يالشطيطي خلّها بيني وبينك عالميّة = لين نفتح سدّ مآرب باليدين وبالمساحي !!
يوم جاني علم من يمّك يضحّكني شويّه = اشهد انّك يالمطيري صقر خفّاق الجناحي !!

مرحبابك ياهلابك عدها روحه وجيّه = والوعد من بيننا يا صاحبي نور الصباحي
محتسيهم بالصقيل ومحتسي بالنافعيه = ان بغوها جد يا فواز ولا بالمزاحي

لدّ في حيد الجبل وتشوف عنزٍ عارضيّه = قوم لين نرد مذهوب النّشاما للمراحي !!
والله انّك منت عيّه يوم انا ماني بعيّه = مار من يبغا كفاح القوم يبشر بالكفاحي !!

طالبك ياصاحبي لاتزيد كي الجرح كيه = نص معزا القوم يافواز مبداها النطاحي
شلة الارهاب تشتم نهج ربي مع نبيّه = والله انا مالقينا بينهم رجال صاحي

العلوم الها مفسّر والنّشاما مرضويّه = لاتحسب ان الحيا موجود يوم البرق لاحي !!
الله الله لو تهب الشام ولا العقربيّه = ولو يسيل السّيل يامقوى حصاتك يارزاحي !!

ميسي فالنار يافواز دام النار حيه = والمريض بميسمي بأذن الولي همه يزاحي
اشهد ان عزوم قلبك يا ولد عايش قويه = تفلج الصفين والهيبه على روس الرماحي

صادق اللي قال خندف ساس شي اسمه حميّه = يالشّطيطي والله ان الفعل غير اعن الصّياحي !!
الشّطيطي محزمي مدري سلاحٍ في يديّه = وان زهمته ماوردت الا على العد القراحي !!

ابك هاذي ما تبا مفتي ولا حاكم قضيه = كاسبين الاوله لاهنت في كل النواحي
وانت يافواز تنطح من عيال القوم ميه = ثم راحو كلبوهم مع مراويح الرياحي