عز الله إنّ الضّيق واصل مواصيل = والهمّ أشوفه حطـّني في عيونه
عيونه اللّي من كبار الفناجيل = جارت على قلبي و هزّت ركونه
ماهي عيون امّ الرّموش المضاليل =اللّي جعلها اللّه عليّه حنونة
يا حظّكم بقلوبكم يا مهابيل = الظّاهر إنّ الهمّ ما تعرفونه
ما يعرفون الهمّ غير الرياجيل = لو إنّهم والله ما يستاهلونه
لكنّ يكفى روسهم تالي الليل = يدوّرون النّوم ما ياجدونه
احدٍ يحسّب للّيال المقابيل = و احدٍ يحسّب وش بقى من ديونه
من قسوة الدّنيا يحسّون بالميل = و يكافحون الوقت ويصارعونه
الصّدر للأسرار و المتن للشّيل = واللي يبونه ما يطيحون دونه
إن بانت الشّدّة على بارد الحيل = زادتهم الشّدّة ثبات وخشونة
على اللوازم كنّ يجرفهم السّيل= سلمٍ من الجدّان ما يتركونه
مربـّحينٍ تاجر البنّ والهيل = حافظ طلبهم من كثر ما يجونه
يذكرهم التاريخ جيلٍ بعد جيل = اللّي بدمّ قلوبهم يكتبونه
رغم الظروف القاسية والغرابيل = واجب على المطعون يجحد طعونه
رأس الطّموح يعانق الجدي وسهيل = و رأس المحطّم ما تعدّى متونه

لكنّ يكفى روسهـم تالـي الليـل = يـدوّرون النّـوم مـا ياجدونـه
احـدٍ يحسّـب للّيـال المقابـيـل = و احدٍ يحسّب وش بقى من ديونه