يا سلامي يالصحيب اللي شغلت أفكاري=لو أبا أرسل لك عذر ما سدّ عن محضاري
مير انا لي صاحبٍ شرواك وانته تدري = رحت له تكميل في حفلة ولده مشاري
والله إن الأجودي يا دوب دوب أعذرني=ثم ما صدّقت على الله وجيتك ساري
أنــْهَم الموتر وهو ضاري بقطع الفرجة = مثل يوم إنّي على كسب الجميلة ضاري
من غلا فوّاز مدري موتري كم يمشي = أثر كلّ الخطّ رادارات ماني داري
ما دريت الاّ بوقفة راعي الدّوريّة =حين حوّل قلت له وش انت قال مطاري
قلت حيّ العزوة اللي فعلهم يكفيهم =عزوةٍ تاريخهم يشهد لهم من ضاري
قال وافي مير ما علّمتني وش ترجع ؟ = قلت أنا ساسي عتيبي وافتخر وأماري
عزوتي سقم الحريب ليا رقص شيطانه = مثل ما سقم الشياطين الشهاب الناري
قال والنّعم وفمان الله واصل دربك = قلت ما قصّرت واللي يكتب الله جاري
وجيت يا فوّاز في حفلتك رافع راسي = والمعزّة تجبر الصاحب يجيك إجباري
والله إنـّي ما اتخلّى عن لزوم أصحابي = زال أنا متعافي وراسي يشمّ الذّاري
صاحبٍ يوفي مع اصحابه ونعم الشارب =وصاحبٍ ما يوفي أصحابه وقطع الطاري
والقصيدة غالية مير انت تستاهلها =غارك ليا قال صلّح قلت دوّر غاري
وانت ما ودّي لك الاّ بالبيوت الجزلة =وإن حصل مني قصور يكمّله معذاري
ودّي اسوّي من الابيات ما لا سوّي =مير أنا قايل لك ظروفي وكلّ اخباري
والله اني يوم اشوف ظروفي اللي عندي =لو أسوّي بيت واحد كثّر الله خاري