ياصحابنا ودنا في شوط قبل السحور=في ليلتن بامر ربي غاب شيطانها
اللي تقدم هلا واللي يغيب معذور=ولابه بيوتن تقوم بغير عمدانها

عل وعسى يالعطاوي عمت سبع البحور = في ليلة ٍ للآوادم عالي ٍ شانها
اليا قريت الكتب ميزّت معنى السطور = وآنا اعرف بيوتكم وآعرف سيسانها

عطني علومك وعجل لاتلف وتدور=والخيل ياصاحبي في وسط ميدانها
خابرك ياراعي الدحه ولابك قصور=لكن لاتشغل العربان فاوطانها

ياللي عزمت العرب وين الصحن والقدور = ياليت بعض البضايع وسط دكانها
حنا عمرنا القصور ولاهدمنا قصور = وانته نصيبك من العمهوج كرعانها !

بعض العرب صار في تال الليال معثور=ياللي تجيب السوالف وين برهانها
قسمي من الطيبه معروف منذو عصور=والا انت لو انشدك ماقلتلي عانها

ياطير ياللي عجزت تطير مثل الطيور = ياليت لك جنح يشبه شكل جنحانها
ودي امد إلك يالطيّب بطاقة عبور = لكن صكت بنوك الغرب بيبانها

البندق اللي معك ياصاحبي ماتثور=والا غشيم وجهلت بوزن نيشانها
اليابحثت الرجال يبين ما فالصدور=لكن عود علي الديره وسكانها

اعلومك مزيّفه واعلومنا ماتبور = لومال ميزانكم مامال ميزانها
لن عدت ولاّ لفينا علة ٍ فالنحور = كم قوم ناصل ديّرها ونكحل اعيانها

علومنا ثابته والحشر عقب النشور=ياللي كتبت الرساله وين عنوانها
مايفعل افعولنا ياكود رجلا صبور=لكن ريح ضميرك واجلس اوزانها

ياقوم ياهل الوفا لاتنبشون القبور = خلو الجنايز على ماقيل بااكفانها
والله ونعم بعتيبه وافيين الشبور = بالواجبه والمعرفه طالت ايمانها

خاو النشاما وتلقي مع هل العرف شور=ومشي السفينه تراه بحكم ربانها
حنا هل الاوله ياذيب وانت مخبور=من الابتن ما جهلنا فعل فرسانها

محمد // عقاب

صحت ألسنتكم طاروق راااااااااائع

كلام تشكرون عليه

سجلا إعجابي وتقبلا مروري





محمد هناااااا بيت 10 على 10

تحياااااااتي