سلام يامير الوجيه المسافير=اقولها يامير سر وعلاني
سلام احلى من حليب الاباكير=مرباعها العبله ووادي المحاني
اما استمع بشرحلك الوضع يامير=ولا خذ المكتوب والعمر فاني
ياعين حر مايصيد العصافير=مايذبح الا طيبات السماني
يامير انا اطلب لي فحوص وتقارير=لولا رجايه فيك ماجيت عاني
لا طالب منحه ولا ابغى دنانير=الا العلاج عن العمى يوم جاني
الشوف راح وعكر الجو يامير=واهل الفلوس علاجهم ماشفاني
يامير انا جالي صدوف ومقادير=وازريت امشي مابقى من زماني
يامير ابا الممشى مع الناس واسير=لاكن ضعف الشوف عنهم حداني
يامير عقب الشوف عفت المسايير=ماعاد اداني مجلس مع خواني
ويامير في عيني سواة المسامير=ماغمضت من ليلها لو ثواني
ويامير فيه ماتجوز المعاذير=تحسنوا يافاعلين الحساني
اعمالكم لله وانتم هل الخير=ياعيال اخو نوره طوال اليماني
عبدالعزيز اللي يعسف الطوابير=عسى مقره في فسيح الجناني
ياما شعا من كل ملح ومغاتير=على ذلول ام الحقب والبطاني
مشى على عوص النضى صبح وعصير=من الرياض الا حدود اليماني
اخذ شهر يمشي ليا قوز ابا العير=واخذ ليا جازان عشر وثماني
واليوم عقب الجيش سفن وطيايير=وارتاح خيال الفرس والحصاني
سرب يجن من الخضيرا محادير=ماقادها مجنون ولا جباني
مافوقها غير العيال المناعير=اللي يصيبون الهدف والمكاني
ومن عاش بالدنيا يشوف التفاكير=اللي من اول فوق هالارض باني
وصلاة ربي عد ماغرد الطير=على محمد قلتها من لساني