اول الليل اوله واخر الليل الهزيع =اطيب اوقاته واحضه واخصه وازوده
قبل نور الشمس يكشح على الكون ويشيع=وقبل يقلع ناجع الحي طنبه ووتده
راكب اللي شان ركابها شان رفيع=جرمنية صنع وبلاد والجمش بلده
تحفة من بنز مرسدس في الخط السريع =كنها برق سحابه يهشمه رعده
لو تمر نخيل الاحسا غدى سدحا صريع=كوكب وش تدرك العين لونه وجسده
من ملكها ما شكى الفقر والوقت الضريع=منوة اللي وقته الشين ضامه وجحده
صنعة اللي جعل ماله تحت ربه شفيع=لو يضيفه والده حط قدره وجلده
دنيوي داني اخلاق وكلابه قطيع=جاره انقص قدر منهن ولو هن نكده
من وصايف باشة الذوق والحسن البديع =ماترك حتى التفاته بردفه ونهده
درة تلمع بصندوق تاجرها لميع=مال عن ماله تغالاه وحده وفرده
ماشري من معرض الفرد والشاص الصديع=من رخام كنه يقول ضيفه وعده
ماتجي بالحلم والنوم والكاع اللكيع=قسم نوام الضحى بس نومه ورقده
يشتريها اللي ليا قام قاموا له تبيع=نصف ما يرد المواني من من المال ورده
عدها اللي ما ذكر غير بالذكر الوضيع=يلتوي وجهه ليا جاع ورعه وشحده
تقرع لحيه على اعراض خلق الله قريع=ما بقا للزور والعور سيف ما جرده
ذاك عنه ابعد عنه لو تهيم ولو تصيع=ليت ما هجد حماس المساكين هجده
لين يقلع رمس مثله عن الدنيا قليع=ينسف الله ساس بيته وبابه وعمده
لين يسمع من ورى الحي لسقوفه قضيع=قضعة اللي سوس السوس ساسه ووفده
انت مجبول على الطيب جبل ولا تضيع=والهدف بيت ليا شافه الضيف قصده
نصها اللي ماقعد للخطا في كل ريع=جعل يبطي به زمانه ولا يقرب غده
طيب من ساس اطيب من انفاح الربيع=صاحب من خيرة الصحب لو كنت ولده
ما وطا في ام الشحم والنقا شوك النقيع=عبده اللي مشتريني وملكه وسنده
قل له اللي ضاق كونه ولو صدره وسيع=ماله الا عون من دان فضله وعبده
ودنا بالرجله مير عيت لا تطيع=ما تبا اللي يكرم الضيف لو كل جهده
ودها باللي ليا مر في الشارع تميع =واجهة بنك المرابح وهو وسط مهده
يشتري من كثر ماله ولا ينوي يبيع=يحسب ان المرجله كلما تجمع يده
مادرا ان المرجله نصفها حسن الصنيع=والحيا والدين مافيه قبله وبعده
والشجاعه كلها كلها عند الشجيع=ضدها في الرجل كذبه بقوله ووعده
وان جمعهنه مع الجود رجال جميع=وزادهن بالعرف والصبر وش كبر سعده
عانهن في اللي على كرسي القصر المنيع=مانضب مع كثر جوده بكفه وزهده
راحته تندا مثل صيب الغيث النفيع=مايقول الا عطه لين تقنعه وزده
ما يعوز المال من مدته حتى المجيع=وان نصاه مقل ذات ارتكاله ورفده
رحمة الراحم ونوره على اصحاب البقيع=غيرهم مانبتت الا بشيحه وجعده
ماذكر للهرج في فسحة الايام ريع=حنظله لو علها الغيث وبله وبرده
العلوم انواع وانواع لو فيهن نويع=ودك انك تتركه ترك مره وشهده
القبر ماحد كنز في ثراه ولاش بيع=غير ماقدم تشوفه لياصك لحده
من ملى جيبه بوجهه من اسوار الشبع=ماجلس في مجلس بين نمره وفهده
السباع لياضوت لو ضوا معهن سبيع=ما تعشا كان نابه وكفه ما انجده
لو تصب العلم كله على القلب الطبيع=لو غفى راعيه غفوه على الكوع فقده
جعل رملى ميتم طفلها الحدث الرضيع=حرمة اللي سطح بيته على الجار صعده
ماطلع من صدر راعيه عند الناس ذيع=غير زفرة من قلع هم نفسه ووجده
لو زفير الصدر صيحه صحا الحي الهجيع=مج عرف النذل تسلم نفاقه وحسده
صحبة الجاهل ولا صحبة الخبل الخليع=من جرفه الوقت خاوا طفيحه وزبده
وان زرعت الطيب واثمر بعد زرعه زريع=اعرف انه في لئيم فرح به وحصده
لو بكا شالح ببيته على اخوه الفديع=ما اقضى به من عتيبه بسيفه وجرده
ولا تلى وضح المصاغير بالقبا الطليع=من شرا صنف بماله تخير في اجوده
عاقل واشوف بالقلب والعين وسميع=وابخص القول المتمم بضاده وابجده
اكثر الاصوات حدي على هبد وطعيع=زود نعمة وقتنا اللي نبيض في اسوده
ما بقى الا نرضخ لحاكم الشعر ونطيع=طاعة في غير اهلها معيل مانقده