يالله ترفعني عن هـروج الأنـذال=الخايبيـن مخيّبيـن الضنـونـي
أدموا قفاي بكثـرة القيـل والقـال=وبردى تواصيف الردى وصفوني
عاملتهم بالطيب تقديـر واجـلال=وهم بالخساسه والردى عاملونـي
قولوا لهم عادي ولا عندي اشكـال=وقولوا لهم بهروجهـم مارزونـي
ماهو بنا اللي يزعله هرج جهّـال=بدري عليهـم كانهـم يزعلونـي
والله ماالبس غتره ولاالبس عقـال=اذا مثلهم فـى الزمـن يشحنونـي
هلايـمٍ ورخـوم ولاهـم ارجـال=ماهم كفوا لو هم كفـوا قابلونـي
أحفى ولا آخذهم لرجلينـي انعـال=وسخيـن لااقربهـم ولا يقربونـي
والله ما يسوون فى عيوني اريـال=باعوا وفاي وطيبتي واخسرونـي
وماكون انا رجّال من صلب رجّال=ان كان أقدّر نـاس مـا قدّرونـي
أنا ولد راع الكـرم طيّـب الفـال=من صلب ابو نايف وسيع الطعوني
من روس قومٍ تثبت القول بافعـال=والنعم ياربعي ياشـوق العيونـي
ربعي لهم فى القلب مرسى ومنزال=والراس عزّه ياعـرب بالمتونـي
ربعي عتيبه تلطم العايل ان عـال=وكـل القبايـل والنعـم ماتهونـي