سلام يا عزوتي يا محزمي فا الشر والخير=وان طابت احوالهم لا شك منها طاب حالي
الله لو انه عطى سلطان همة سالم الزير=يمديه ما كان همه فا الزمن ميلة عقالي

يا مرحبا يا كبير القوم / وإستاذ الشواعير=من هاجس اللي يشوفك فالطريق / ولا يبالي
الله اكبر علاك / اصبحت راع بلاد وبعير=وتجيب بعض السوالف من ذكاء / مدري هبالي

لا تدهن السير يا سلطان للي يدهن السير=اللي سقاك المرار ليا بغى يسقيك حالي
من كبر قلبك تبا تنطح طويق وتنطح النير=وانته بنادم لحم وعظام وتهوز الجبالي!

يالداهيه لو خذيت دروس / من قصّة شكسبير=ما تنفعك لآحتمى الميقاف / مابين الرجالي
ترى عزوم الرجال / تردّ سيف الخصم / قصدير=لكنّ جنّب وأنا اسدّك / لو إنّه من حلالي

انا عتيبي صليب الراس وانت اصحابك مطير=يا صاحب مطير وش فادوك في تال الليالي؟
دولة سبا عندها علم ونبا جاني به الطير=والا انت علمك تجيبه لا حرام ولا حلالي

دوبك عرفت السنع / وأنته منوّل في شمنصير=أحيان فوق الجبل / واحيان في جرفٍ هيالي
ما عند دولة سبا / يا كود فيروس الخنازير=وأنته طبيب المرض / ومصاب به يا هملالي

يا مركب الهند ابو دقلين مرتك البوابير=تلعب بك الريح لا هبت صبا والا عوالي
كلمتك هذي يبن حامد مثل خط الطباشير=ما حركت شعرة من راس ابو زيد الهلالي

كم كلمةٍ حوّلت باللي نطقها / في زمهرير=لو كان منها / ولو طال الدهر / ما ضاق بالي
إسمك حمد عقب حرف الدال / لكن خير يا طير=الحمد لله / وحرف الدال علّمك التعالي

يا حامل المسك لا تاخذ طريقة نافخ الكير=حظي معك ما تغير باع لي والا شرى لي
يا راعي الحبل قصرته وطاح الدلو فا البير=قصرت حبالك وانا للبير ما تقصر حبالي

لا تظلم الناس وتقول / إلزموا لي سارق العير=خصّ المواذين كثروا / عقب موتك يا بلالي
ما كلّ عدٍّ على شانه / نحثّ الركب ونغير=أنا حبالي معوّدها / على العدّ الزلالي

اعرف جرر سارقين العير وانته جرتك غير=والله يكافيك من شي على بالي طرى لي
عان الظوامي على عد الروى ورد ومصادير=وانته تبا تارد وتصدر على حمر الزوالي

ليت العرب ما اتهموا / ذيب الخلا من دون تبرير=أو ليت ذات الجمال / أغـرت فتاهـا بالجمالـي
تبى تصّحيـك / صكّـات الليالـي / والمقاديـر=وتعرف معنى كلامي / يوم اقول / الثـوب بالـي