اللي جمع شمل القبيله فالأعياد
بمزاين الهيلا عسى الله يعيده
وخلى التلاحم ملحمة كل قصاد
يستاهل التقدير لو في قصيده
الشكر له موصول عنا وينقاد
منا له العرفان حب وعقيده
وأزكى التحية عد ماهل رعاد
وعداد ما تطبع حروف الجريده
أبدى جهوده لين كلٍ به أشاد
ونحمد اللي بلغه ما يريده
تاج الفخر ياللي عن الإسم نشاد
وأكبر طموح اليوم بمصافح إيده
وحبة خشم تقدير للشيخ الأستاد
بندر بن نايف عسى الله يزيده
حفيد ابن هندي سلالات الأمجاد
منبع شرف من روس قومٍ حميده
شيخٍ على كسب النواميس معتاد
نادر حرار وكل جزلٍ يصيده
وريث مجد وصيت مع جاه وشداد
ضم المرجل كلها في رصيده
يا لجنة التوثيق والبحث و أرصاد
هاذي أمانه وصلوها بريده
عسى اجتماع الشمل بالخير ينعاد
برقا وروقه في مزاين جديده
والشيخ ينعم بالفرح هو والأسعاد
ويعيش فالهيلا سنينٍ مديده
ويحماه رب البيت من كل حساد
ومن الحقد وأهل النفوس المريده
لنه سطع نجمه على روس الأشهاد
وعتيبه الهيلا بفعله سعيده
تنشر له البيضا وترفع بالأياد
وتقول هذا الشيخ بندر وليده