معركة التسريحات وموقعة ذات الفساتين وهياط الزواجات 00!
 

السلام عليكم ،،،

مساءكم وصباحكم فل أبشن جميعاُ :)
000


قبل شهر وعليه دزن أيام حضرت زواج لأحد الأقارب في أحدى هجر وفي روايه ولايه من ولايات عتيبه الهيلا 000

لاجديد تحت الشمس ولا تغيير في زواجات الرجال (ترحيب ، جلسة ، قهوه ، طق حنك، صواريخ ،مهايطة ، موكب مع العريس وإطلاق نار، عشاء ، كميرة تصوير << هذه يمكن هي الحاجه الجديده:eek:.. واخر العرس بلوت) .. وبعدين كل واحد يروح يوقف بسيارته عند مدخل الحريم ويدق على اهله ويصرخ على زوجته وهو يقول ( كل الناس خرجوا الا انت وش قاعدة تسوين ) ومجموعة تسري لبيوتها إذا كانت قريبه من القصر والمدام تجئ على مزاجها..!
حضرتي (محدثكم)وجدت صديق قديم لم أقابله منذو مبطي يمكن 12وفي روايه 14 سنه !!
أخذنا لنا زاويه وبديننا في فتح بعض الملفات القديمه والحديثه الاخ يمكن له أسنين ما أحد أعطاه فرصه سدح لي 400سالفة في نص ساعة .. شوي عن الاسهم .. شوي الكرة .. شوي معمر القذافي .. شوي انتخابات مصر... شوي عن مهايط المزاين وشوي عن شحاذه المسابقات الشعريه .. وشوي عن الأمجاد الورقيه والصوتيه التي حصلت عليها بعض القبائل !!...

سحبت المركا وأتكيت على الجدار وهنا إنتقلت لعالم آآخر ، صرت اسمع الدق والطرب اللي في قسم الحريم لما اتكيت نسيت سداح وأعطيته جميع الفرص إلا بقول إيه وصح ... سمعت الطقاقة تصيح بأعلى صوتها وتقول ( فوووووووق ... اسمع ) والخالات وراها بالطيران .. وهي تلعلع بصوت (آل فلان خياله آل فلان خياله) (كل الـ 000خياله عليهم رزت الرايه) (بنت فلان أبوها فارس معها سواق وحارس ) (خوال فلانه يرفعون الرااس في أم رقيبه جابو الكاس):p ...الخ من هذه المهايطات التي يُضحك بها على الساذجات لسحب مافي الجيوب ، وهنا قلت في نفسي أثر الهياط بعد عند الحريم وأنا كنت أظنه محدود في فئات الجهال من أبناء القبائل000
سرحت اتخيل وش صاير في قسم الحريم ... طقاقة تغني .. خالات وراها بالطيران .. اورج .. وفيه واحد اكيد ورا الجدار يدق الاورج .. ومادين له سلك لزوم الخصوصية .. والحريم جالسات يطالعون الطقاقة ويصفقون .. والبنات اللي يبغون عرسان يقومون يرقصون ويترززون قدام الامهات .. واخر العرس الطقاقة تاخذ مظروف فيه 8 الاف ريال تخيلوا ... 8 الاف ريال على شوية صياح يعاادل راتب معلمة تشتغل من الصباح الى الظهر شهر كامل .. أو راتب عريف ولايهون الجندي وهي تلم المبلغ في ليلة ...

المهم ..

تذكرت الزواجات زمان ،،،
الفرق بين زواجات زمان و زواجات اليوم شاسع !!!
ماكان فيه شي اسمه طقاقة ... ولا مجموعة تدق طيران .... كان فيه شي اسمه اللعب أقرب مايكوون لهدي النبي صلى الله عليه وسلم وهو اشهار الزواج ؟



زواجات اليوم ( عند النساء ) صارت اشبه بحفلات الشاي في الدول الغربيه .. طاولات .. حلا - عصير عشاء .. سواليف .. مغنية تغني .. رقص ... حروب طاحنة بين الحاضرات على الفساتين والكعوب والتسريحات
( معركة ذات الشباصات .. وموقعة ذات الفساتين .. وغزوة ذات الكعوب ) الهوية القبليه النسائية السابقه إندثرت ....


الرجال تحولوا إلى أشباه رجال ! المصاريف أثقلت كهولهم ،
مصاريف تقص ظهور الأسر بسبب حظهورهم لهذه الزواجات
إسراف ، تبذير ، هياط إجتماعي إنهكـ كاهل أبن القبيله 000

الكلام كثيررر ومغري في هذا الموضوع ولكن أتركـ لكم الكيبورد لتنثروا مايجول في رؤسكم حول :


المهر في القبيله كيف تراه ؟ هل أنت مع تحديده على مستوى القبيله ؟

الديون التي تلحق العريس من ، قصور الأفرا ح ، الدعوات التي توزع هنا وهناك وهي عباره عن شحاذه بغلاف محبه ، تصوير القنوات 000الخ ؟

مصروفات النساء ، فساتين ، كوافيرات ، حلويات ، عصيرات ، بوفيهات مفتوحه ، عبدات:D عفواُ فنانات 000

رقص النساء في الحفلات ؟ هل هو استعراض للبحث عن عريس بالنسبه للبنات ؟ وكيف تراه للمتزوجات ؟

يجب أن نغير الوضع كشباب ، الآن الوضع تغير ونتمنى أن يتغير للأحسن

ليس كل ما كسبناه من الأباء صحيح ، نعم هناك عادات وتقاليد نفتخر بها لكن ليست إلزاماً أو حد سيف
وأيضاً ليس كل مانكسبه من المجتمع صحيح ، الثقافات متعدده وقد يعتليها الخطأ او الصواب

بالنسبة لي أتمنى أن يكون زواجي في بيت الوالد والمعزوم أهل الزوجه وأعمامها و أهلي وأعمامي و الوليمه ذبيحه أو ذبيحتين والسلام ختام
(أستبعد ذلك طبعاً )

لا كوشات ولا كاميرات ولا عرضات ولا محاورات ولا مهايطات ، التواضع جميل وبإذن الله تطرح البركه في الزفاف المتواضع والبسيط
شكراً أخوي

اضم صوتي وكيبوردي لك يأخي عبدالله

والشي اللي يجعل هذا الشيء غير مستبعد هو :

نظرة الشاب والفتاه للزواج كقيمه ومرحله فاصله في الحياه

وليس فقط ليله واحده طقطقه ورقص .... و دخله و بس

الزواج حيااااه كامله لو حسب كل من الزوجين حساب ذلك لما وجدت ماتجد اليوم من بلاوي و مشاكل

أنا عني ارى ان الرجل هو الاساس في وضع اللبنه الاساسيه لحياه زوجيه قائمه على الثقه والصدق

والمرأه عليها الباقي ... ولو كانت خيّره وفيها بذرة طيب .. تبي تمشي الحياه بسعاده وحتى لو شابها بعض

المشاكل ... التي سيكون حلها سهل جداً وسوف تعدّي لأن الاساس من البدايه كان الصدق والثقه

اولاً : الموضوع جميل جداً ويتطرق لعدة جوانب مهمه ابرزها الابذار فوالله اننا مسئولون عن هذة الاموال المهدره

ثانياً: تمنيت انك تطرقت لموضوع اخر لا يقل عنه اهميه وهو التصوير التلفزيزني الدخيل علينا في الاونه الاخيره

وكذلك المبالغ الباهظه التي تعطى للشعراء لمجرد ساعات قليله السنا محاسبون؟

نسأل الله العفو والعافيه,

نـــاقد بدرجة استاذ...

إنت والله أستاذ الجميع <<<< الله يطول عمرك ... طال عمرك ;)

حياك ياعبدالله ، كلامك جميل وهذا مانطمح إليه ونتمنى أن نراه واقعاً ولكن لن يحصل وهناك من يخطط لإغراق أبناء القبيله بالبطولات الوهمية !
قنوات تم السماح لها لبث سمومها لإشغال ابن الباديه في أمور ثانويه أبعدته عن موقع التحكم المجتمعي وأظهرته أمام الآخرين بالساذج الجاهل

الأمنية ليست لكـ ياعبدالله، أنت لك القرار ؟
ماهي الاسباب التي تجعلك تستبعد ماتراه صح وتؤمن به؟
نظرة الناس وكلامهم ؟ كثير هم المؤيدين لك فلا يغرك جهال النساء وأشباه الرجال ؟


أتمنى عودتك هنا لإقراء رائك حول الأسئله المطروحه في آآآخر الموضوع ،،

تحياتي لكـ