ياهاجس الشعر لامن جاك نطاشه= اوقف للافٍ لفى من بعد نطاشي
جيبٍ سرح معجبٍ راعيه نشناشه= يالله عسى الجيب محمود التنشناشي
غنا المغني وقيفانه على اشه = غنا المغني وانا باقول له ماشي
مشاعر الشعر ياهل الشعر جياشه= في وسط صدري تصول وتدحم الجاشي
درب الخطاء مسلكٍ ماوالله اعتاشه= درب الخطاء مسلك اهل الزور الاوباشي
والحية اللي بصدع الضلع وشاشه = لا قص من ذيلها ضاع التوشواشي
نجلا البصر جلي لين نداوي اعماشه = نذهب رماد العيون ونجلا الاعماشي
ياصامل انثر صميلك من على اغراشه = ان كان عندك صميلٍ يملا الاغراشي
من حط راسه وسط فكين كماشه= النار ماتحرق الا رجل محاشي
والناس تال الزمن للجرح فتاشه = ولا نيب انا منهجي للجرح فتاشي
انا اكوي الجرح لين يبش بشباشه= وليا اونس النا ر يضهر له تبشباشي
وان جا لعوج العلوم الهوج نباشه= ماني لعوج العلوم الهوج نباشي
ما اتابع مسلسل اقماشه ولا طاشه = لو اكثر السوق عود طاش ماطاشي
يشوق عيني حرارٍ شقر خراشه = مطلاعهنه يصيب الخرب بخراشي
ساكن بقمة جبل ما اسكن وطى اخشاشه= يوم اكثر الناس مغترٍ بالإخشاشي
روابع الناس بعض احيان غشاشه= والفكر ياهل المعاني نوب غشاشي
كم سلعة بايره في سوق قماشه = في ساحة يهتبدها كل قماشي
ينفش شواعيرها جمهور نفاشه= شعارها جاهله والشعب نفاشي
كما طيورٍ بجال النار طفاشه = لاشبت النار قام الها تطفاشي
مضلم سماها تليم فيه خفاشه= والنجم لاغاب يضهر كل خفاشي
الساحة اليوم صارت هرج حشاشه= قصيدها كن معه هروج حشاشي
البعد عنها علاج الفكر وانعاشه = انا اشهد انه يمد الفكر بنعاشي
واستثني اللي لعرش الشعر عراشه= يبنون ساسه وسقفه يعرش اعراشي
وسيوفهم مصلته للروس طشاشه= وانا بكفي حدب للروس طشاشي
اليا ضرب راس مديوشٍ برى دواشه= وليا ضرب راس صاح الفكر ينداشي
ياما نخاني بعد ما بيح مشاشه= يومن كبده لحقها القيض بعطاشي
اورررده جال عدٍ يروي اعطاشه = ما اجذب له الدلو انا من رس ومشاشي
وترى اسهمي مخضره تخضربها الشاشه= واسعارها غاليه تصعب على الناشي
ورصيدك اللي تلمه وسط مكباشه= مني ورثته لك الله وسط مكباشي
وان كان جوك قتامه خالط اغباشه= انشد هل العرف عنك يزول الاغباشي

روابع الناس بعض احيان غشاشه = والفكر يا هل المعاني نوب غشاشي