انا ماودي ابدا كلامي بالمشاريه = ليامنا بدينا بدينا بالسلامي !!
يبن سرحان وش هالكلام اللي تغنيه ؟ = وانا اللي ماتجيك الخطيه من كلامي !!

يافواز السعيدي طريقك جيت مخطيه =لكن ابشر بترحيبة ٍ تجلا الملامي
تراك ابعيد عن هرجة المنقود ياهيه = مصيبة كان حطيت راسك فالخطامي

ليا لديت للشوك ماني بمتوطيه = تقديني عيوني ومشيي بالنظامي !!
سمعنا علم والعلم من بعض الخطا فيه = واشوفك كنك تقول رميه دون رامي !!

احسبنك تجي عند ظني يوم توحيه = واشوفك ما تميز الحلال من الحرامي
بعدها يالسعيدي كفا وش عاد ترجيه = خسرت السيف والبندقيه والحزامي

ترى لو كنت تدري عن اعريج ومغازيه = كشفت السر بين البطاحي والنعامي !!
وانا حبيت اعلمك قبل انك تعاديه = لعلك تفهم العلم ياراع الوسامي !!

اقلك يالسعيدي عسى الله يرحم البيه = اشوفه طاح بين العرب ماعاد قامي
لكن ابعد عن الفتنه اليا صرت حازيه = وشيل الحمل ياشعيل من فوق السنامي

ابن سرحان اباحط وسمي في علابيه = لعله يترك الحذف ويزول العرامي !!
من اول واحليله وذلحينه مدانيه = لكن ادعو لهذا الثبيتي بالرحامي !!