الهيـــــــــــــلا *** منتدى قبيلة عتيبة - اما وقفت الها سوات العطاوي ـ راع الحصان اللي بعيده مراميه الشاعر سعود بن هملان الحاف

بسم الله الرحمن الرحيم

قصيدة الشاعر سعود بن هملان الحافي

منقوله من شيله مهداه
لـ الشيخ فهد المهيثلي الحافي

اما وقفت الها سوات العطاوي
راع الحصان اللي بعيده مراميه

ولا عن المنبر تراني غناوي
ويحرم على الشعر لا جيت اسويه

والله لوردها القراح الرهاوي
عقب استلمت القوس من كف باريه

ضواحي عاى الشعار نجمن سماوي
يفتل وينقض قافها مابتلش فيه

وانا ماجيت البيت عاري وخاوي
يوم ان غيري لو بغا الدرب يخطيه

مهيثلي (ن فالمواقف حماوي
يبدي سوات سهيل فـ علا مباديه

على الشحم والبن مع عود جاوي
يامرحبا مليون والطيب قافيه

في محفل الي يرتكي لدعاوي
حرا يعدل الميل والكيل يوفيه

وانا على مدحه شفوق (ن شفاوي
وفي مدح مثله مالحقني مشاريه

هذا ابو بندر بعيد الهقاوي
بين الكواكب منزله في معاليه

ابوه من يدحم ولاهوب ياوي
ياطا على الكايد ويخلف هقاويه

عمي وله سطوه وقرم(ن فداوي
من صلب راسه ماتكشف خوافيه

ستر الهنوف ليا رمت بالعزاوي
ياحي راعي الطيب ياحي طاريه

ابا انشد اهل العرف وهل الفتاوي
عن علم(ن ابيض فـ المحاني وابا ابديه

من يمدح اهل العرف صحيح غاوي
ولا شرف للي يصخر قوافيه

مدح(ن على يمه ولا له حراوي
ساسه جويد وعالي الرجم يبديه

انا ماحط الشيخ مثل الشواوي
ولا نصب الشاوي ولو طالت اياديه

واهل الاشده غير اهل البراوي
راع البراوي لو جمعها تخليه

دنياء الفناء تشبه لسيل(ن نحاوي
هاذيك مرحانه وهاذي مواطيه

هذا زمانن فيه شفنا البلاوي
احد(ن يشيله فوق واحد(ن يوطيه

قامت تقلب بين سارح وضاوي
فالطيب اللي ما تغير مساعيه

واختامها اعداد نبت المطاوي
صلو على اللي داعي الحق يدعيه