لاواعناي من السهوم العطيبات=اللي ماتاسعها الضلوع المحاني
ياليتني ميّت ومن ضمن الاموات=ولا انفجعت بواحد ٍ من اخواني
اللي خذته ايام بقعا المريرات=واقفى وخلانا بفقده نعاني
واللي معلمني به ابوي بالذات=يوم اتصلبي فالرياض ودهاني
يقول مشعل صار له حادث ومات=ووقفت من هول المصيبه ثواني
ماسمع ياكود اصبر وبعض التنهات=وثره يقصّر بنهتانه عشاني
وانهل دمع العين غارات غارات=حاولت ارده بالرموش وعصاني
تشوف لآثاره رسوم وعلامات=الخد فيه رسوم والوجه حاني
نعم .. من الفرقا وكثر المعانات=بكيت حتى من عرفني بكاني
ماهو جزع باقدار رب السموات=لكن في نفسي بقايا أماني
اما وداعه قبل موته بلحظات=ولا قبل ياخذه .. موته خذاني
قرم ٍ حماسه لكتساب الجمالات=اعز من تحقيقها بالمعاني
الله فيه من الوفا والمروات=والله فيه من العطا والتفاني
يعرف وش ابغى قبل اقوله بنظرات=واطوع على تنفيذته من بناني
لو فيه مخلوق ٍ خدم بالصلوات=ان كان حتى في صلاتي كفاني
عساه بالجنه رفيع الدرجات=وانّه يعين بما بقى من زماني
موته بطش بالخافق وحطّم الذات=وتهبيطته وسط القبر موت ثاني