سالفه تطري علي ولاتزال = كل مافكرت ناويها نسيت
مالها وقتاً معين أو مجال = ترجع لفكري ليا مني سليت
المهم أني تناسيت المحال = واطمح لشياً يحقق مابغيت
من هواجيسي تكلفت الجدال = لاتولع خافقي كني هجيت
علمتني دنيتي حل السؤال = وأقطع الشاره ليا مني رميت
عزوتي لاقلتها بأخو العيال = استعد الها مثل وقفة كميت
نور شمسي ماتجاريه الظلال = من صغر سني ويوم اني حبيت
الضما بسقيه من ذرب الوصال = من حبيب القلب لامني ضميت
ارتوي من عده العذب الزلال = ناسياً معه التعب لوي عنيت
ياقديم الوقت وسنينه تعال = بذكر الماضي ليا جاني وجيت
كنت أنا معطيه في جيبه ريال = أستحى خجلان يومني عطيت
الغنج طبعه وفي نطقه دلال = كم وكم مره عدى معي وعديت
في مراحلنا على كل انتقال = ان شقا فالحب انا قبله شقيت
الشقا يطوى مثل طي الحبال = ومخلصين لبعضنا حتى بليت
حبه بقلبي كثر حب الرمال = لو انا ذيباً على مرقب عويت
المحبه تقطع قلوب الجمال = كيف أنا بتحمل وتوي بديت
أستحل القلب من دون اغتيال = يوم انا فاتح له ضلوعي دريت
وقتنا الماضي قبل لبس العقال = لو يبا في داخل عيوني يبيت
لين حال الوقت وسنيناً طوال = ثم كبر خلي وأنا لأجله وفيت
يلبس النفنوف ويحط الجلال = مايعرف الجنز لو اني هقيت
الله الخالق ومعطيه الجمال = إن جحدته من مخاليقه طغيت
القمر مايشبه لشكل الهلال = لو ألف الكون مامثله لقيت
عالياً قدره مثل روس الجبال = وشوفته تسوى لها مليون بيت
كان قيفاني على ذوقي جزال = ذوق خلي لوه بيشرى شريت
سالفتنا كلها فوق الخيال = يكفي اني من معانيها حديت