يابو فلاح الضلع واحد والحجر منه وفيه=لكن وشعندك على الوديان دربيت الحجر ؟
العام يسرقك العماوي والصماوي واالسفيه=واليوم تسرق خزنة السلطان ياشيخ الغفر ..!!

ما تقرب الشكّات من يمشي مع الدرب النزيه=اللي مع الروّاد أخذ دوره على سطح القمر
حدّد هدفك و لا تجيب من الكلام الاّ الوجيه=ان كان عندك يا وسيع المعرفه علم و خبر

يالروقي اللي كلمته تحط عقله في يديه=حنا بشر وشلون مانزعل على الدم على الحمر .. !!
اليا هرج مجنون صفقّ له ولا تضحك عليه=واليا هرج عاقل بكلمه جعله بسد النحر .. !!

بعض العرب لو هو يدوّر وين عقله ما لقيه=يمكن فقد عقله بعد ما صابه جنون البقر
ما جت لك الدعوى على علمّ تباه و تشتهيه=احفر لعلمك في ضميرك يا ولد عاصم ,,, قبر

قال المثل من مايعرف الطير الاشقر يشتويه=ياطير طير ولاتدور عند ابن عاضي وكر
البيت باقيله عمود وطنب يابيض الوجيه=تفرقوا لاهبت الحايه وجاب الله مطر

وجهك رضي ... من قالك يا صاحبي وجهك كريه ؟=أكيد هذي يا وسيع المعرفه وجهة نظر
من يقتدي بالجدي في مسراه و الله ما يتيه=ما فيه غير العلم هذا إن طال علمك و إن قصر

اليوم لو جبت الهوا في يدك كلً يشترية=ياللي عقدت الموتمر ولا حضرت الموتمر
عينك على الراعي تبا تاخذ عصاته وتعصيه=وحول عليك الذيب ابو نابين وافتك البشر .. !!

الظالم ,,,, الله يالعصيمي يقطعه من والديه=عنها يبا يسألك ربي في عرَصات الحشر
للعلم اشاره ما فهمها غير من عقله نبيه=يا راعي الزورق غرقت بدفرة أمواج البحر