الهيـــــــــــــلا   *** منتدى قبيلة عتيبة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   شعراء قبيلة عتيبة (http://www.otaibah.net/m/forumdisplay.php?f=46)
-   -   ديوان الشاعر الكبير / محمد بن حويل العصيمي (http://www.otaibah.net/m/showthread.php?t=81711)

فيصل المسعودي 17-Nov-2008 02:29 AM

ديوان الشاعر الكبير / محمد بن حويل العصيمي
 
ديوان الشاعر الكبير/

محمد بن حويل العصيمي


أحببت من خلال هذا الموضوع وفي هذا القسم

الذي يحوي على دواوين شعراء قبيلتنا الكريمة

أن أنقل لكم قصائد وجدتها متفرقة في الشبكة العنكبوتية لشاعر كبير من شعراء القبيلة المعدودين

يمتلك قوة الأبيات وجزالتها في المعنى واللفظ والمضمون

هو الشاعر الكبير/


محمد بن حويل العصيمي


في البداية نبدأ بهذه القصيدة لشاعرنا:


البارحة مع هجعة الناس ونيت=من هاجس في خاطري مستكني
الونه اللي خلت الفكر تشتيت=والحال مني يقرع أقراع شني
ليا ذكرت أمي وأبوي أستخفيت=دقت طواري خاطري واستجني
ولا ليا مني هرجت وتناسيت=كن الضمير وخاطري يرجهني
لا واعذابي كل ما صبحت وأمسيت=ليا ذكرت اللي حنانه حضني
على حنان أهلي بكيت وتشافيت=ولا لي زميل ينقل الهم عني
والايجار يني على ما توريت=قد ناشه اللي في ضميري شحني
ليا ماتوا أهلك قالوا الناس عزيت=وصبحت في وسط الجماعة تغني
يا الله يالمعبود يا حامي البيت=ترحم عظام اللي خذ الموت مني
بعزة جلالك يا الهي ترجيت=تعوضني في اللي غيابه غبني
يا والدينٍ في حماهم تربيت=ومن عقبهم في مجمع الناس كني
صويب شلفٍ لا سليمٍ ولا ميت=فاخت طريق الجيش وامسى يوني

وأيضاً مع هذه الجزلة لشاعرنا:


أنا سمعت علوم من ليت الاول=اتذكر القلب الشقاوي هل الطيب
فالوقت هذا والله انك تهول=وقت الرخاء لكن فيه العذاريب
راع الشداد اللي على الكور حول=وركب الشداد اللي منول منيديب
وعود مع التالين من كان الاول=وتقدم اللي ما يعرف المواجيب
واليوم فالأوطان قام ايتجول=اللي زمان فات يجفل من الذيب
وقتٍ مضى نسمع كلامٍ مقول=واليوم جابته الليالي بعد غيب
والبل قنوها العالم اللي منول =أبوانهم عند العجايز مناديب
نبت الزهر عقب الدهر ما يطول=أيام وتروح الليالي شلاهيب
لا بد الاول عقب وقت ايتحول=والشمس تطلع فوق الأوطان وتغيب

قصيدة مدح في قبيلة النفعة:



الاد النفيـعـي فــي الـلـقـا تـنـطـح الـدخّــان=وتــرّد المنـيـع انـكــان كـــلٍ رفـــع كـمّــه
علـى دور ابـن حجنـه تبيّـن لـي البـرهـان=لـيـا درهــم التـالـي يـــروح الـخـبـر يـمّــه
شبيب وشبّاب اللي لقحص الرمك فرسان=ومرابط كروش اللي وصـل ذكرهـا القمّـه
وترى للدهينـه دور ومـن أشهـر العربـان=يــفـــرّق جــمـــوعٍ لـلـمـغـاويـر مـلـتــمّــه
وذوي زيــاد خيلـهـم لـيـا طـبّـت الـمـيـدان=تـرى خيلهـم فالحـرب فـي روسـهـا زمّــه
وآلاد فليـت الـلـي لـهـم يسـجـد الشيـطـان=ولــو كـــان تجـتـمـع الشيـاطـيـن ملـتـمّـه
ابهـرج بعلـم الصـدق لـو جـامـل الجـابـان=وأعـدّ الصحيـح ليـا كـذب هافـي الذمّـه




وهذه القصيدة قالها الشاعر في جاره طامي بن تراحيب المسعودي النفيعي


البارحة فالقلـب مثـل اللواهيـب=أزريت أحط الراس فوق الوسـاده
الشكر لله ثـم لطامـي تراحيـب=اللي تنازل عـن مضنـة فـواده
فالحادث اللي دبره عالـم الغيـب=اللي تصرف حكمته فـي عبـاده
رجلٍ حكيم وماضي لـه تجاريـب=معروف اله كسب النواميس عاده
صميدعاً من نشوته يفعل الطيـب=بدنياه وأخرتـه عساهـا سعـاده
دنيا ودين ومن رجـال المواجيـب=وزودٍ على المعروف يفعل زيـاده
تعيش ياستـر البنـات الرعابيـب=رجلٍ على الطالات يقـدح زنـاده
كريم سبـلا فالليـال الشلاهيـب=وضد العنيـد اليـا تزايـد عنـاده
أقول ياطامي عريـب المجاذيـب=أرجي عساها عند ربـك شهـاده
الله ياكتبلك مـن الـرب توهيـب=ودنياك تمشيبـك طريـق العبـاده
ربعك هل الشرفا وساع المضاريب=الهم على جمع العدا فـرض أراده
في راي أخو غزوا حصان الأطاليب=راع البويضـا والفخـر والقيـاده
يوم الملاقا يشبع النسـر والذيـب=والخيـل والله ماتدانـي جــواده
مقعد ليا ركبوا على الفطر الشيـب=يثني خلاف اللـي توخـر شـداده
ليا درهم العيـدي وروح جناديـب=وثار الرصاص وصار حرب الإباده
ليا قل هوش معجليـن التراكيـب=يرم العشا للطير وسـط الحمـاده
يرم العشـا لمعكفـات المخاليـب=فعلـه يخسـر لابسـات القـلاده
مايطـرح ألا مورديـن المغاليـب=في يوم مايجـلا بياضـه سـواده
يوم القوامه والجمـوع المراقيـب=في وقت ماكلـن يحصـل مـراده
هذا وصلى الله على خير ماجيـب=والعلم يؤخذ صامله مـن وكـاده

قصيدة رثاء للشاعر في محمد بن هلال العتيبي


يالله يا رب البرايا والأفلاك =مرسي الجبال مصور الكائناتي
اسمك نسمي به وماشين برضاك =وما قدر الخلَّاق للعبد ياتي
يالوالي المعبود ملاك الأملاك =يا رب ياللي في يدينك حياتي
يا ذا الجلال اللي كبارٍ عطاياك =وسّع عليّ القبر عند المماتي
أوحيت علم حط في القلب دكاك =على رفيق قالوا اليوم ماتي
يا محمد بن هلال والعلم ينصاك =طيب ورجل فيك كل الصفاتي
الله يبيحك كل ما حل طرياك =حق عليّ أرثاك باحسن دعاتي
أدعي عسى الجنة محلك ومأواك =مرحوم ياللي في اللوازم زناتي
مرحوم ياللي ما تغير نواياك =وان قلت كلمة لزم تطلع ثباتي
من مجتمعنا يالمقاطي فقدناك =لك حق عند اللي يسوي سواتي
والناس أحد قدمك وأحد لزم يقفاك =يا رب نطلبك العفو والنجاتي
يا رب خفف ذنب عبد ترجاك =نرجيك وانته تعلم الخافياتي
الله يثبت عند مولاك ماطاك =وعلى الرسول أفضل سلام وصلاتي

ولشاعرنا هذه الجزلة :


حل بصناديق الضماير عواصيف=من واحدٍ فالناس عيني غمضها
يابو حسين ابكي القلوب المواليف=وش طبها ياللي تعالج مرضها
هذي قلوب عيف تبغيلها عيف=نعرف دواها والطبيب اعترضها
علاجها لامي البنات الغطاريف=وشقر القرون اللي عشيري نقضها
أبو قرونن ياصلن السراجيف=هيض هناديبي وحالي قرضها
اقرونه اذيال المهار المزاغيف=خيل تحت بوماً بعيداً قضضها
والخد براق سراله رفاريف=برق الخيال اللي مزونه نفضها
وأهداب عينه فوق حجره مراديف=روحي ملكها بالجمال وقبضها
اشفق لشوفه مثل حجرف على الضيف=محبته ربي علينا فرضها
لي صاحباً مستزهفوه المزاهيف=ولبدى بسده والمودة حفظها
يا منيف لو نمشي من السيف للسيف=وإن ما تهيت ما نحصل عوضها
تتلني تلت ركاب مواجيف=وزيزومها عقب المخافه نهضها
هجن العقيد اللي ركابه مناكيف=وقومه كما أصوات الذيابه جضضها
مرمى ومطروداً ومكسور ومعيف=وكب الفرس لبواردي لحضها
ثاني نهار وتل ركبه بعد شيف=يمسي ويصبح ما تجمع فضضها

هذه الأبيات قالها شاعرنا مواساة لصديقه الشاعر خالد بن حسين البقمي في وفاة أخيه شهيد الواجب عبدالله بن حسين وجميع شهداء الوطن اسكنهم الله فسيح جناته واساله تعالى ان يعين اسرهم وذويهم ويلهمهم الصبر والسلوان
.





يا الله يا لمعبود يا خالق الكون=ياللي خلقت الكون بمرك تديرة
يارب خفف حزن من كان محزون=لكن قدم الناس يخفي السريرة
يا خالد بن حسين نعرفك مغبون=ناشتك صدمات الأمور الكبيرة
وأهل الشهادة والوفاء ما يموتون=حيين عند الله ويرجون خيرة
وحنا معك والوقت ما هوب مامون=يجبرك جبار العظام الكسيرة
يجبر عزاك اللي لبيته يحجون=ينصونه الحجاج من كل ديرة
مكتوب والمكتوب للعبد مضمون=والصبر عزٍ للرجال الجديرة
دربٍ عليه الناس لابد يمشون=ومن لا يموت بسيف موته بغيرة
يارب حسن الخاتمه يوم يقفون=ولا يختفي مثقال ذرة صغيرة
تقبل صلاة عبادك اللي يصلون=ومن أستجار بوجه ربه يجيرة
وصلوا معي يا للي لوجهة تعبدون=على شفيع الخلق يوم الحشيرة





في رثاء الفقيد محمد بن معدي الدعجاني رحمه الله:




بسم الله الرحمن علام الأسرار=الواحد المعبود جل جلاله
هو الإله الخالق النافع الضار=سبحان من لا له شبيهٍ سوى له
اللي رفع سبعٍ وركب لها أطوار=وسبعٍ بسطها الله بحسن وعداله
فيها القمر والشمس ونجوم الازهار=بامره سخرها على كل حاله
والأرض فيها أشجار واثمار وابحار=وارسى عليها جل شانه جباله
والكون كله فيه الأفلاك تندار=ومن كل جنسٍ خالقه في مجاله
وفا الآخرة جنة وفا الآخرة نار=ومن لا اعتصم بالله عزي لحاله
في ستة أيامٍ خلق كل ما صار=ثم اعتلا فا العرش جلا جلاله
وخلاف ذا نبدي بتنظيم الأسطار=نرثابه اللي ما نحصل بداله
مرحوم يا اللي فا المخاسير صبار=ياما أرخصت يمناه من حر ماله
محمد ليا باروا ضعيفين الأشوار=على المراجل طايلاتٍ حباله
ابن معدي ريف من جوه زوار=يشرح ضمير اللي نصاه وعناله
يضحك حجاجه يوم يلفيه خطار=غير الوفا والطيب سمحٍ قباله
أبو وجب لا جات عدسات الأبصار=سلاسل الخضران ساس الشكاله
هاك الخطل يامال جنات الأبرار=يا الله عسى الجنة لحافه ظلاله
وصلاة ربي عد همال الأمطار=على رسول الله وديع الرسالة

عبدالرحمن الهيلوم 17-Nov-2008 04:42 AM

شاعر جزاله ومعني

صج الساانه

شكرا يابو منيف ودام جديدك

دمت بود

فيصل المسعودي 18-Nov-2008 01:52 AM

اقتباس:

المشاركة الأصلية كتبت بواسطة عبدالرحمن الهيلوم (المشاركة 770557)
شاعر جزاله ومعني

صج الساانه

شكرا يابو منيف ودام جديدك

دمت بود

هلابك يالغالي

وشكراً على مرورك الجزل ياغالي

تحياتي

متعب العصيمي 18-Nov-2008 08:10 AM

فيصل المسعودي

لا شلت يمناك يالذيب على الديوان لشاعر ابن حويل


أشكرك وبعنف

فيصل المسعودي 18-Nov-2008 10:11 PM

اقتباس:

المشاركة الأصلية كتبت بواسطة متعب العصيمي (المشاركة 771282)
فيصل المسعودي

لا شلت يمناك يالذيب على الديوان لشاعر ابن حويل


أشكرك وبعنف

هلا متعب

ولا شلت يمناك يالذيب

ولا هنت على المرور والرد الطيب

شكراً لك ياغالي

تحياتي

نواف العصيمي 19-Nov-2008 04:40 AM

لاهنت ياعسل على الموضوع العسل ,,

..

فيصل المسعودي 19-Nov-2008 06:28 PM

هلابك ياعسل

ومشكور على مرورك الحلو ياغالي

تحياتي

@ـايل 19-Nov-2008 08:22 PM

الله الله ..

صح لسان الشاعر الكبير محمد بن حويل .على القصايد الجزله ...

ولاهنت يافيصل ..على النقل .والله يعافيك يالغالي..:)

ضاامي وفااا 20-Nov-2008 12:28 AM

لاهـنـت وبـيـض الله وجـهـك وصـح لسـان ابـومـشـاري تـقـبـل مـروري

فيصل المسعودي 20-Nov-2008 01:12 PM

اقتباس:

المشاركة الأصلية كتبت بواسطة هـايـل الـعـتـيـبـي (المشاركة 772091)
الله الله ..

صح لسان الشاعر الكبير محمد بن حويل .على القصايد الجزله ...

ولاهنت يافيصل ..على النقل .والله يعافيك يالغالي..:)

هلابك هايل

شرفتني بمرورك ياغالي

شاكر لك تواجدك وردك الطيب

تحياتي


الساعة الآن »05:58 PM.

 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd