بدا الشاعر اللي نبرة الحـزن فـي مبـداه
وسـلّـم يـديــه لـوجــه ربّـــه وناصـيـتـه

علـى راس رجـمٍ خالـي الـبـال مايـرقـاه
والأنسـام تلعـب فــي شمـاغـه وطاقيـتـه

وقـف وقفـة اللـي باقـيٍ يـوم مـن دنـيـاه
ولمـح غالـي أحـلام الحـيـاه متعديـتـه !!

رقا بإنكساره .. وإلتفاته .. ودمعه .. وآه
وحوّل بضيقه .. وإستماته .. وتنهيتـه !!

نصيبـه متاهـاتٍ مـن الـبـؤس والمـأسـاه
هـذيـك متنطـحـتـه !! وذيـــك متقفـيـتـه

يـوم أن الغـلا جـزّه بسيفـه مــع المثـنـاه
تـقـفـاه وقـتــه مـــن خـلافــه بجنـبـيـتـه

وليفي عساني لو عدمتـه ماعـدمت أرضـاه
ولا أعـدم نبـاه !! وميلـت القلـب ناحيتـه

سـقـا الله ليـالـي عوّدتـنـي عـلـى لامــاه
طريقـي علـيـه ووقفـتـي عـنـد ساريـتـه

قبـل تفتـح الدنيـا عيونـي عـلـى ذكــراه
وأنـا ماغفـلـت وغفـلـت الـشـي ماريـتـه

ليا أمسيت فـي قطـع الخـلا مانـي بويـاه
ولا العـيـن شايفـتـه ولا الإذن موحـيـتـه

الا يـاوجــودي مـــن فـراقــه ويـاعــزّاه
وجود الوحيـد اللـي شريـدة عـرب بيتـه

هو الله عطاه الصبر عنّي !! وانـا والله
مـأخـلّـي جـــدارٍ مـأتـلـوّا بـزاويـتــه !!

عسى الله يبـرّي ذمتـي مـن خطـا فرقـاه
كثر ما أنتظرتـه فـي الـدروب وتحريتـه

تــدور السنـيـن وكـــل مـاقـدمـه يـلـقـاه
الأيـــام عـجـلـه وأرذل الـعـمـر تالـيـتـه

تعرف المصايب مـن تحنّـه ومـن تـدراه
مثـل ماتعـرف اللـي تـروح متوطيتـه !!

الإنسان ودّه ينحـرم مـن ( رغـد دنيـاه )
ولاينحـرم مـن ( نـور عينـه وعافيـتـه )


م / ن