ياهاجسي فك البكار اللي تداحم بالقيود =نوادرٍ وقت اللوازم مانشد عقالها
بكره ليا نصيتها والناس قدامي حشود = مابي يمر الحاضرين الا ياكود جزالها
ابي ليا عديتها قدم الرجال تعد فود = والعارفه لاسمعها ينشد من اللي قالها
يالله بقافٍ لاشعيته قام يرقى بي سنود = ويالله بيخت ماتقطع فاللزوم حبالها
حانت مواقيف القصيد ارواح يالقاف الشرود =قدام عينك هامةٍ راس الشعر ماطالها
المملكه هي موطني واعز منظر في الوجود =الشامخه بين الدول مابعد شفت امثالها
الله فرقها عن سواها من عصر عاد وثمود = واختصها باحلى الخصال النادرات لحالها
فيها حرم طيبه ومكه قبلة اصحاب السجود = وفيها مشت رجل الرسول بسهلها وجبالها
ومنها مشى ركب الرساله للفوارس والهنود =لين اشرقت شمس العباده وارتفع منزالها
انشم من نفحة هواها افضل انواع الورود = وتسوى قناطير الذهب وديانها ورمالها
موطن معزي ياعسى روحه بجنات الخلود = اللي حكمها بعد مانادت له ولبا لها
يوم اتعزا سل السيوف المرهفات من الغمود = رهن حياتها دونها من شان يصلح حالها
يلين نادا الحق بسم الله قم صح الرقود = الحكم لله ثم لاخو نوره مطيب فالها
وبعد حكم خمسه من عياله وسيعين البنود =اثنو على عقالها ثم علمو جهالها
لين استعزت واستمرت من صعود اليا صعود = وطت على راس المحال وظفته في شالها
كل العرب قالو جميل وبن الخواجه قال قود = صارت نموذج للدول باديانها واشكالها
واليوم في حكم الملك عبدالله بن ال السعود = اللي تدرس سيرته بين الدول لاجيالها
بحر الكرم راس الهرم لاراحت الايام سود = كفه سحابه ممطره للمسلمه وعيالها
رمز الشجاعه من ذراعه يقطع امال الحسود = واللي بنت على دمار المسلمين امالها
هذاك ابو متعب ليا من حك عود راس عود = يشرب فناجيل العدا لاهيب من فنجالها
وولي عهده عضد جنبه لاتراخن العضود = لاثقلت حمول الليالي فوق متنه شالها
سلطان سلطان السعد لاهب للحراب نود = اسمه على صدر الشجاعه والمكارم نالها
الحمد لله كافل الارزاق والفرد الودود = اللي يجازي من عمل حسنه بعشر امثالها
رجع ولي العهد بعد الغيبه اللي ماتعود = لين ابتسم وجه البلد من جالها لاجالها
عودت وزير الجيش زادت جيشنا عزم وصمود = لاجات غاره من عدو حنا لها حنا لها
اقلوبنا مع البواسل والنشامى في الحدود = لو هم جنوب المملكه وحنا حدود اشمالها
الجيش كله محتزم للخصم ظباط وجنود = قلوبهم والالسنه بالمختصر ذا حالها
لا لا يحق لي ان اعيش بموطني ان لم اذود = عن الحرم والارمله وشيوخها واطفالها
الله يقبح كل نكار تسامى بالجحود = ياكيف يغدر موطنه لاغذته بفضالها
اصبح مغرر بين تيه وضحكة اسنان الحقود= يمشي مثل ممشى ذبيحه حدها دلالها
ياسيدي ياخادم البيتين حلال العقود = ماهمنا مكر الثعالب لو تهز اذيالها
إنا ليا جات الصعايب مابنا شخصً ونود = وارواحنا محدً عرف متى تكون اجالها
لكنها لامن توفت للشهاده والحدود = ماتعتبر ميته مادام ان السعد يبرى لها
اقزام تال الوقت جتنا ودها ترجع بفود = لكنها بلشت تمنى لو ترجع حالها
راحت عشى مابين نيبان الذيابه والاسود = شرذمةً قامت تجفل من فيايا ازوالها
وحنا سباعً مانصيب الا الجماجم والكبود = راحو عشى لافواهنا في حالةً يرثا لها
صارو عبر للمعتبر ولاهو على الشين محدود = واللي يدور مثلها يقرب لكي يشتالها
ياالمملكه وارواحنا ماتنتثمن بالنقود = لكنها من دون حدك قاصرين آجالها
بخت النفوس اللي لجل حدك تعود للحود = مادام مكسبها الشهاده ماتعبنا الا لها
نكرم بها الحضن الحنون اللي حملنا بالمهود = ولاهي كثيره لانثرنا دمنا لجبالها
نبي دمانا دونها تبقى لنا ذخر وشهود = تشفع لنا لازلزلت ارض الصمد زلزالها
بيوم تجمع فيه خلق الله سبحانه وفود = في ساعةً فيها البشر توخذ بحسب اعمالها