انا ملك على حرار الطواريق =تجي طنا والا تجيني مهابه
في مثل هذا اليوم عز وتوافيق=لابد نحضر والفخر ينحكا به
يا جدودنا يا اهل المهار المعانيق=الكم علينا حق حان الوفابه
على هوازن والعصور السواحيق=لأخر عتيبي نفتخر بانتسابه
ما كنتوا الا كالنجوم المشاعيق=المجد والتاريخ انتم كتابه
ادجر على ذكر المفاخر ولا افيق=الا وبحر الشعر عذبٍ شرابه
وين الذي يبغى علوم المواثيق=ماهي سواليف الرعاه الغلابه
حنا فخرنا مايجي فيه تلفيق=حنا فخرنا سيف يرعف ذبابه
سيفٍ يخلي ناطحينه مشاليق=سله عتيبيٍ وطوح جرابه
في نجد ما نحتاج راوي وتصديق=تشهد ضلاعينه ويشهد ترابه
تمشي من الكعبة إلى قمة طويق=ما تمشي الا في مرابع عتابه
قبيلةٍ ما مثلها في المخاليق=الله عطاها قو باس ونجابه
ذباحة الحايل كرام مطاليق=لطامة العايل نهار الحرابه
قومٍ اولي باس شديد بتوثيق=الله ذكرهم للنبي والصحابه
عقبان نجد ومشفيين الملاحيق=لاصاح صياحٍ وشبوا لهابه
وانكبت السلفان ثم الجمل سيق=وتلافت الفرسان مثل الذيابه
وبنوا بيوتٍ كنهن المشاهيق=وساقوه فنجال السطر وابتدابه
حرٍ على طلعه يتل المسابيق=حول على شيخ الضديد ورمى به
وركبن عطفهم وانقضن العشاريق=ينخنهم والجيش فيه انحطابه
حساسهن يوم انطلن البخانيق=تكفون ياستر العفيفات جابه
الخيل بالفرسان غارن اطاليق=كل ٍ يبا فعله يظهر جوابه
ودلوا عليهم بالنمش والمزرايق=ضرب يورث في الشجيع ارتعابه
كم شيخ قوم هامهم وايبس الريق=واليا سلم يعدها له كسابه
روقي وبرقاوي ولا فيه تفريق=الجد واحد ما دخلهم خلابه
مالوا من الطايف وركبه بتشريق=على فقارة نجد حطوا انصابه
تمذهوا في نجد زين المطاريق=بالغصب ما جاهم من الناس ثابه
لولا غلا علط الرقاب المداقيق=ما خاليوا برقٍ وعسوا سحابه
عفرٍ ندللهن بقطف الزماليق=لو الحيا باطراف تونس راعى به
تشرب من اجمام الثمل و المخاريق=وتسرح على وجه الخطر ما تهابه
ما رددوهن فالخمر والمداريق=تلقى الجنايز دونهنه اركابه
ولا ولدوهن في خطاة المرابيق= كسايب الظفران ماهي جلابه
حريبهم دايم رحاله مراهيق=حتى من العجه تجيه ارتهابه
والا اقصراهم فالرفاع الشواهيق=وعانيهم دايم عزيزٍ جنابه
اهل الثلاث البيض عند التحاقيق=واهل الفزوع اللي ترد النهابه
يوم ان اخو نوره رفيع المنافيق=قام ونخاهم حصل الاستجابه
مع بيرق التوحيد ساقوا مساويق=جمعٍ عتيبيٍ يحسب حسابه
في المجمعه والحرث وايمن صعافيق=ويوم الرغامه وتربه وش جرابه
كم من صباح دوب شمسه تبا تويق=والعج والبارود له انضبابه
ثم اقتلب ليلٍ وما له مفاتيق=وسيوفنا شهبٍ لهن انسلابه
نضرب بها روس العصاه العواقيق=لين اذعنوا للطوع عقب النكابه
ما طاردت خيلٍ ومدت تفافيق=الا و نصر ٍ فوق نصر ٍ بنابه
ربعي عتابه لاحكمن المغاليق= كم هالكٍ نجوه عقب انتشابه
ابفتخر والا الردي خله يضيق=مدحي لجداني ولابه عيابه
وانا ولد حافي كعام المحانيق=أمجادنا ما هيب لحدن طلابه

كم شيخ قوم هامهم وايبـس الريـق=واليـا سلـم يعدهـا لـه كسـابـه
روقي وبرقاوي ولا فيـه تفريـق=الجـد واحـد مـا دخلهـم خلابـه

قصيدة جزله

وشكرا على النقل

ولكم تحياتي ،،،،