اليا بغيت اتعز نفسك مايحتاج = تزعج طبيب النفس واتخض زوجتك
ولاهو ضروري تتعب وتاخذ علاج= خلك ثقيل ولا تكثّر سماجتك
لا تجامل الملقوف من باب الاحراج = ولا احتمل منه الخطيه اليا جتك
احرص على مجلس هل البشت والتاج = هذا هو اللي تنسمع فيه هرجتك
ولا تعرض سالفة كل هراج = من شان ماتضعف مع الوقت حجتك
بعض السوالف بحرها يضرب امواج = ليتك موخر عن حجرها زجاجتك
وبعض السوالف مثل تيما وهداج =هذيك اخذ منها على قد حاجتك
وتراك لن جادلت ابو فكر منعاج = كنك مضيع صيدتك في عجاجتك
هذاك دورلك عنه بس مخراج = قدام لا تفسد صلاتك وحجتك
هذي طريقه للنشاما ومنهاج = جرب وقلي بعدها وش نتيجتك