الهيـــــــــــــلا   *** منتدى قبيلة عتيبة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   المحاورات المنقولة الكتابية والأراء النقدية (http://www.otaibah.net/m/forumdisplay.php?f=66)
-   -   حبيب العازمي وسفر الدغيلبي محاورة جديدة (http://www.otaibah.net/m/showthread.php?t=141040)

قاسي العتيبي 27-Sep-2012 04:35 PM

حبيب العازمي وسفر الدغيلبي محاورة جديدة
 
محاورة شاهدتها على قناة المرقاب مؤخراً في حفل الشيخ قاعد الوهاب
فلفتت انتباهي بقوتها وأدرجتها لكم آمل أن تنال اعجابكم

حبيب العازمي
يامرحبابك ياسفر ولاتعبت من السفر..خل العلم مرفوع يكفخ في جناح الطايرة
اللي من العارض ليا الحرة يدور للخبر..يصبر لنا أيام ٍ قليلة والدواير دايرة



سفر الدغيلبي
دام البقاء وأنا لو أسافر ليا سطح القمر..الله خلقني ياحبيب للظروف الجايرة
هذاك عرضك المتاعب والمصاعب والخطر..أعوذ بالله من محاصيل النوايا البايرة




حبيب العازمي
أما على الخط الخضر وألا على الخط الحمر..ولاتخلي فالحزام من الرصاص الثايرة
ما أحد ٍ يصدق يامحمد مرسي تغير مصر..مدري الشعوب الفايرة وألا الدمي الفايرة



سفر الدغيلبي
أنا آخذ حقوقي دبل واثري مع زيد وعمر..ماعندي لبعض الخصوم مجاملة ومسايرة
أنته تباها بالستيرة مير ربك ماستر..شلعتها بثنين لين إنك صدمت العايرة



حبيب العازمي
كل ٍ على بنية يده من طين وألا من حجر..وإن كان في يدك العصى رد الذلول النايرة
اللي بقى عيد الضحية روح ياعيد الفطر..إن كان مازاورني الجمال وألا زايره



سفر الدغيلبي
تراي طعان النحر مانيب طعان الظهر..طعون رمحك بارية وطعون رمحي غايرة
ياربعنا يلي سبقتونا بوقت من الدهر..ما أحسبتها صارت عليكم لين قالوا صايرة



حبيب العازمي
ياكثركم كثراه يلي تغرفون من البحر..مدري خطاكم طايلة وألا خطاكم حايرة
حنا قهرنا القوم فالميدان في حرب القهر..هذا قبل ونش المرور يشيلكم في وايره



سفر الدغيلبي
اللي تجيبونه في عشر سنين جبته في شهر..لأن الخيول المقفية غير الخيول الغايرة

ودمتم بخير

خالد سفر العتيبي 27-Sep-2012 04:42 PM

عندي انها قويه و ثقيله شوي كلهم علل حقيقه




وووو



بيض الله وجهك

مصر 27-Sep-2012 05:54 PM

إبداع يستحق العرض والقراءة .................... شكرا

عبدالملك القاضي 27-Sep-2012 08:47 PM

محاوره رائعه
حبيب مافيه حيله وسفر مبدع
كان قبل هذا الطاروق طاروق قوي جدا وعنيف بين سفر وصقر سليم والحقيقه كلهم ابدعو ولكن صقر نزل بالالفاظ شوي
مما دعى حبيب الي قطع الطاروق وطلب سفر.
حبيب وسفر وصقر على القمه الان وليس لهم منافس.

فيصل بن فهد الجهني 28-Sep-2012 12:13 AM

أنا آخذ حقوقي دبل واثري مع زيد وعمر..ماعندي لبعض الخصوم مجاملة ومسايرة

..

تراي طعان النحر مانيب طعان الظهر..طعون رمحك بارية وطعون رمحي غايرة

..

اللي تجيبونه في عشر سنين جبته في شهر..لأن الخيول المقفية غير الخيول الغايرة



يا الربع سفر .. ما فيه حيله و ابياته بالصميم ...!!

عزالله اني ما قد شفته يجامل احد . . سواء اللي قدامه عتيبي ولا من حدى هالقبايل ..!!

مضيم العاطفي 28-Sep-2012 04:47 AM

صح السنتهم وابدانهم

شعار من الوزن الثقيل ولا هو غريبه الابداع منهم

بس ياالربع سفر ررررر مافيه حيله والله انه الرقم الصعب في المحاورة وانا باعتقادي انه رقم واااحد

في شعر القلطه في الوقت الحالي ماشاء الله تبارك الرحمن

باالاضافة الى جزالة شعره , جنابه الزين وثقته في نفسه

اشهد الله على حب هذا الرجل والله يوفقه دنيا واخره

لاهنت ياقاااسي وبيض الله وجهك ولاتخلينا من ابداعات سفر

مرزوق الجعيد 28-Sep-2012 06:27 AM

سفر الدغيلبي

شاعر الهيلا القادم بقووووه

سيجعل له بصمه قويه وسحب البساط من تحت بعض الاسماء في الساحه الشعبيه

وجهة نظر

العفريت 28-Sep-2012 07:52 AM

محاورة رائعة

لا هنت على ايرادها

تذكرن بيت لابو تركي الله يمتعه بالصحة والعافية


يافقيهه مارفع مستواك الا الدجاج * ان بسطناك خصفة وان رفعناك خصفة

تحياتي

الرحاال 30-Sep-2012 04:35 AM

اقتباس:

المشاركة الأصلية كتبت بواسطة العفريت (المشاركة 1321694)
محاورة رائعة

لا هنت على ايرادها

تذكرن بيت لابو تركي الله يمتعه بالصحة والعافية


يافقيهه مارفع مستواك الا الدجاج * ان بسطناك خصفة وان رفعناك خصفة

تحياتي


البيت هذا قاله مستور العصيمي في محاوره مع سفر ومعناهم سياسي ولا ينقص من قدر سفر شي
وابوسعد شاعر كبير وابوفيصل علم وعدم المجامله بالشعر تزيد من قوة الشعراء وترفع من مستواهم

لاحظ ان الطاروق قوي وفتل ونقض ومع ذلك الاحترام موجود والمعنى موجود لانهم شعار درسو الشعر وعرفو حلاوته ... اما شعار انا اطلق شنب وانا صوتي احلى صوت لهم قانون وطاروق ثاني وكذالك لهم جمهور ثاني .

قاسي العتيبي 30-Sep-2012 04:25 PM

اقتباس:

المشاركة الأصلية كتبت بواسطة خالد سفر العتيبي (المشاركة 1321597)
عندي انها قويه و ثقيله شوي كلهم علل حقيقه




وووو



بيض الله وجهك

أشكرك على تعليقك على المحاورة وإبداء وجهة نظرك
ووووو
وجهك أبيض


الساعة الآن »07:17 PM.

 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd