرباً وشرقا=ونسوق ما نملك من آموالنا سوق
وسلطان ينخى بين روقاً وبرقا=تكفون يابرقا وتكفون ياروق


قصيده مهداه للشاعر / يوسف العصيمي .. أثناء مشاركته في برنامج شاعر المليون النسخة الأولى ..


ولا ياعتيبـه عيّـدوا عيدكـم مممـنـون=وزفّـوا لابـن رزّاق ملـيـون عيـديـه
ومليون تسليمه علـى الشاعـر الدنـدون=ومليـون ترحيـبـه وملـيـون ردّيــه
أبـارك لربعـي كلّهـا والصعـاب تهـون=ويقعـد بهـا (تركـي وغسـان ووخيـه)
وابو(صفر)قدره(صفر)بهنـاك ولا هــون=وحنّـا رجـال الطالـه هـنـاك وهنـيّـه
عتيبه عصاء موسى وانكبتك يافرعـون!!=تفرعنت لين أن العصـاء عـوّدت حيّـه!!
عتيبه هل الفزعه لا جات اللـزوم يجـون=رجالاً تـدوس المـوت لا كبـرت الهيّـه
عتيبه وبإذن الله ترى نصرهـم مضمـون=مثـل نصرنـا المبروك(يـوم الرشاويّـه)
عتيبه جبال الها حيـود وحجـا وركـون=تـرانـا عتيـبـه والمـواقـف عتيـبّـه
وياحيّ من برقـا علـى جنبـه يقومـون=وياحـيّ مـن ينخـى بنـي روق ياحيّـه
لو أنّك نخيت الشايب اللّي على الحاجـون=يفز الك لـو رجلـه مـن الوقـت مثنيّـه
وحنّا هل (أبشر)لا ظهر حرف من(تفكون)=سبقنا طلـوع (النـون) يادافـع السيّـه!!
ترى أرواحنا مـن دون ميقافنـا عربـون=وهـذي علـى العتبـان حاجـه طبيعيـه
وحنّا هل العلياء ماحنّـا مـن اللـي دون=مابيـن الكواكـب والنجـوم السمـاويـه
ولن جات للتصويت بالهاتـف المشحـون=شحنّا القلوب اخـلاص ووجـوب وحميّـه
نبى نقفّل النسبه..نبـى نصفّـر الطبلـون=ونبى نأخـذ المليـون غصبـى وجبريّـه
لإنـا ملـوك الشعـر يالجنـة الملـيـون=ولا اخذتوا من الشعر(1%) واحد من الميّه
غبينه لا صار الصاحـي يقيمـه مجنـون=فضيحـه لا صـار العاقـل يرشّـده عيّـه
من الخبث ماينظفكم المـاء ولا الصابـون=غدرتـوا بيوسـف كلـكـم يالحرامـيّـه
ولا عندكـم شيمـه ولا عندكـم قـانـون=وربـي فضحـكـم قالقـنـاه الفضائـيّـه
نفختـوا قليـل المعرفـه نفخـة البالـون=وجحدتـوا وسيـع المعرفـه يالحسوديّـه
جلسّتوا محل النابغـه ميـر مامـن لـون=ويابعد مبدا الشمس عـن داجـي الفيّـه!!
وتقييمكـم ماعـاد نبـغـاه مشـكـورون=مادامـت حميتنـا علـى السـاس مبنيّـه
نبى نكوي الحسّاد مـن جمـرة الغليـون=ونضحـك جميـع ونلحـق الكيّـه الكيّـه
ماحنّا فقارى يـوم نبحـث عـن المليـون=ترانـا علـى طـول الليـالـي غنـاويّـه
لكنـا ملـوك الشعـر واحـق بالملـيـون=ونبي نأخـذ المليـون غصبـى وجبريّـه


بمناسبة غلاء مكائن الخياطه



لا والله الاّ طار سعر المكاين=حظ اللَّي أُمّه عقَّبت له مكينه!!
!=!
على درجة بيته وقوف الزباين=كلً يزيد الألف ويدير عينه!!
!=!
كن المكينه ناقةً فالمزاين=حتى الوسم في جنبها حافظينه!!
!=!
وأهل الطمع قامت تفك الخزاين=تبى تزيد فلوسها فالخزينه!!
!=!
واللّي ما عنده شي جته الغباين=والشات زاد اله الغبينه غبينه!!
!=!
ما غير فالشاشه عيونه تعاين=ومن القهر تضرب يساره يمينه!!
!=!
والحظ فرصه..والمكاين مكاين=وتمحق عجوزأً ماتعقّب مكينه!!



قصيده قيلت أثناء قذف الصحفي ( منتظر الزيدي ) للرئيس (بوش ) بالجزمه ..


يا ما أنتظرنا تجي للعيد عيديّه=ويا (مُنتظرنا ) انتظارك تالي الأزمه!!
*=*
نخوتك يوم انتخيت وجيت للهيّه=نخوة عراقي يصيح ولا برد عزمه!!
*=*
رفعت رأسك على عز وشهاميّه=وحنيت رأس المريكي بوش بالجزمه!!
*=*
وتناقلتها القنوات الفضائيّه=وأنا أشهد أنّك تقول العلم وتحزمه!!
*=*
وجزمتك..تسوى قنابله النواويه=منها تروح الكلاب السود منهزمه!!
*=*
يامُنتظر.. لك سلام وشكر وتحيّه=عداد نواً رعوده جالها رزمه!!
*=*
مرفوع فعلك ..وقدرك مرتفع زيّه=يوم أن الأفعال منصبّه ومنجزمه!!
*=*
وقل للعرب كل واحد يخبر وخيّه=اللي يبى بوش فوق الجزمه يعزمه!!
*=*
جايٍ يبى يودَّع الأرض العراقيه=وياكم من واحداً ميّت على لزمه!!
*=*
لكن جاته وداعيّه وداعيّه=وتسلم يمين الذي ودّعه بالجزمه!!


المرجله ..


لا ضاقت الديره بخاطرك وجّه=وتلقى ديارً شوفها يطرب البال
سوق القدم قدام مع كل فجّه=وديار ربّي قدمك عراض وطوآل
ورح للخلا فالليله المدلهجّه=يكفيك لو تشرب من الكيف فنجال
في صحصً مافيه صجّه ولجّه=والنور خافت والقمر توّه هلال
حزمً براحً مايجي منه عجّه=دوب غسله من رايح المزن همّال
وأخذ مع الهاجوس سجّه وسجّه=في جال نارً عامره تشعل أشعال
أخير لك من سوق مليان دجّه=من قوم دجّوا تاجد الوان وأشكال
السوق بأهل السوق مليان صجّه=بمراسلية هرجة القيل والقال
ناسً على شذب البشر مستلجّه=أفطن لهم يامعّرب الجدّ والخال
والمرجله حجّه وياوّي حجّه=ومن صعبها مانالها كل رجال




صحبة العاقل وسام وصحبة الجاهـل سماجـه


لعنبو مزح الرخـوم اللّـي مافيـه الاّ النقـاده=ولعنبوا كثـر المهايـط والمخايـط واللجاجـه
المجالس بعضهـا صـارت يـادادي يـادداده=يـادداده يـاددادي مالـي بطريـاك حاجـه
السوالف بعضهـا مابـه صـلاح ولا فيـاده=أول الهرجه ضحوك وتالي الهرجـه هماجـه
عادة ً ماخس منهـا ياوجيـه الخيـر عـاده=صار بعض الناس يشبه للمحرّج في حراجـه
وافسـاد الوقـت الاقشـر وافسـاده وافسـاده=والحظيظ اللي يصون لسانه ويلقـى خراجـه
وخير من بعض الوجيه فراش ولحاف و وساده=لو اصاحب هندي وسندي واخاوي لي خواجه
الليـالـي علمتـنـا واكرمتـنـا بالشـهـاده=صحبة العاقل وسام وصحبة الجاهـل سماجـه
[/QUOTE]


يفكه الموت ويخمّه


نسيت يوم الغلا توّه=طفلٍ ترعرع بحضن امّه.
يلعب ودنياه تلهوّه=والنوم في جيبه وكمّه
وأيامه اتمر محلوّه=ويشرهه خاله وعمّه
وازداد قوّه على قوّه=وازداد هِمّه على هِمّه
وازداد وازداد فعلوّه=حتو وصل عالي القمّه
زعيم عن ربعه مفوّه=يخصه المدح ويعمّه
كريم ماينطفي ضوّه=شيخٍ تسير العرب يمّه
سواة برقٍ سرى نوّه=يعطي من الجود ماهمّه
وعدٍ حباله بلا لوّه=تارد على راهي الجمّه
ودار الزمن وأختلف جوّه=وجته المقادير ملتمّه
وسأه زمانٍ كثر سؤّه=ولا عاد ابه سن في فمّه
شيّب على عز ومروّه=ايفكه الموت ويخمّه
هذا الغلا بيننا هوّه=من يوم ماخلفته أمّه



قصيده أخرى




وآ كبدي اللّي على شوفتك منفَطْرَه=زايد ظماها ..ويابستٍ شراييني!!
*=*
حتى المطر يوم يمطر.. مالتفت شَطْرَه=لأنَّي أن شفت برق الغيث.. يضميني!!
*=*
أتخيَّلك من غلا ..محبّه ..وبَطْرَه=واتذكَّر أوصاف خدَّك يانظر عيني!!
*=*
يامهجتي فالحياه الحلوه العَطْرَه=أنتي هوايه مدام الله محييني!!
*=*
وشعري وحرفي.. قبل يكتب على سَطْرَه=منقوش فالقلب باسمك.. مير تَكْفَيني!!
*=*
ترى حبيبك يعيش بحالةٍ خَطْرَه=والموت شعره ..تبقَّت ..بينه وبيني!!
*=*
شاعرك ضميآن من شَطْرَه ليا شَطْرَه=ومن المطر ماروي ..ياروحي ارويني!!
*=*
من ريقك الحلو يرويني.. ولو قَطْرَه=أعطيني من العسل قَطْرَِه ..وتَكْفِيني!!

طقة العود للباب!!


البارحه جات القوافي تطوّع=والليل في مبداه وسهيل ما غاب
وقلبي على وصل الحبايب مجوّع=والبعد سُقْم الروح والشوق جذاب
من لوعة الفرقا ماغير اتلوّع=والهم ماله عن هل العِشق مجناب
والقلب مابين الضلوع يتزوّع=عليك ياللّي صورتك بين الأهداب
وليلً بدونك ياحياتي يروّع=ولا مثل ترويّعه يقع راعة الدآب
وليلً يجيبك خطوته ماتتوّع=عسى اللقاء ماينقطع بين الأحباب
يا طيب ليل العاشقين متنوّع=مصارحه/وعلوم/ومزوح/وعتاب
واليا قبضت الهاتف اجلس واكوّع=للّي علومه داخل القلب تنساب
بالخص لا سولف وقام يتموّع=هذا بلايه!!وش بلا أبوك ياعقاب؟!!
ميعادنا يالين آذان المطوّع=وتوديعنا مع طقة العود للباب!!


( حسافة عاشق )


ولا يا مل قلـــبًا ذاب صبــره تحت نار الشوق=كما الغصـن اليباس اللّي رمي فالنار واحياها
تحداه الزمان وصار من بعد الحيـــاء محـروق =حسافه يا لسنيـــن اللّــي مـــع التغريد قضّاها
حسافة عاشقاً كله ماســي من غــــلا معشـــوق=رمت فيه المحبّة حدّ خنجـــرها وشلــفــــــاها
وحسافة عاشقًا فجدار قــلــبـــه للــغـرام شقوق=ما كنت أظن تحصـلــّه لــكـــن الوقت سوّاها
ماكنت أظن قلبي يخضع لمخلوق يا مخــــلـوق=لكن أنته رميــته رميـــة ً ما عــــاد ينســــاها
سرقت أيامه الحلوه وصار مع الأسف مسروق=ياليـــت الـــوقت يـــرجع والله أنّك ماتـحلاّها
بساتين السعد كانت ربيع أخضر.. مطر ..وبـروق=لكن أجتاحها إعصــــار الغــــرام وهدّ مبناها
وينابيع الحنان أمست حجارً فـــوق بعضه فــوق=يا ويـــل الظــامي اللّي جف ريقه مابعد جاها
هنيّك بالسمـــــاء لا واهنيــّـك يا حمـــام الطوق=ليا ضـــاقت بك الأرض الفسيحه طرت لا أقصاها
تلاعبك الهبوب وكل طيرً فالسمــاء مــــرزوق=وأنا تلعبّـــي ريــــاح الــغـرام وضعت ويّاها
صبرت وباح صبري وانتثر فوق الخدودالموق=عيونًا ما بــــكت للمــــوت مير الشوق بكاها
شكيت الحال فـــوق اللـيل والمسباح والطاروق=وقالوا : صـدق من دورّ على النكبات يلقاها


البارحه كثرة الأشغال=والناس جوف البلد فوضه
وتعطّل البرج والأرسال=ما برج في تالي الموضه
وحسّيت غربه وضيقة بال=والوقت خانتني حظوضه
والهم والغم والغربال=انقضّت وجات مقضوضه
وذكرتك ودمع عيني سال=غيثً وبرقه سرا نوضه
وابا اتصل والعطل لا زال=وريّضت يامطّول الروضه
وفتّشت جوالي النقال=رقم/ورساله/وملحوظه
وقالو لي العالم العذال=نصيحة ً جات معروضه
امسح وشيل الأسم بالحال=واهيّه من العام مفروضه
ومسحت رقمك وليلي طال=أسمك من أسماء مرفوضه
ماتنحفظ داخل الجوال=في داخل القلب محفوظه
[/QUOTE]

وقصيدة ...


مشتاق لك مشتـــاق لك والشوق لا زاد اشتعل=بين الضلوع يشب ناره والطعون يحدّها
والقلب يســــكنه الرجاء والياس ما يلقى محل=ننسى الليـــال الماضيه والمقبلات نعدّها
وعز الله أنّـــي مانسيتــك لو نسى النحل العسل=ناس ٍ تخون عهودها (يا لله لا ترحم جدّها)!!
اذكـــــرك وأفــداك بقصيدي قول :(يفداك الخبل)=مدّيت لك يمنـى المحبه وأنت قلّي شدّها
كل القصــــــايد من ضميـري لذكرتك تستهل=سحابة ٍ وأنت الهبــــوب تجيبها وتردّها
احيان تمطر من رضاء واحيان تمطرمن زعل=أهمّ شـي اليا ذكرتك ممطــره لا بــــدّها
يا منيتي يا غايتي يا صــــورة ً طبــق الأصل=للنجمـــه اللّي فالسماء خدّك يشابه خدّها
الحــــب يظهـــره الوفاء لو كان يمنعه الخجل=والكلـــمه اللّي قـلتها وشلون عاد ارتدّها
أنا بدونــــك فــي حياتي لو أعيش.. بغير أمل=جعل الحيــــاه اللّي بدونك ما يثنّي ودّها
عمر العواصف ما تهدّ أصغر جبل وأكبر جبل=مير أنت حبك لو دخل كل الجبال يهدّها


كذوب ومنافق ..




ياصـاحـبـي والله مـــا ننـتـوافـق=وأنته وأنا ..ياعنـك مانصلـح اصحـاب!!
*=*
أنتـه مـن صغرتـك(كـذوب ومنـافـق)=وأنـا لانـي (منافـق ولانـي بكـذاب)!!
*=*
وش لـون تبغـى فالحـيـاة نتـرافـق؟!=وأنت أنجس من الفار..وأخطر من الـداب!!
*=*
السّـم مـن بيـن الـشـدوق يتـدافـق=واليا ضحكت.. نشوف ضرسك ورى الناب!!
*=*
وسوالفـك مـثـل الهـبـوب اتصـافـق=وأنشبـت خلـق الله..وفرّقـت الأقـراب!!
*=*
ماغيـر تلـفـق فالسـوالـف تـلافـق=وذياب وش ودّا؟..وابو زيـد وش جـاب؟!!
*=*
والألسنـه تظـهـر نـوايـا الخـوافـق=والنـار تالـع مـن شـراره ومشهـاب!!
*=*
وأنا علـى نفسـي مـن الوقـت شافـق=وأحرص على خـوّة عريبيـن الأنسـاب!!
*=*
وأمَّا أنت يمّـا عـن علـوم الـردى فـق=ولا بـلا مطـرود ..قـدامـك الـبـاب!!



ماعاد تحلالي ..



ليا صـرت غالـي لاتغـلا علـى مغليـك=يموت الغلا لاأرخصت مغليـك يالغالـي!!
.=.
ولن صرت تزعل مانت لاقي عرب ترضيك=ترى لأنت الأول في زمانـك ولا التالـي!!
.=.
تحسب القلـوب العاشقـه لعبـةٍ فيديـك=وانـا مالعبـي غيـر وقـتٍ تهيـالـي!!
.=.
من اول صحيح يهمنـي ذكـرك وطاريـك=وذا الحين نـادر ماتذكـرك فـي بالـي!!
.=.
من اموت اجيك ..واعيـش يـوم اجيـك=وذا الحين لا والله ترى بعـدك اشوالـي!!
.=.
من اول احسبن الحـلا ماستـوى الافيـك=وذا الحين حالي ,, مير ماعاد تحلالـي!!
.=.
مادام انت تعطيني جفا وش تريد اعطيـك=تحسبني ابا اعطيك فـي مـرك الحالـي!!
.=.
ابا انساك وابا احرق قصيـد كتبتـه فيـك=مثل مأنت محرقنـي كـذا يابعـد حالـي!!


أحسبك تمزح ..



الجسم كله جروحك والدواء بيدّك=عالج جروحك أو اتركها بما فيها
أرجوك لا تزيدها خلك على حدّك=مايكفي اعمالك اللي بي تسويّها
ماتدري أنّك ذبحت القلب من صدّك=واخذت روحي معك وأنا بطاريها
احسبك تمزح واثرك,اثرك من جدّك=ذبحتني بالمزوح اللّي تسميّها
زرعت فيك الوفاء لجل اجتني ودّك= لقيت كل المصايب منك لاقيها
حداني الحُب يمّك وأنت وش حدّك؟=توّلع النار فيني ماتطفيّها
هذي حياتي معك يالعنبو جدّك=والنار ماتحرق الا رجل واطيها
يمر نور القمر ذكرى على خدّك=واذكر جروحي من أولها لتاليها
وتصدّق أني على ماصار ما اردّك=طبع الليالي تعلمني بخافيها
اجرح/تكبر/ياحظ الكبر من قدّك=واذكر جروحك دخيلك لاتخليّها
ايامك اللّي تعدّت راجعه ضدّك=واللّي رفع سبع والآخرى موطيّها
لا بد به يوم تندم فيه لا بدّك=وتقول:عطني جروحك لجل أداويها!!



( الذيب والجني )



حبيبي لا توصّيني على حبُّك تراه أوكيه=أنا ظنّي على ظنّك عسى ظنّك مثل ظنّي
أحبك ليه؟مدري ليه؟ أحبك لا تقولّي ليه=أخذ قلبً بصدري وأساله ويجاوبك عنّي
ليا منّك سألته قال (يالبّيه يالبيّه)=ولن قلت الّه ليه تحبّني؟ وأخبرك..قابلنّي
هذا قلبي وهو قلبي وأنا اعرف كل شئً فيه= وحبُّك قطعة ً منّه وقلبي قطعة ً منّي
لأنه لو حكى من صبح لين الصبح ما يكفيه=ولو أنّه يبىِ يعلمّك يالمملوح علمنّي
ولو الصحْراء دفاتر والبحر حبر القلم يفنيه=يسجّل قصتك ماتنتهي ويصيح ويغنّي
هلا باللّي عشقته عشق من رأسه ليا رجليه=هلا باللّي حمس قلبي بحبُّه حمسة البنّي
هلا باللّي يوصّيني على حبُّه كثر ما أغليه=كثر ماقول (أنا) أحبّك..كثر ماهو يقول (أنّي)
محبته العزيزه ماتحدّد مير هيه وهيه=لو أعطِ الذيب من حبّه شويه..صاحب الجنّي
وصار الذيب والجنّي على ماقيل قود أوكيه=وأنا خايف لا أولف بينها هاثم تأكلنّي



ما كنت أتوقع ..




ياحبيّبي والله ماكنت اتوقّع=إن الهوى قبل الدجيما..ذبح قيس
يالين حبُّك داخل القلب وقّع=وتحرّكت فالقلب كل الهواجيس
نغمات قلبي..صوتها قع قع قع=أتقول..(دبك الخيل).. فسباق فرّيس
أو صوت شون الشايب اللّي تهقّع=مضرم على الغليون..ويدوّر الكيس
بغت خلايا المخ عنده تفقّع=وبعد لقي كيفه..تعوّذ من أبليس
وجروح قلبي كارثه ماترقّع=وعلاجها ابعد من..بعيد المراميس
وأنا أشهد إن الحبُّ بلّوى واوقّع=بالعشره..أبصم فوق بيض القراطيس
اثر الهوى سمً ذحاحً منقّع=واكبر ضحاياه الدجيما بعد قيس!!


( الحب ملعون الثواء )


البارحه قلبي من جروح الليالي منزوي=وهموم قلبي سارحه وهموم قلبي ضاويه
وا ونتي ونّة صويبً فالخلا ماله خوي=والليل موحش والذياب الشهب حوله عاويه
من لوعته ماغير يقنب من صوابه ويعوي=لا من مجيب ولا منادي فالديار الخاويه
والبارحه ليلي سهرته والهواجيس سروي=وبيني وبين الموت ماقالوا شعرة معاويه
ياطول ليل البارحه طولاه عيّا ينطوي=اقوم واجلس وانتقل من زاويه في زاويه
واحظي اللي كل ماقلت يتعدل يلّوي=واليا عضدته طاح من فوق الوطى متساويه
في كل يوم اقول بكره صبح يمكن يستوي=واثر الامل مفقود وآمال المولّع غاويه
اطرد سراب القيض واقول آجد الماء وارتوي=تايه بصحراءً مابها غير الغصون الذاويه
وقلبي ماهو بضعيف لين ينوشه الحب القوي=والحب سلطان القلوب وكل نفسً هاويه
الحُب ملعون الثواء بالخُص لا حب بدوي=يشيله الحُب للسماء ويدردبه فالهاويه!!


( الحب عذاب )


حبيبتي للشْعر تسعين باب=وأنا باقول الشْعر وأنتِ أسمعي
وارقى بشعري على متن السحاب=لمعنى الفرزدق وبحر الأصمعي
لا فكر وقّف ولا طاروق شاب=مير أسمعي يابعد عمري وأعي
هاكِ من الشعر مالذّا وطاب=من هيض مخلوق فيك مولّعي
الحُب ودّا كليب اليا الصعاب=وخلاّه يقطع رقبة التُّبعي
يا..مهجة القلب, يا..حمر الرقاب=يا..يُذبح الذيب ولاّ يشبعي!!
وقيس الملوّح وابن غانم ذياب=شواهد الحُب ننعاهم نعي!!
وأنا بأقدّم سؤالً له جواب=سؤال وإجابته تسعى سعي
قلبي معك ذاب..قولي كيف ذاب؟=سواة ماقلبكِ ذائب معي!!
قد قالوا العاشقين الحُب عذاب=وأنا اعترف لك واوقّع باصبعي!!


( عشق بدوي ) ..



يابنت حنـا لاعشقنـا عشقنـا ماهـو رشـاش = لاصـار ماهـو وابـلٍ ثجـاج حرّمنـا اللقـاء
لن كان مانروى عشـق والله مايغرينـا النقـاش = نرحـل وحنـا ماتزعزعنـا مراويـح الشـقـاء
حنا بدو نعشق على وضـح النقـاء والاّ بـلاش = ترى البدو مايعشقـون الا علـى وضـح النقـاء
يابنت واحدنا ليا حاش المراجـل حاش..حـاش = يابنت واحدنـا ليـا منّـه رقـاء يعنـي رقـاء
أن مات مات بعز وأليا عاش فوق العـز عـاش = راس بـدويٍ عـن مقابلـة الشدايـد مـا اتقـاء
يابنت وجدي وجد رجـالٍ توجـد فـوق مـاش = واليا هقاء بالوجد يهقـي ميـر كنّـه مـا هقـاء
يابنت ياللحم الطري اللي على العظـم النشـاش = شوفي ملافيح السمـوم اللـي بوجهـي تحرقـاء
يابنت ماشفتي النعومـه وش تسـوّي بالفـراش؟ = حتى على انور الكهارب مات والمـوت امحقـاء
يابنت قلبي من غرامك من زمـان العـام طـاش = قلـب بـدوي ٍ مايغيّـره الـزمـان ا لأبـرقـاء
قلبي وأنا ادري به ليا منّه عشق يعشقـك كـاش = وأن ما ستقاء من غيث حبك مات ظامي ما استقاء
يابنـت قولـي (مرحبا)قلبـي معاليقـه عطـاش = ولأني بـعيضه كان ماقلك (يـدوم الـك البقـاء)


(ضرس العقل ) ...




اه من ضرس العقل فيه شر وفيه سوس=شق راسي وامتحنّي وصملت اخلعه
ماهتنى بالنوم راسي ولو عيني تهوس=والسبب ضرس العقل..ياعسى الله يقلعه
وأشهد أن العافيه نشتريها بالفلوس=(والسعه لابارك الله فالضرس السعه)
رحت مستشفى(......)وقالوا فيه موس=وفيه زراديةً كل خافي تطلعه
قلت اخافوا ربكم يامعذّبة النفوس=يالطبيب ايش الكلام الذي منك اسمعه؟!!
قال:روح للسستر ورحت للبنت العروس=ويوم شفت المترفه طاب ضرسي ووجعه
ماحلاها هانم(ن)شغلها قلع الضروس=اقلعة ضرس العقل واقلعة عقلي معه!!!


ترى ملوك الشعْر ..(مستور وحبيّب)=وترى هل الشعر دايم (ربعي عتيبه)!!


يامحمد أزعلت ابو مشعاب وحبيّب=شاعر سليم الكبير..وشاعر عتيبه!!
اللي ليا غنّوا الطاروق ماشيّب=معنى ..وفكره..وقافيّه..وترّكيبه!!
بغيابهم كنْ معنى الشعْر متغيّب=وبوجودهم يرجع المعنى من الغيبه!!
معناهم اليا ابعدوه..يعوّد قريّب=واليا اقربوه ابتعد.. ما واحد يجيبه!!
كم واحداً لا قربهم صار متهيّب=ترعد كفوفه..ولا تثبت عراقيبه!!
يوم ان وضع الشعْر ماهو بمتسيّب=وهالحين كلاً يفتل رؤس أشانيبه!!
اللي ماهو ذيب..صار اليوم متذيّب=ويرتاع لا مرّ بالنير ..وذكر ذيبه!!
شاعر ليا قام في ماقفه ماخيّب=واللي يخيّب لو أنه قام..والخيبه!!
الطيب تلقاه عند الصاحب الطيّب=طيبً بقلبه.. وباقي الطيب في جيبه!!
و(الفكره البكر)..غير (الفكره الثيّب)=قدام لا نشوف(غسان)وتلابيبه!!
ترى ملوك الشعْر ..(مستور وحبيّب)=وترى هل الشعر دايم (ربعي عتيبه)!!


اقتباس:

المشاركة الأصلية كتبت بواسطة عيضه الثبيتي (المشاركة 1103390)
قصيدة تشرّفت بإلقاها في حفل زواج ابناء الشيخ

فهد بن سعد الثبيتي


:
:
:
:

الكيف الأشقر دايراً فنجـــاله=والعود الأزرق يافهد يبراله
هذي عوايد من يعز ضيــوفه =والطاله اللّي مابعدها طاله
الضيف يسمع له مية ترحيــبه=من مشيه من الباب لين الصاله
وقدامه تقول الضباب الشتـوي=وهوه مغير الطيب مع شيّاله
واللي مايدري عن عوايد ربعي=يمكن عن اللّي قبله يورّ اله
جمّلت ربعك ياعريب المنسـب=واللّي سواتك جمّل الله حاله
والله يجملني بشعــرٍ وافـي=ماحداً من الشعار قبلي قاله
ولا أودّي أطوّل بسرد مدوحي=لو أن مدح ابن سعد يبقى له
وأن طاعني ياعزوتي بسم الله=سوّيت لي ديوان فيه لحاله
حضرت أبارك لك وفاء وحميّا=وتعيش يامن طيّب الله فاله
وأستاذنك بأرحب بضيفــانك=ممّا يشرفني بهذا الاّله
يامرحبا باللّي حضر واحيّـي=عد السحاب اللّي رزين خــياله
شرفتوا المحفل وشرفـــتونا=واللّي يجينا بالوفــــاء جيناله
حنّا ثبيت أهل الكرم والنخـوه=مرجع عزاةً تلطم العيّاله
وأهل الثلاث البيض من ماضينا=وافين حنّا والوفاء حنّا له
ودخيلنا يامن تحت هيبتـــنا=ونؤمّنه في حلّه وترحـــــاله
وخوينــا لن مالت ابه الدنـيا=ناقف بجنبه مايميــــل عقاله
وقطيـرنا ما كنّـه ألاّ منــّا=وإحلالنا وقت اللـــزوم إحلاله
وأكبر فخـر لثبيت في هالدنيا=أن الرسول يعـّـــد منّا خاله
والمعذره لن جاء قصورًا منّي=ياحضرة النقّاضه الفتاله
هذي قصيدة شاعراً مستعجل= العصر كاتـــبها على جواله
وصلوا على محمد شفيع الامّه=وصلّوا على أصحابه جميعَا وأله


اق///أقا

ضاق الفضاء والخاطر الولهان ضاق=والليل في تاليه وسهيل أتقا!!
والعين طاولها السهر مُر المذاق=والنوم أنا ويّاه ما حنّا أصدقا!!
والحظ عيّا لايقاد ولايساق=والحمل كبر الضلع..يا حمل الشقا!!
ياكثر مابي من محبّه وإشتياق=مير الزمان اللّي حداني لا سقا!!
ماني مغنّي فالمزاين والنياق=والبشت الأسود والشماغ الأبرقا!!
أهل المجامل والمهايط والنفاق=واللّي لقا له شي واللي ما لقا!!
بيني وبين الصدق عُشره وإتفاق=ويامرحبا عمّة يدوم الك البقا!!
والبارق اللّي كنت أحسب أنّه حقاق=صدّت مزونه شرق والقيظ أمحقا!!
يامهجتي وأنا عليّه بالطلاق=أنّي بغيت أموت مير الله وقا!!
طال الفراق اللّي همومه ماتطاق=واللّي توضّح لي على وضح النقا!!
:=:
:=:
:=:
أُمّا اللقاء اللّي يبري جروح الفراق=وألاّ الفراق اللّي ما من عقبه لقا!!

:
:
:
:
اللي من اول مايعرف البشت

لا عشت ياوقت العجب لا عشت=أهل البشوت اليوم مرتاحه
واللّي من أول مايعرف البشت=يطمر على(المرقاب)و(الساحه)
ويقول أنا فوق العرب كوّشت=بشتي عليه عطور فوّاحه
وعلى الشيوخ الباقيه همّشت=ماشفتوا(الأقشر) ومسباحه
وألقيت لي كلمة وأنا ما أرمشت=وأعجبني الجمهور بصياحه
وأخذت.. وأعطيت ..وبعد ناقشت=أنحط فالحفلات مرجاحه!!
نعنشتهم بالحيل ..وأتنعنشت=وصفّقت بالرّاحه على الرّاحه
ويقول أنا اللّي قمت واللّي ششت=ما يدري أنَها طاحت الطاحه
لا والله ..ألاّ بيّضت في طشت=للي من أول ..نعرف إمراحه؟؟
ياراعي الأغنام ياما حشت=وكلابك الطوقان.. نبّاحه
خيّشك وقتك صح وأتخيّشت=مير الليال السود فضّاحه
تحمّد النعمه بعد كرّشت=وأخذ لك من (سليب)طُرّاحه
أنته من مدوح العرب وش نشت=لا يغرّك الكذّاب بأمداحه!!
أبلشت عمرك يأجودي وأبلشت=حتى بني زهران فالباحه!!
العام لن جوك الضيوف أنحشت=ياكبر قفلك..كيف مفتاحه؟؟
واليوم صاير شيخ لابس بشت=وتموت فالمرقاب والساحه!!


شارع شهار




ياهاجس الشعر حضّر والقصيد أسرجه=يالين تغدي بيوته مثل قّـُحص المهار!!
الشعر من شاعره والفلم من مُخرجه=وشمس الحقيقه حقيقه ماعليها غبار!!
ياهاجسً في سما أبداع الشعر معرجه=حلق بنا مانبي طياره ولامطار!!
والوصف حاول على ماشفت تستدرجه=في واحدٍ يوم قبَّل فالطريق أستدار!!
واقفى بمشي الدلاعه كن فيه إعرجه=من ميلةٍ فاليمين ..وميلةٍ فاليسار!!
لين أعترض له رصيفً فالطريق أحرَجه=يا الّليل يرخي سدوله..يا يبين النهار!!
ولا زدت غير أندهاش لدهشة التفرجه=والمدرسه..بابها مابين جنّه..ونار!!
مابين طلّة قمر16فوق أدرجه=ومابين غيبة قمر16 خلف الستار!!
والشارع من المحبّه ينتظر مَخرجه=ورصيفه يقول:ياصَبري على الأنتظار!!
والصبر مهما يطول..الله سريع أفرجه=اصبر وربَّي يسهّلها ياشارع شهار!!
وأنا على البال ماباقي كلام أهرجه=ألاّ عسى الأسئله صح/وخطأ/وإختيار!!
وأن كان للزين فنظام الدروس درجه=يأخذ 100من100في صالة الأختبار!!

رسالة شعر


يامكثر رخا الدنيا لكن الحياة ظروف=وبعض الظروف يضيع معها الرخا كلّه
والإنسان دايم حالته بين أمان وخوف=لو يقول: قلبي من حجر ماعرف الذلّه
يفل الحجاج سنين فلّه بغير وصوف=لكن الليال السود ماكلها فلّه
تتوه الخواطر لين تخرج عن المالوف=ويلعب هوى الدنيا على الدين والملّه
ولو طالت السجّه خطوب الزمان تحوف=الايام تهمل للبنادم ..ماتمهلّه
أقف ناظر الدنيا..تشوف الشهود وقوف=بعينك تشوف..شهود وثبوت و أدلّه
أخذ لك من الدنيا عبر والعيون تشوف=ولا تطيع نفسك فالمعاصي وفالخلّه
تراها ماتنفع..ليت..ولاّ لعل..وسوف=وسوف الغشيم يقول ..ليته ولعلّه
دروب المراجل بيّنه والتعب مخلوف=ومن واصل يدوّر على شي ياصلّه
تخيّر من الأصحاب قومٍ ماهم بضعوف=ليا احتجتهم قالوا على طول:بسم الله
على جنبك دروع ..وبوجه الزمان سيوف=وحصنٍ على راسك يشوق النظر ظله
ترى مايزيدك في حياتك غبن وحسوف=يقع شوفت أصحابك من أيداك منحلّه
وخلّك مسامح..وأترك اللّي يطوف يطوف=صغير الأمور..افهق عنْه لا تعين لّه
ولن جتك زلّة راعي الطيب والمعروف=ترى طيبه ومعروفه..يضيّع الزلّه
ولا تجادل الجاهل..ولا تتبع الملقوف=صحيبٍ دواء ..وصحيب ياتيك بالعلّه
وصحيبٍ عسل..وصحيب تلقاه سم الجوف=وعلى الأول أحرص زين ..والثاني افطن لّه
رسالة شعر..ماهي مجرّد نقط وحروف=وعلى الخاطر اللّي يحفظ العلم بسم الله

:
:
:

قصيده متواضعه مسندها لأخي /معدّي المرقاب الذي لاعرف منه ألاّ لقبه فقط(معدّي المرقاب)



.

.

.

.

.

.

يامعدّي المرقاب عدّ المراقيب=مادامت العليا هواك وهوايه!!
ميعادي وميعادك بمرقب الذيب=ومادمت قبلي ماتلفت ورايه!!
أنت الخوي اللّي على العزّ والطيب=ياليت مثلك لو ربع خويايه!!
ماهو بنقص..وقصرةً فالأصاحيب=لكن وين اللّي سواة المرايه؟!
ايعد مابك من جميع العذاريب=مايتركك بين العذاريب تايه!!
ويحْدَاك عن سكَّة هل الشك والرَّيب=حتى تعوّد عن طريق الغوايه!!
ياطوال الأيدي/ياطوال الأشانيب=الطول والله//طالة ً فالهدايه!!
ولو تؤخذ الجنّه برؤس المشاعيب=كان أصبحت لأبو جهل فالبدايه!!
يارب عفوك/وأعفْ ياعالم الغيب=عفوك وغفرانك مناي ورجايه!!
وأنا بنادم وأخطي أحيان وأصيب=وأعرف صوابي//وأعترف في خطايه!!
شاعر ولا يصرا قصيدي من العيب=وذنوبي أكبر من ضلاعين سايه!!
ياما وصفت من البنات الرعابيب=وياما نسجت من الحقيقه روايه!!
مليت مُخّي من قصيد اللّواعيب=وقصايدي وصلت ثلاثين مايه!!
ياليتني يوم القوافي مهاذيب=ما أقول بيت / ألاّ وأغيّب لي آيه!!
يمدي حفظت كتاب ربّي بترتيب=لكن ما واحد عطاني وصايه!!
واليوم أوصّيكم بحفظ المواجيب=وعلى العلوم الغانمه يازملايه!!
والخاتمه مابه عن القبر تجّنيب=ويالله بحسن الخاتمه فالنهايه!!



:

:

:

:

:


عيضه بن معيوض الثبيتي

/

/
/

[قصيده مهدآه إلى أخي الشاعر /مهلّي بن عاصي الغنامي]



ودّي بقوم المزاين لجل أغنّي فيها=مير راحوا عند شعّار النبط قدّامي
ما بقي في نجد وبالٍ يسوق نياقه=غير عنده شاعرين/ومنشدٍ /وإعلامي
يمدحون وينشدون ويظبطون الخطّه=والقناه تبث والتّصوير شغله حامي
ياولد قشعان/يافنجال/يابن حجنه=يالطهيمي/ياولد عبّود /يالفصّامي
ابشروا حصّلت منّقيه ماحد يعرفها=في طرف كشب الموالي جنب حيدٍ زامي
وضح يوم تشوفها وأنته عليها مقبل=كن قدامك عماير زيّنت برخامي!!
وكنّ وقفتها جيوب وقوف في تويوتا=ما بعد حطّوا لها اللوحات والأرقامي!!
والرقاب الجرد سبحان الذي سوّاها=كن داخلها مواصير ٍ بدون لحامي
فاهقات ظهروها ومن الشحم مليانه=والغوارب ناسعه والرؤس ما تنظامي
من غلاها مانزلت للماقفه مجلوبه=ولا يمّر ولا يدوّج حولها السوّامي
مقتنيها اللي عليها ما بخل برياله=ولا عليها شح مهما شحّت الأيّامي
وان نشتدوني ياقوم البل عن راعيها=ما ملكها ألاّ مهلّي عاصي الغنّامي

:

:

:

:

:

أخوكم /عيضه الثبيتي
[/quote]




قصيدة تجاوزت الحدود الحمراء...





وأتت هكذا..



الله على اللّي وراها مثل/شط الحوار=اللّي غذاه الطهيمي /لين ظلاّ يميح!!
اليا اقتفاها الهوى/ خطرًا يطق الزرار=وخطرًا على ال......؟/ من التضايق يطيح!!
تمشي ماتدري تروح يمين/ وألاّ يسار=كل الإشارات تشر/ للطريق الصحيح!!
لوشافها أكبر مطوّع يوم طبّت شهار=ليصيح ويونّ/ والشارع يون ويصيح!!
بنت الأكابر وأهلها رؤس قومٍ كبار=ماتركب ألاّ على آخر ماركات الجميح!!
سواقها مثل غدراء الليل/وهْيه نهار=وأطيابها ماتبي ياكود نسناس ريح!!
فيها دليل أن أبوها من شيوخ العقار=ردوفها ضاق منها الباب/وهوه فسيح!!
والخصر لا من تمايل/وأنثنى /وأستدار=أتقول:أبوها البخيل اللّي عليها شحيح!!
من ملحها/تختصر ملح الحلا بإختصار=كأن ماغيرها..فوق البسيطه مليح!!
راحت عيون البشر فيها تقادح شرار=وأنا فوادي عليها قام يقدح قديح!!
ولّعني بليس فيها لين ولّعت نار=يابليس لن ماذبحتك ..ماعرفت أستريح!!




شاعر المعنى



يالهاجري يالسناني يالزلامي رشيد=زيدوا كراسي ثنين وماصةً ثانيه!!
وجيبوا مطّوع/ودكتورًا علاجه مفيد=وتجمّلوا والدواء خلّوه مجانيه!!
واستفزعوا مصلح وملفي وتركي وزيد=والعازمي /وابن ريفه/وابن عتقانيه!!
يعلّمون المجنن بالكلام الأكيد=الشعر ماهوب يادانه /ويادانيه!!
واللّي مايفهم لعلّه عند خضر الجريد=حتى جنوبه تصير أشكال وألوانيه!!
ثلثين من مرّكم مايوثقه كل قيد=والثلث الآخر لهم حجّه وبرهانيه!!
والشاعر المعتبر لو كان وجهه جديد=يسلم لسانه عدد مادارت الثانيه!!
والشاعر اللّي ما عنده غير كثر الهبيد=ما أبتعذّر منه لو كنت غلطانيه!!
ولا تلحقوني ملامه والملامه بعيد=لو ما الحياء ..كان قلت فلان وفلانيه!!
ياللجنة الشعر/جوكم مبتلين القصيد=كلاً معه تسعه وتسعين شيطانيه!!
أغراهم المال والشهرة وحب النشيد=وجاتك على المكرفون/تجر الألحانيه!!
وقوفهم قًدمكم /فعيونهم يوم عيد=واشعارهم دانيه/ووجيهم دانيه!!
من أمس مالي يكود أضحك وصبري شديد=أضحك لو أنّّي من اللّي شفت زعلانيه!!
ماكنّي الاّ متابع مسرحية صعيد=أتضّحك اللّي من الأيام زهقانيه!!
والمشكله لا أقبل الصيف وحصل ما نريد=وتناخوا أعيال بقعاء نخوة أخوانيه!!
وتطامروا فالملاعب طمر.. من كل حيد=لو كان قدم العصيمي وابن جدلانيه!!
وممّا تشوف العيون من الزمان العنيد=أشوف مالا تشوفه بعض الأعيانيه!!
مايندر ألاّ النشاما/والمهبل تزيد=فالعالم الباقيه/والعالم الفانيه!!
ومسابقة (شاعر المعنى) الدليل الأكيد=واللي مكذّب يشوف النسخه الثانيه!!





يابن سعيّد وقــّفت بي على الموت

يابن سعيّد وقــّفت بي على الموت=ماهي بتوقيفة رشيد الزلامي!!
البحر فه الّدُّر واللؤل والحوت=والمقبره فيها رميم العظامي!!
هذي ثلاث سنين والقبر تابوت=امكفنً فيه الهوى والغرامي!!
لكن جرّ الصوت ياطيّب الصوت=واقنب قنيب الذيب واسمع كلامي!!
قافٍ من جبال السروات منحوت=طرى عليّه قبل وقت المنامي!!
وأسندت يمك بالعدد عشرة بيوت=تاصلك قبل النور يجلى الظلامي!!
الشوق يحداني على جوّ بيروت=وأنا على بيروت جيعان ظامي!!
لكن فات الصيف ..لعلّه يفوت=وأنا مع التهمان كنّي تهامي!!
ول يابلآد الخوخ /والتين/ والتوت=الدرب شام/ وبارق الخير شامي!!
فكّر بها ثم أعطني علم مثبوت=وأسلم وسلّم يارفيع المقامي!!
وسلّم على /الشاطئ /وسلّم على /الموت=وسلّم على/ الشاعر رشيد الزلامي!!

[align=center]



مساكم شعر..



نصيحه لعلها تروق لكم..



:

:



الكامل الله لا تحسّبك كامل=يابن آدم أسمعني ..سعادة فخامتك!!
روح أعرض أخلاقك على ..فحص شامل=وإن شانت أخلاقك..مافادت وسامتك!!
دنياك من كثر المقادير حامل=وقبل شديدك/ شوف وش لون إقامتك؟
لا تخلفك يابن الحلال العوامل=وأحفظ حقوق الناس/ تحفظْ كرامتك!!
والناس ماتبغى منك يوم تامل=ألاّ سلامك ياجودي/ وابتسامتك!!
ولو أن مابين الأوادم تكامل=يمكن على رأسك ماتلزم عمامتك!!
وزامل لكن أعرف بعد من تزامل=وأعرف صديقك كان الأيام ضامتك!!
ياصاحبي: بقعاء مافيها فرامل=وفيها اختباراتٍ تبيّن علامتك!!
خلّك على كسب النواميس صامل=والطول فاليمنى/ ماهو طول قامتك!!
واليا غدت كفّك مزونٍ تهامل=تشوف فعيون النشاما زعامتك!!
وسوق الوفاء للناس سوق الزوامل=ويبين قدرك/ عند عارف شهامتك!!
والناس جاملها /ولو بالأنامل=ألاّ على الحق /لا تجامل بكلمتك!!
من أول أكبر عيب كان المجامل=واليوم لو ما اتجامل الناس.. لامتك!!
أضحك/وجامل/وأحسنْ من التعامل=وخلّك مسالم فالحياه// وسلامتك!!



:

:

:

محبّكم/

عيضه الثبيتي







سلام عليكم



أسعد الله صباحكم..





تقبلوا هذه الأبيات..







الله من قلب ٍ تجدّد حسافته=من يوم ما بعض الهواجس حافته
وقت ً يصارعنا وحنّا نصارعه=مدري يعافتنا وحنّا نعافته
مير الأكيد إن الزمان متغيّر=وقت ً على العقّال يامكبر أفته
الزور صارت كلمته جاهريّه=والحق صارت كلمته شبه خافته
ولو الخطاء ينشاف في شدّة الضحى=ما كنّها عيون المخاليق شافته
تلقى مع المخطي عبادًا تدفّه=هذا يصفق له وهذا يخافته
مسافة الشّر فآخر الوقت قرّبت=والخير بين الناس طالت مسافته
ما كن فقلوب البشر خيفة الله=لا قلّل الله جوف قلبي مخافته
الطيّب أحبّه ولا أمل رفقته=وألاّ الضعيف أشد ما أكره ضعافته
جرّبت فالأيام والوقت مدرسه=وعرفت بإن الرفق عزّه نظافته
كم واحدًا كلمة نعم ماتطوفه=وكم واحدًا حتى الفناجيل طافته
وكم صاحبً يضحك ويظهر بشاشته=والنكت الأسود داخل القلب كافته
ليت الرخوم وسومها في وجيّها=ويكتب على بيوت المهابيل لافته
حتى ليا جات الطراقي تزلّها=والنفس لا عافت لها شي عافته





أخوكم/

عيضه الثبيتي

12/4/1432هـ

اللهم صلّي وسلم على رسول الله



إليكم عشاق حرفي:-



رسالة تتحدّث عن نفسها



/

/



ياحبّي اللّي محبّتكِ بليّا حدود=لاماك جنّه وبُعدك عن عيوني جحيم
لا جيت يمَّك كأن الدرب كله ورود=ولا أقفيت ما كنّي أطا غير شوك الهشيم
ياصبر قُل للهوى:كم هزّ شجرة وعود؟=عسى الإجابه تصبّرني وأنا مستظيم
الحظ دربه عوج /ووجيه الأيام سود=متى على الله تنوّر ..والعوج يستقيم؟!
ياجعل يوم الفراق وساعته ماتعود=ويكرمني الله بميصالك وربّي كريم
عليّه أجود في حُبّك وقلبي يجود=جود المطر يوم تقبل به هبوب النسيم
وعليك تشريع قلبك كل ما هب نود=وتستقبلين المحبّه كل ما صب ديم
أقبلت كلّي وفاء/وأقفيت كلّي عهود=ولا زلت باقي على العهد القديم القديم
ماينقص العمر ساعه/غير حُبّك يزود=وأخر دقيقه بعمري حبّك يصير تيم!!
أقل ما أقول عن حُبٍّ وجوده وجود=ماهو بالأعظم/لكنّه فالحقيقه عظيم
لو أن حُبّي يحوّل في قلوب الهنود=ماكان يلقون هندي في بلادي مقيم!!
ولو ان حُبّي يحوّل في قلوب الزيود=لتجنّب القات وتعشق الطريق السليم!!
ولو ان حُبّي يحوّل في قلوب اليهود=ماكان في غزّه تشوفين دمعة يتيم!!

وسلامتكم



محبكم/عيضه الثبيتي

29/12/1423



مساكم شعر..



جديدة عسى أن تروق لكم وتشفع غيابي يالغالين

/

/

/

هموم صدري جوف صدري تعاوت=عوي الذياب/وعوي طفلاً مدلّل!!
وجروح قلبي مبطيه ما تشاوت=والهمّ مابين الضلوع متسلّل!!
والرحله اللّي لأشهب الوقت خاوت=طالت وعيّت بالنجاح أتكلّل!!
ياكثر مانفسي تمنّت وهاوت=وأصبر على مابي..وأكبّر وأهلّل!!
يلذع بقلبي مثل لذع الكتاوت=في موتر ٍ من سوق صنعاء مفلّل!!
عليَّه ظروف الليالي تقاوت=وحلّلتها لكن عيّت تحلّل!!
الناس وحده/والحظوظ أتفاوت=والله يعين أهل الحظوظ المعلّل!!
والموت والدنيا لا منَها تساوت=موت الكرام/ولا حياة المذلّل!!
فالهاويه ياما الأماني تهاوت=والحظ منه/من الزمان متملّل!!
لن شت لي ضربة جزاء طلعت أوت=ولن جبت قول..يصير قولي تسلّل!!



م

ح

ب

ك

م

عيضه الثبيتي




مساكم شعر..

قصيدة القيتها في حفل دعم وتكريم شاعرنا/علي بن فلاح العضياني بمناسبة تأهله في مسابقة شاعر المعنى..بحضور الشيخ/صنيتان الظيط..

:
:


يا هاجسي بسم الله الرحمن=حضّر معي ثم أعسف القيفان
دوّر من أجزال البيوت أسمنها=والك عليّ أن العلوم أسمان
عزيمة العضيان ما ننساها=باليوم والتاريخ والعنوان
ومع كثرة الأشغال مايعذرني=حتى لو ألقى لي عذر مليان
واجب خويً مع خويّه ياقف=ناقف مثل ما تاقف الضلعان
علي فلاح الشاعر المتميّز=في واجبه ناقف كما الاخوان
الشعر من عنده وصح لسانه=والدعم من ربعً طوال أيمان
عتيبه الهيلا ليا صحت الها=قالوا سوا بسم الله الرحمن
وبسم ثبيت أهل الوفاء والطاله=لمرجحين الوزن والميزان
سلام رديّه عريبة منسب=واسم الثبيتي فوقها برهان
تدور للحضار دور الدلّه=اليا أستدارت دلّة الرسلان
وفنجالها الأول بليا قاصر=ينساق لك يالظيط ياصنيتان
والدول من يمناك يمشي يمشي=للّي حضر من ساير العربان
ياصل سلامي كل من يسمعني=لأهل المحل/ والرّبع/ والضيفان
ويثنى لك الفنجال يابن محمّد=لأنّك ليا جات اللزوم حصان
تاريخك وتاريخ أبوك وجدّك=وتاريخ أهل عمهوج والعضيان
علمً يشرفني ليا عدّيته=وعلمً يشرّف ربعي العتبان
لو ننشد الاتراك عن وقفتكم=رمت طواقيها وقالت وأن؟!
يقلون فاسطنبول تنشد عنكم=تبى تشاهد سيفكم شامان
كنه مروّعهم على ماسمعوا=ممّا حصل في ساحة الميدان
وتبى تنشّد عن عدد موتها=وتأخذ عبر ودروس بالمجان
وألا القضاء ياعنك مايمديهم=مادامت ابن سعود فالأوطان
حكامنا وأعزّ من يحكمنا=أهل الكرم والجود والإحسان
مليكنا عبدالله وعبدالله=مع طالة يمينه وسيع بطان
يعيش ابو متعب زعيم الأمه=ويالله تحفظه ياعظيم الشان
ويرجع لنا سالم معافا طيّب=ويكون عيدًا من قبل ما كان
هذاه أبو متعب ملكنا الغالي=اللّي عضوده نايف وسلطان
عيال عودًا ياعساه الجنه=ملوكنا لا عدّوا الشجعان
وختامها على محمد صلّوا=والشكر والتقدير والعرفان


/
/
أخوكم/
عيضه الثبيتي


إليكم عشاق حرفي

بدون مقدمات

حمامة أشعاري على البعد ناحتك=على ضلوع ٍ مثل لَدن الغصوني!!
وحروف شعري يوم قفّيت صاحتك=صيحة صويبٍ ذاق حرّ الطعوني!!
أنا أشهد أن القلب كلّه مساحتك=ولا ضاقبك قلبي/ولو ضاق كوني!!
ياما معاذير السماح أستباحتك=هوّنتها لكن عيّت تهوني!!
أرجع لتفكيرك /وراجع رجاحتك=حتى جنونك يستوي مع جنوني!!
و كان الهبوب لطاري البعد ماحتك=وعيّت ضعونك لا تلايم ضعوني!!
أقرب..وأبي أسولف معك قبل راحتك=وأسْمعْ لاهنْت/وخاطري مايهوني!!
خلّك على خبري طليقه فصاحتك=أمون فوقك وأنت مثلي تموني!!
بأصارحك وأسمع كذلك صراحتك=ماهو صحيح..أبي بشر ما يبوني!!
و مدام همّي في هذا الوقت راحتك=باريّحك كانك تريِّح بدوني!!
وتعال أبا اكتب لك على كف راحتك=بيت ٍ يخلّد لي/ ويشفي غبوني!!
ماتذبحك من قمّة طويق طاحتك=تذبحك والله طاحتك من عيوني!!


أخوكم/عيضه الثبيتي


مساكم شعر...



قصيده عن غلا الحلال والشعير..



يقوووووووووول:-



طبّيت سوق الماقفه والهوى صلْف=وأهل الغنم مع غيبة الشمس صلفين!!
صدورهم تقول مبلوفة ً بلْف=والمشترى بيمين/والبيع بيمين!!
أتدوّخك من كثر الأيمان والحلْف=وسعر الشعير مزوّد الصاع صاعين!!
تقول:وين الربح مع كثرة العلْف=وعمّالها/والأدويه/ربحنا وين؟؟
ندلف لها ياللّي تبون الشحم دلّف=وأكثر حوايجنا من السوق بالدين!!
بعنا بهمها والجَنَب حشمة الخلْف=ونمسك سرى خلف التريله نهارين!!
والذيب كم يطمر علانا من الخلْف=والكلب ماينبح عيال السراحين!!
هذي سوالفهم من الياء ليا الألْف=وعلومنا حنّا تبى تجيك ذاالحين!!
حنّا من الكرمه قبل ضيفنا يلْف=نحوف كل السوق وندوّر الزين!!
فلوسنا فجيوبنا مالها ولْف=مأتالف ألاّ عند قنّاية الظين!!
وفالماقف المحرج وفالماقف الكلْف=نشرْ الذبيحه لو يقولون بـ ألفين!!
ومن يغلي الأسعار عساه بالتلْف=دعوه من المستهلكين المساكين!!
مادام ياعمّي تبيع الطلي بـ ألف=خلّك عساك تشيل كيسك بخمسين!!



أخوكم /عيضه الثبيتي

7/1/1432هـ



قصيدة تشرفت بإلقاها في إحتفالية زواج أبناء الشيخ/منصور بن عبود الثبيتي

الشاب /راضي بن منصور والشاب سفر بن منصور

يوم الاربعاء الموافق25/12/1430هـ



مافيه عن دعوة هل الطيب مجناب=بالخص لا جت من رفيق ٍ موالي
نرمي مشاغلنا الكثيرة ورى الباب=ونلغي مواعيد ٍ عراضٍ طوالي
تقدير/وإجلال لبني عمّ وأصحاب=أحضر واشارك مع كرام السبالي
وأن دق هاجوسي من الشعر هنداب=أنظم بيوت الشعر ممّا طرالي
واليا طلبتوني من الشعر ما طاب=ما أطيب من الشعر بزحول الرجالي
ومدحة هل الطآله عريبين الأنساب=أهل الكرم والجود في كل حالي
جيران وأخوان وبني عم وأقراب=كسّابة الناموس فأول وتالي
الآد راضي موفية كل طلاّب=أتشيل ما شالت ظهور الجمالي
أهل هلا ومقدّمة كل ترحاب=والضيف يقلط عندهم فالعلالي
فوق الشحم والطيب والجمر شبّاب=والكيف الأشقر من حلوق الدلالي
أهل وفاء وسلوم وعلوم وآداب=وأعد مايملي علي المجالي
عقب السنه شهرين قانون وحساب=سنّوه للعتبان هاك الليالي
ومشوا على ماقالوا الناس الأجناب=حيث الطلب غالي وراعيه غالي
دخيلهم لو هي على قطع الأرقاب=مايشتكي حتى الصبا والعوالي
واليا حصل فزعه وميقاف غصّاب=صفوفهم ترسي سواة الجبالي
من عزوة ٍ لاقيل منهم ؟للأعراب=أتقول (حرف الثاء) تحل السؤالي!!
الاد ثابت قبل عتبه وعتّاب=مرجع عتيبه محتمين التوالي
قادة عرب وقضاه حلاّلة أنشاب=وأهل النسب والشجره أم الظلالي
و وقت الفعول أن كشّر الناب للناب=قولوا لمن هو رامهم هملالي
لو الجبل رجّال لا شافنا ذاب!!=ولو البحر يدري بنا صار حالي!!
عدونا نسقيه سمً من الداب=وخوينا يشرب قراحً زلالي
أمدح بني عمّي واللي حق الأعجاب=ومن لامدح ربعه عسى مايلالي
وأكبر فخر لثبيت حاضر وغياب=أنه ربى معهم حميد الخصالي
وصلّى الله وسلّم على زاك الانساب=معّرب الجدّ وعريب الخوالي







عيضه الثبيتي














ديوان الشاعر المبدع / عيضه بن معيوض بن دبيان الثبيتي ..

@ـايل 04-Oct-2009 10:50 PM

عيضه الثبيتي .. اسم لامع في سماء النجوميه ..

صح لسانه على هذه القصائد الجزله ..ولاهنت يامحمد على المجهود الطيب..

سجّلوا اعجابي ..

..

خلف الروقي 04-Oct-2009 11:08 PM

اخوي محمد لاهنت

مشكورمشكور
مشكورمشكورمشكور
مشكورمشكورمشكورمشكور
مشكورمشكورمشكورمشكورمشكور
مشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكورمشكور
مشكورمشكورمشكورمشكورمشكورمشكور
مشكورمشكورمشكورمشكورمشكور
مشكورمشكورمشكورمشكور
مشكورمشكورمشكور
مشكورمشكور


دمت بود

الاصمعي 05-Oct-2009 09:08 AM

فعلا عيضه الثبيتي اسم يعد من كبار الشعراء
لم اتوقع أن اجد له ديوان مقروء ولكن الحمدلله خاب ظني
محمد العتيبي شكرا جزيلا على المجهود الرائع

فايز بن سرحان الثبيتي 05-Oct-2009 09:41 AM

الله يبيض وجهك يامحمد العتيبي



على الجهد الجبار الذي قمت به في جمع هذا الديوان



والشاعر \ عيضه الثبيتي

نجم لامع في ساحة المحاورة والنظم وقادم بقوة

نسأل الله له التوفيق والسداد



تحيتي لكـ

أبو مرحبا 05-Oct-2009 06:08 PM

عيضه الثبيتي

ماذا عساني ان اقول في هذا الشاعر الفذّ فعلا


بلا مجامله ولا تأخذني به حميّة الزمالة أو الصداقه ولكن هو شاعر عملته صعبه


مشكور يامحمد على هذا الديوان ونتمنى من أبو فيصل يكمل الديوان بجديده


فنحن بانتظاره

عيضه الثبيتي 17-Nov-2009 09:57 AM

الله يبيض وجهك


يابن مغيرق



وجهد تشكر عليه





تحياتي وتقديري

ابورازن فالمريخ 17-Nov-2009 10:04 AM

الله يبيض وجهك يامحمد العتيبي



على الجهد الجبار الذي قمت به في جمع هذا الديوان



والشاعر \ عيضه الثبيتي

نجم لامع في ساحة المحاورة والنظم وقادم بقوة

نسأل الله له التوفيق والسداد



تحيتي لكـ

خالد بن مورق 05-Dec-2009 05:28 PM

ونعم في الثبيتي قصائد جزله

ناصر حامد الثبيتي 06-Dec-2009 07:30 PM

ابو فيصل شاعر متميز ومبدع يستحق كل الاشادة وكل التقدير صح لسانه .
والله يوفقه بمسيرته الشعريه ويتواصل عطاءه وتميزه . وشكرا كل الشكر يامحمد العتيبي .


الساعة الآن »05:43 PM.

 Arabization iraq chooses life
Powered by vBulletin® Version 3.8.2
.Copyright ©2000 - 2021, Jelsoft Enterprises Ltd