الرفقة اللي بس مسيت بالخير=ماهيب رفقة نعنبوا من رجاها
لو تعجبك يومين فالثالث تحير=ويبين لك فالدرب سرعة مداها
هذا وأنا كنت اتوقع بهم خير= ومشرّهٍ بالطيب يطلع وفاها
انا أحسبهم فالليالي المعاسير=لن كان بقعاء دار فوقي رحاها
واقول الي جنب ٍ جبل كنه النير=وأهز راسي وافتخر واتباها
مير البلاء والمشكلة والمقادير=ناسٍ عزيزة ما اتوقع خطاها
لا جيت ابي تفسير مافيه تفسير=للبندق اللي ثورت في خباها
ما للخطاء في بعض الاحيان تبرير=ولا ودّنا بالشر نقدح سناها
أساير الأيام بالعقل واتسير=ولا امشي مع الدنياء على مبتغاها
أبحث عن اللي مايجي منه تقصير=ياقف معي والرجل يبعد خطاها
لا جاء لزومه مايدوّر معاذير=ربعه بفعل الطيب مكرم لحاها
ما اريد صحبة واحدٍ ينقر الزير=ويجاهد العالم ويبحث خفاها
ويحش في ربعه سوات المناشير=واليا أقفوا الاصحاب يتبع قفاها
ما دام هاذي حالهم نيتي غير=أرفع يدي واقول في منتهاها
مع السلامة يالوجيه المسافير= نفسي عزيزة عالياً مستواها
ماني براكض خلف ناسٍ مدابير=لاجيتها قامت تزاحف وراها
ماني براضي بالخطاء لوهو صغير=واليا وردت آرد عدودٍ تراها
لا ضايعن ناقة ولا ضايع بعير=من مدّها للناس ياخذ جزاها
والرفقة اللي ما لقينا بها خير=ما تستوي لي خيّب الله رجاها
وإختامها عداد ما غرد الطير= صلوا على سيد المخاليق طــه

المشاركة الأصلية كتبت بواسطة الدجيماء (المشاركة 1049684) ,, اللهم صلّ وسلم على طه وآله وصحبه ,, ياسلام عليك يابن عاصي ,, اضرب عليهم صليب وربي يوفقك ,, وياكثرهم في هالزمن ,, (( ماأكثر الأصحاب حين تعدّهم ** لكنّهم في النائبات قليل )) ,, صح لسانك مدد بلاعدد لين ترضى ,, في انتظار الجديد والمزيد والمفيد ,, إحترااامي ,,

المشاركة الأصلية كتبت بواسطة سفير الدوادمي (المشاركة 1049686) صلى الله عليه وسلم الله الله صح لسانك واعتلى شانك ابداع ابداع لايوصف بالمرة لله درك يافهد سجل اعجابي اشكرك اشكرك ولاتحرمنا جديدك وتقبل ودي قبل ردي

المشاركة الأصلية كتبت بواسطة أبونايف الروقي (المشاركة 1049875) يعطيك العافية قصيدة جزلة من رأس جزل صح لسانك . تقبل مروري