هاك الغلا من كف راع الغلا هاك=لاتنقص اللي مدّّك الطّيب زيده
من صاحبٍ لوتطلبه قلبه اعطاك=مقدّمٍ قلبه على راحة إيده
يغليك يعشقك ويحبّك ويهواك=هواك في دمه مشى مع وريده
وتقول عطني وقت لجل اتهجاك=أنا كسولة فالغرام وبليدة
طيّب تعال اقراك واكتبك واقراك=وانسجك فالوجدان قصّة جديدة
لاتسبق الأحداث عنها وش ادراك=يمكن احلّق بك مسافة بعيدة
وآخذك رحلة للثرياء والافلاك=صحبتك غاية والسعادة أكيدة
واتهيّلك فنجان واشربك وارواك=وادفى على ضوّك ليالٍ بريدة
واليا طلبت اغلى طلب قلتلك جاك=أنا لعيناك اطلب اللي تريده
واتغزّل بلبسك وجسمك وممشاك=واطريك واكتب في عيونك قصيدة
ياما تمنيت انّي اعيش دنياك=واعيش في جوّك حياةٍ سعيدة
ياموقد اشموع الفرح في محياك=ارحم صويبٍ شوفتك يوم عيدة
ياورد لو حفّتك ياورد الاشواك=تبقى غلا راع القصيدة وسيده
ريح البشام ونكهة الهيل والراك=بستان به كلّ الفنون الفريدة
سبحان من حلّاك حلّاك حلّاك= سكّر زيادة والمزاياعديدة

ماقول الاكلمتين