ماخلـد فالوجـود انسـان مهمـا سمـا=لوتنامـى وحاكـى المعجـزه والجمـاد
مات راعي الغرام ومات عـذب اللمـى=ومن ملك رنة الفضـه وطفـل المهـاد
ياكثر ماغدى المبصـر حسـود العمـى=من رسول الحتوف وفي عتيـم السهـاد
كن الانسان بوح الموت عن مـن كمـا=حسرته من ملاقى الحق كـرب ونفـاد
مارمينـا لكـن الله أصـاب اذ..رمـى=والنبي جاد بالبـردة لبانـت سعـاد
أضحت الناس وديـان وجـداول و"مـا"=وانفجر نبع فـي قلبـي وهـب البـراد
ليت مـن هشـم الغيمـات ليـن تهمـا=راعدٍ فالنهار وبـارقٍ فالسـواد
لاجل وادي المراجـل نـد"وادي الرمـا"=لو حدر بالمزون من الوعر والسنـاد
جثة تحـت الارض ومقعـد فالسمـا=لك ياميـت مـن الله لا تجـاوز وآراد
البحر للشطوط بكل حزن ارتمى=من أعالي البحار ومـن موانـي البعـاد
فيك عزى حزانى وانجـرح لسقمـى=وانتصب فالخليج اجلال وابكى الرهاد
وأنت نابٍ لربعك في غضوب الجمـا=ينفرج بك على علج الصعـاب الشـداد
حاضرٍ فالمحافل بيـن فالحمـى=ثابت فالمشاكل ساعـيٍٍ فالرشـاد
من نجومـك وتيجانـك نجـوم السمـا=برقت فالمتون وفكـرت فالوهـاد
قد قطعت البحـور ام الغـرق والظمـا=وقد حرمت الشغور وقد جلبـت العتـاد
يا ابو نايف لعـل المـوت مـرك كمـا=نفحةٍ مـن بـراد ونعسـةٍ مـن رقـاد
شبت طيب ومت اطيـب وفرعـك نمـا=كن عمرك خضار وكن عمـرك جـراد
ياللوا ركـن صافـي العهـد والإنتمـا=للفهد والبلـد يامـن تفانـى واجـاد
ورثـك الديـن لعيـال ماهـم بيتـمـا=فالصحن والفزوع لكل ضيـف وجـواد
آهتيـن آهـةٍ سـودا تـتـل دهـمـا=واحده من حريق وواحـده مـن رمـاد
أعذب النـاس حنا:خيـل وارض ودمـا=واطيب العرب فالراي العوج والسداد
فازرق اليم والصحرا وكبـد السمـا=دوم اصابيعنـا بيـن القلـم والـزنـاد
في ذرى اللي حديد المعركـه لا حمـى=يطرقونه على نـار الغضـى والعـراد
لابـةٍ ماتـراز احلامـهـم وغشـمـا=في صباح الحروب وفي ظـلام الهجـاد
يدمحـون الزلـل والمخطيـات انـمـا=مـال حرابهـم عقبـى ولا لـه معـاد
للمعادي هجوس وللظلوم اخصما=وينقلـون الكلايـف مبطيـات وجـداد
يوصلون الضعيف ويصلحـون غرمـا=عرشهم فالشمم وقصورهم فالحماد
حاجـر العـز رقروقـه ونجـد الكمـا=كنهم فالفصول وفعلهـم فـي العبـاد
فية طويـق وحجـاز النبـي وضرمـا=في سواد العيون وفـي سويـدا الفـؤاد
ماخلد فالوجود انسـان مهمـا سمـا=وللعلي الكبر..وألنـا نهـار الجهـاد