يالله ياسامع دعاء كل محتاج = يامنجيٍ ذا النون من وسط الامواج
ياجاعلٍ دينك للامّات منهاج = ياعالمٍ بالسر من غير ما ابديه
تغفر ذنوبي يارفيع الجلالي = من كثرها راحت سواة الجبالي
مالي سوى رجواك عالم بحالي = كريم العطايا من ترجاك تعطيه
والبارح الهوجاس غيّر عليّه = ما ذقت حلو النوم لوهو شويّه
كنّه على قلبي لواهيب كيّه = ليا دك بي هاجوس فكري يعنّيه
(يزيد) انا ابوصيك واسمع كلامي = احفظ شورطه بالوفاء والتمامي
هاذي تجارب من تركها يلامي = واللي يوفّيها عن الغير تكفيه
احرص على مرضات ربك يعافيك = صل الفروض ان كان تبغاه ينجيك
وللوالدين احقوق ربي موصيك = ترى ما زرعت بتالي الوقت تجنيه
والجار اله حشمه وقيمه ومقدار = عند الرجال اهل الوفاء نسل الاخيار
والضيف دسم شاربه ماش معذار = قدّم له الترحيب والطيب قافيه
خويّ جنّبك لا تجيه المضّره = خلّه يقابل منك شي ٍ يسرّه
من واصل التعليم لله درّه = فالدين والدنيا مقامه يعلّيه
واصبر على الدنيا تراها غريبه = مره تجي سهله ومره صعيبه
واللآدمي ما يأخذ الا نصيبه = مكتوب رزقه عند ربه يمشيه
واحفظ لسانك لا يجي فيك خلّه = كثر الحكي للشخص نقص ومذلّه
راع النمايم جنّبه فيه علّه = وابعّد عنه لا تقربه تبتلش فيه
احذر صديقك قبل تحذر عدوك = باخص علومك عارف ٍ كيف جوّك
انشد كثير العرف والا انت توّك = كم واحد .اقرب ناس سبّة بلاويه
في وقتنا هذا رفيقك ريالك = يزيدون خلانك على قيس مالك
وان قلّ . ما منهم خليل صفا لك = كل ٍ يدور غايته لا تجازيه
اختار لك طيب من الناس ترضاه = ليا شان وجه الوقت مضمون تلقاه
من كبّ شورك لا يهمك تناساه = خله يولي لين وقته يربّيه
ابعد عن ديار القلوب السقيمه = اهل الوجيه السود واهل والنميمه
مقعدك فيها في حياتك ظليمه = ومن قارب الوجعان لا بد يعديه
واوصيك فاقرابك واخص القوارير = والا الصقور الها جناحين واتطير
واللي يقفي عنك هاذي مقادير = لا تتبع المقفي يبي الوقت يثنيه
من لا يعزك واش تبي به تعزه = جنّب قليل الخاتمه لا ترزّه
لو زان الك زوله ولبسه وفزّه = حقده ترى في داخل القلب يخفيه
هذا بعض ما شفت انا في حياتي = وابيك تاخذ ياغناتي وصاتي
واختم كلامي بالسلام وصلاتي = على خير مرسول من الرب هاديه

المشاركة الأصلية كتبت بواسطة أبن حشيان (المشاركة 1320797) متعب ثواب الجعيد صح لسانك على هاء المروبعه الرائعه والتي لم تقصر بها عن كل المواضيع الجميلة والنافعه اخي انا احييك على تمكنك الشعري والتي قليل ماء ان يتفهمه الجيل التالي والتي تفهم شعر الحداثه اكثر من الشعر الفصيح والنبطي تقبل مروري واعتزازي بك

المشاركة الأصلية كتبت بواسطة احمد منير الواصل (المشاركة 1320799) صح والله لسانك اخوي متعب قصيده فيها من النصايح والحكم وقليل من الشعراء يجمع بينها الا شخصك سلمت ودمت

المشاركة الأصلية كتبت بواسطة محمد@الجعيد (المشاركة 1321000) صح لساااانك يابو فهد على هذه الشامخه بشموخك طال عمرك

المشاركة الأصلية كتبت بواسطة فيصل مطر (المشاركة 1321150) صـح لسانكـ