بديّت ذكر الله واطاعت كل عوباً ماتطيع=جت لي على حسب الطلب رغبه بعد عصيانها
وقمت اتخير في نوادرها واقدم للجميع=مالاق من غالي جواهرها ومن مرجانها
اهدي واسلم واتكلم واستمع واشري وابيع=يالله في التوفيق والطاله وكسب رهانها
وامشي على وضح النقا وادخل مع الباب الوسيع=لهل الجمايل والجماله جيتي من شانها
من شانها للبكر احد الفكر وازل الرجيع=واهل الضعون الراحله مانزل على مرحانها
شاعر واللي نظره ولا ارضى غير بالقول البتيع=انقد بيوتي قبل لاتنقد واعرف اثمانها
من خوف ازل بكلمةٍ بكره يذيع ابها المذيع=واشتال شرهات الرجال اللي طوال ايمانها
واللي يمد الناقصه يشوفها في كل ريع=وان صد عنها بالنظر نبّوه قالوا عانها
يالله عسى بيني وبين الهينه سدٍ منيع=واجعل خصيم النفس عقلي لارقص شيطانها
الشعر ياشعار هزله هزل واخياره نفيع=اما سما بالنفس للامداح والا هانها
واليا اجتمع زين القصيد ورافقه زين الصنيع=بنابه الشاعر حصونٍ ماتهز اركانها
تفنى عظام المبدع وندّر حروفه ماتضيع=طول الزمن تفخر بها الصفحات في ديوانها
لكن في هذا الزمان اشوف لي عضبٍ ضليع=صالت وجالت والعوارف قفلت بيبانها
كلٍ مجود صوغته ويقول بالصوت الرفيع=اخاف لاتخلف شوايب هالزمان الوانها
شاف الضعيفه شوف فى النادي تلز مع الطليع=وقليلين العرف قاموا يمهلون ارسانها
اللي غزا بالصوت واللي جاك بسلوبٍ خليع=واللي نهب منا ومنا والامانه خانها
احد يقول انا وكيل العرف والشعر البديع=وانا الفرايد لاشتهيت اقنص واجيب سمانها
واحدٍ يصيح ويعتزي ويحدّر بطون التليع=غدتبه اوهام الظهور وراح في كرعانها
يده مثل ذيل عشراً مشوال والمنطق وضيع=يمرض كبود الناس ويعكر مزاج اذهانها
وشعرٍ بلا مضمون كومة ثلج لو تكبر تميع=تنقال واسرع من قرايتها يجي نسيانها
الشعر نصح ومدح واوصاف الطبيعه والربيع=وبوح المولع وافضل بيوت الشعر واعيانها
ماقيل في شكر الاله الواحد الفرد السميع=ومدح الرسول اللي هدى الامه وازل اوثانها
لارتبه شاعر حكيم وروض تفكيره شبيع=تطرب له العراف ويحرك ركود اشجانها
اما القصيد اللي هدف راعيه ميصالٍ سريع=عنه اقفل سموعي واله ناس تفك اذانها
وختامها يارب وفقني لما يرضى الجميع=واجعل خصيم النفس عقلي لارقص شيطانها
مع تحياتي اخوكم=ضاوي عايض العصيمي