ياشيخ تنشدني عن اللي جرى لي
 

ياشيخ تنشدني عن اللي
جرى لي
واليوم انا حلقي من الكدح مبحوح

ياما تعبت لجاهلٍ ماصفالي
وياما جرحت الخصم من شان مجروح

وياما تعبت مع الرفيق الموالي
لا فاح صدره من ظروف الدهر فوح

وياما كسب زندي وياما غدالي
مايدري السباح عن كل سابوح

سريت مع شول(ن) شعاه الجفالي
وعانقت قطعان الضعن عزب وسروح

وعسيت مسهاج الودق بالمفالي
مع درب نصبن جاح نبت الوطا جوح

مزنن تحدر من ثقيل الخيالي
سيله يشق القاع مع كل صحصوح

ورافقت عودأ من خيار الرجالي
وكتبت حرف الابجديه على
اللوح

ومسيت كور ام الرسن بالحبالي:
حمرأ تحت ركابها تبعد الشوح:

تروج كما حرأ مع الجو جالي
بنت البعير اللي مع البدو ممدوح

تقطع رهاريه السهل والرمالي:
لاصار راكبها من الناس طحطوح

وان شدوا البدوان تلقا حلالي:
سودأ ذخاير جد ماهيب شرشوح

لاهيجن الراعي يجيها جفالي
فيها صطر لاعارض البوش ساموح

وسجيت مع غرون من الناس غالي
غرون عليها الوسم ياشيخ مطروح:

لو شفتها ياشيخ شفت الجمالي:
ماناشها رسم الدبق داخل الروح:

الردف شط حوار بين المتالي
بين الهجال اللي رعت مقفر الدوح

تبدي لي الخافي وتخفي مجالي:
غرون معي ياشيخ بالهر ج مملوح:

مثل الشهد هرجه نقي ومثالي
بس الكلام ونظرت العين مسموح:

والشعر غنيته بطرق الهلالي:
والدرسعي ولابجدي بحت به بوح:

وجريت مسحوب الهجيني لحالي:
لاضاق صدري من حكي كل سرسوح

واليوم مالي يالبناخي مجالي:
ماعاد لي في منهج الشعر مصلوح

اقفى شباب العمر واقبل زوالي
والعود سجل زلته كل شابوح

والموج غطى نايفات الجبالي
والنوخذه يضحك على كل سابوح

وكنسلت كل اللي طرى في خيالي
وصديت عن زادٍ تولاه مشفوح

وعفت الرجال اهل اللغى والجدالي
تجار هرج وتخلط الكذب بمزوح

وان جات بالصملات راحوا ثعالي
بعد الشجاعه ضاع ذابح وذابوح


الشاعر عيد بجاد بن شده

صح منطوقك ..