الصدر ضاق وصابني غم وجهد = وسع الخريمة يا معين الصابرين
والشمس غابت والسعد ما من سعد = والليل مقبل والقبيلة راحلين
انشد ويا كثر الذي غيري نشد = انشد عن العتبان هم راحوا منين
راحوا سوى يوم ان راعدهم رعد = ولاّ شتيتٍ في البلاد مفرقين
ياليت روحي تفترق عد وعدد = عدة عتابة تنتشر شام ويمين
وتضيع في كل الديار وفي البلد = ومن اين ما حل العتيبي تستكين
يالسر يا شينك خلا ما فيك أحد = ما كن جاك الغيث من عام اربعين
والله يا لو ما ركّزوا فيك العمد = لأدعي عليك بما يصيب الكافرين
ادعي عليك بدعوة الفرد الصمد = على ثمود وعاد وابليس اللعين
وابوي يالفرقا ولو عيشي رغد = ما يهتني بالي ولا فالي يزين
وابوي من فرقا عرب خيرة معد = فرقا الشجاعة والرجال الغانمين
حبي لربعي لو يطول بي الامد = ثابت ولا يمكن تغيره السنين
وان غابت الهيلا وطال بها العهد = يصبح حسابي من حساب الميتين
اليوم من في قلبه الحقد ارتعد = اشهد على ذلك ودين الله دين
بانت ضغاين من عن العليا قعد = على مقاديم القلوط الاولين
يا من يعقدون ويحلون العقد = اخذوا النصيحة وافهموا يا فاهمين
ضدوا العدا لا بارك الله بالحسد = ضدوا العدا لا رحم جد الحاقدين
هات الدليل بحقد حاقد والسند = ثم شهّروا به مع جميع العالمين
خلّوه يبقى عبرةٍ للي بعد = وشامة سوادٍ في وجيه الخاينين