بذكــر الله أبــدأ القـول بسـم الله الرحمــن = عسى الله لقـــول الحـق والصدق يهدينـي
وصدر الزيادي فاح كالمسك والريحــــان= بزين المعاني غاليات المثاميني
كما العود والعنبر وعطر الزهور ألــــوان= ليا فاح عطــــــره مع زهور البساتينـــــي
سقاها من الوسمي صدوق المطر هتـــان= عليها تكســـــــر ماه ليلـــــــه ويومينــــي
وغب المطر ريح الزهر يجلي الأحــــزان= ويبعد هموم اللــــــي ربـــــوعه بعيدينـــي
سخرت الكلام خيار مــــن طيب القيفـــان= يسر العــــوارف والرجــــال الحكيمينــــي
فأنا من دعاة المجد والديـــن والإيمـــــان= وزين الفعـول اللي علــــى الحق والدينــي
فأخذ جابتي يا نمر وأســـرح به عجـــلان = على سابقات الصوت ذالحيــــن ذالحيــني
تبلغ لكل سبيــــع والســــادة الشيخــــــان= كلام المعــــــزة للرجـــــال الحشيمينــــــي
رجال غلاهم يسكن الفكـــــر والوجــــدان = علينا عزاز وجـــــــد بالحيـــــل غالينــــي
مكلف توصيل طيب القــــول والألحـــــان = لربعن علــــــى الخرمـــة ورنيــــه مبنيني
وهيضتني يا حمود طيـــر الجبل حــوران = بقول يشرف للرجـــــــــال الفهيمينــــــــي
سوات الذهب والماس مــن غالي الأثمان = قليله يرجح مايــــــــلات الموازينــــــــــي
يابن زامل الممدوح يا راعـــي الإحســان = عزيز ومدح بالفعـــــــل ربعن عزيزينـــي
بعيد النظر والمعرفة يا رفيـــــع الشــــأن = رفيعن مقامك بين الأقصـــــى والأدنينـــي
ولا هي غريبة مدح جيــــرانك العتبـــــان = وهم مثلكم في قمة المجد باقيني
وربعك هل الغلباء هواة الظفــــر سبعــــان= سكنتوا فروع المجــــد وبها مقيمينـــــــي
ذرى اللاجي المضيوم والضيف والجيـــران= بحق الخوي والجـــــار بالحيـــــل وافينـي
سبيع الظفر والجود والنعم بالسبعان = هل المجد وأهل الطيب والمذهب الزيني
رجال العقيدة والهدى وللهدى عوان = عوارف كرام حشام عقال صلفيني
يفوزون بالجولـــــة ليا طبـــــوا الميــدان= على سابقات الريح مثل الشيــــاهينـــــــي
لياقالوا الفرسان وين العقيـــــــــد فــــلان= ولا فاض بحر الموت وردوه عجلينــــــي
وكنه عليهم مثل عد ـروى مليـــــان= ليا صبحه قطعــــــــــان بدون محيمينـــــي
فعول على معنى وقول علــــــى بــــرهان= أقوله وأثبت حجتـــــــي بالبــــــراهينــــي
تعيش المراجل وأهلها عاشـــت الأوطـان= وعاشوا سبيع اللي على الطيب ضارينــي
يشرف تهشهم لياشافـــــــوا الضيفــــــان= تهشهش عقيـــد فك ربعــــــه مساجينـــي
يحطون جزل الحشو مع دسمت الخرفـان = وجزل العطاء للمعدميــــــن الفقيرينــــــي
مشوا مع أهل الدعوة تحت راية السلطان= بتوجيه أبو تركي كعــــام المعـــــادينـــــي
زعيم الجزيرة يوم عاثوا بهــــا العــدوان= عظيم العزوم من الملـــــــوك العظيمينــي
وعاشوا حماة المملكــة درة الأوطـــــــان = ليا كبروا للمعـــــــركة والميــــــادينــــــــي
أقوله وانا عائض وآلا ليت يالشيهــــان= تودي كلام قلت للغـــــــرب والصينــــــــي
وابي منك يا طير السعد خافق الجنحــــان= توديه ناس عنه ماهم بداريني
ذكرت الحقايق واحمد الخالق المنــــــــان= فعول الظفر والصدق ترض الفهيمينــــــي
ويا مكثر أهل الطيب والمسلمين إخـــوان= تزين صحايفهم بزيــــــن العنـــاوينـــــــي
وكل الدير برجالهــــــا والفعول تبــــــــان= شمال وجنوب وشرق للطيب حــــاوينـــي
فعول النشامي والمراجــــل لها ميـــــزان= فعول تشرف بأسم أهلهــــا المسمينـــــــي
وانا مع اهل الطالة بعشق العلا هيمـــان= متيم بها فكري وتطرب لهـــــا عينيـــــــي
ولي وزعـــة جزله ولاني بعد قنعــــــــان= وأعرف أنها جزلة وتفــــــرح وتكفينــــي
أريد المزيد وشفــي الفوز يالظفـــــــــران= وجدي على درب المعالــــي موصينــــــي
عوين الشجيع الله وايضاً الكريم معـــــان= هو أعظم كريم يحب فعـــــل الكريمينـــــي
وعاشوا هل الطالات من ماضي الأزمـان= عتيبــــه عتيبـــــه ملحقيـــن المخلينــــــي
عوارف حقوق وعدل يوم الحقوق تصان= نعرف الحقــــوق و للمعـانـــــد عنيديــنــي
خذوا نجد بالقوة وبمعنــكـــب الدخــــــان= مع الشيخ ابن هندي صعوط المجانينــــي
عظيم الشهامة مكرم الضيف والجيعــــان= منحر كبــار البــــــل معش المساكينــــــي
وعاشوا رجال يبذلون الكرم صفطـــــــان= قريبين وألايــــــم صنعــــــاء بعيـديــــــني
ومال بليا جــــــود يفرح به الخســــــــران= حصيل الرخوم اللي عن الحق غادينــــي
وفتى الجود من يدرى الخطاء والفتن لاهان= لياجوبها الأشــــــرار مثل الشياطينـــــــي
مثايل صبين جاب دينــــــــــه مع العدوان= قضى الدين منهم ما بلـــــغ سن عشرينــي
عصاة علينا جرهم نــــــــازغ الشيطــــان= وجونا وجيناهم وصار اللغــــا شينــــــي
تعيش الخناجر والصوك عاشت الأيمــان= وردنا المخاطر مثـــل شهب السراحينــــي
وردنا بها والدم فينـــــــا وفيهــــــــم بـان= نردد عزاوينــــــــا ســـــوات الملبينــــــي
وهذي عوايدنا قديمـــــــــة مــن الجـــدان= وطال النهار وتالـــــي العلـــــم جازينــــي
حسبنا عديم الرأي ناقف كما العميـــــــان= يوم أنا قليل وشاف ربعــــــه كثيــرينـــــي
وأنا أفخر بنفسي وأفخر بربعي الشجعـان= واكرر واثبت حجتـــــــي بالبـــراهينــــــي
وأنا من دعاة الصبر والصبر شانه شــان= عظيم الفوائد والأثــــر والمضـــــامينـــــي
يقولون في الأمثال راع الخطـــاء ندمــان= تجارب حكيمين العــــرب والسلاطينــــــي
وأبي اهدى هدية غاليـــة خص للشبــــان= شباب البــــــلاد الصالحيــــن التقيينــــــي
ترى الربح في طيب العمل عند كل إنسان= وصلاة العتم لاقفــــــا من الليل ثلثينــــــي
جميع الفروض الخمس مع خمسة الأركــان= طرأة الحيـــــــاة وكل شي بها زينــــــــــي
نعظم شريعتنـــــــا ولا نجعف الميــــــزان= ونحفظ حقوق الله على الحق ماشينـــــــي
نحارب دعاة الكذب والزور والبهتـــــــان= وشاة الفتـــــن هم واليهــــــود اللعينينــي
نسر الصديق ونوجع الماكــــر الخـــــوان= نضد الطغاة ونجعل الصـــــاع صاعينــــي
هل العزم نرسي مثل ما تــرسي الظلعــان = جبال الحجاز اللي ورى الطائف يمينـــــي
ودنيا الفناء تجفا الفتـــــى مالهــا خـــلان= وتصخر صناديد العـــــرب والسلاطيــــني
وأنا في الشمال بعيد ساعات من عمــــان= بعيدين في حالـــــــه وحالـــــــه قريبينــي
وأبي شوف قوم شوفهم يرضي الزعـلان= حرار الصقور اللي تســـــر المنـادينــــــي
بدار الحجاز ونـجد واللي ورى الوديــــان= هل الجود واهل المجد في العسر واللينــي
وراسن يبي الطالات والعـز ما ينهـــــــان= عسى الله من العثـــرات والذل ينجينـــــي
نواجه صعيبات المراجل في كثير احيــــــــان= ونرض العميل ونجعــــل الكيـــل كيلينـــي
عظيم الثقة قلبي وراس القســــى مـــالان= وهومات راسي للمصـــــاعب تودينـــــي
ويصعب علينا السهل منها لبعض أحيــان= ومومن كما غيري مع العسر يسرينــــي
وانا والمعاني والمراجـــل ترى صدقـــان= لياجن مثل الحور عفــــــــر مزايينــــــــي
ليالي كثيرة زارني فجرهـــــــا سهـــــران= يجي علم يجرحنـــــــي والآخر يسلينـــــي
وهذا حال من فكره بدرب العلا عشقـــــان=اقروا به العراف قبلــــــي وفــي الحينـــي
ولك الشكر والعرفان يا ناصر السكــــران= كثير العرب واهل الأدب عنــك راضينــــي
برامجك ممتازة وفيها الفنــــون الــــوان= وجمهورها بالفعل فـــــوق الملايينــــــــي
وابي فزعتك ذيع الخبر واسمــع العربـان= هدية ثمينــة للرجـــال المــــــوامينــــــي
واخذ من كنوز المعــرفة طيبات احســـان= وحنا لجلــــب الطيبـــــــــة مستعدينــــــي
عسى الله يثبتنا على منهــج القـــــــــرآن= اله عظيم اسمـــــــــاه تسعة وتسعينــــــي
من أطيب كلام أهديه للشيـخ والفتيــــــان= عسى الله يقبــــل قولـــوا امين و آمينــــــي
واريد اختصر كيف اختصر فاضت البركــان= وابي العفو ياهل المعرفـــة والقوانينـــــي
ليا جتني الزينات طـاب المجـــــــال وزان= سوات النجوم الباسمة تفــــرح العينــــــي
تزين سما الدنيـا ويســــلا بها الولهــــان= واناجي الكواكب والكــــواكب تناجينــــــي
اطاوع بنات الشعر نشطه وأنا عمســــان= مواقف تمر ايام وشهــــــور وسنينـــــــي
وتشرح لي أحجام المشاكل وكان وكـــان= ولا احد درى عنها ولاحـــد يراعينــــــــي
حليل القلوب المستريحة يا بو سلمــــــان= وقلبي مع الأفكار والشعــــــر عاصينـــــي
وابي انخا رجال العلم من صـاد ق الوجـدان= بعد طلبت الله فزعة القــــــوم تشفينــــــي
دواء كل من ياكل ويشرب وهو وجعــــان= تفوت الفروض الخمس ممسين مضحيني
ونبي حل صعــبات المشاكل وكل شي فـــان= بين امة محمد لا تعود فريقيني
ويكفي كفاية يا رسول المعانــــي كــــــان= يا فكر المعاني قـــــل لهــــا لا تشقينــــــي
ولاا حكم على الجاهل ويعذرني الفهمــان= ثمين القوافي فاض مثـــــل البراكينـــــــي
طرايف معاناتي كما بــــــارق الأمـــــزان= وتسقي وطن غيـــــري وتغرق بساتينــي
خطرها عظيم وتحرق الصدر بالنيـــــران= وساعات اطفيها وساعــــات تكوينــــــــي
ازخرف معانيها كما لوحـــــــة الفنــــــان= من المسلمين المبدعين القديميني
بذكر الله أفضل قول من غالي الاثمان = بمويا الذهب والفضة أجمــــل تلاوينـــي
مع الشكر والتهليل والحمد والرضــــوان= ولله نكــــــررها ثـــــلاث وثــــلاثيــــــني
وابي اصعد صروح المجد في عالي المزبان= كما الحـــر الأشقر في طويل المزابينـــــي
صروح بدوها قدمنا الساده الشيخـــــــان= وحنا على الامجـاد والدين حرصينــــــــي
إلهي طلبتك يا الله العــــــون والغفــــران= ومن العسر والمنقود والنــــار تحمينــــي
وصلوا على سيد الملا من نســـل عدنـان= عدد من ذكر ربـــه وصلـــى المصلينـــــي

بدينا بربٍ نزل العصر والفرقان = وهو منزلٍ عم وطه وياسيني
إلهٍ خلق مسلم وكافر وإنس وجان = ولا غيره المعبود خلاق ومعيني
وأصلي وسلم عد ما تنبت الريضان = على هازم الكفار في بدر وحنيني
بعدها عدد ما تومي النود بالاغصان = هلا بالرسالة والوصي والموصيني
قصيدة وفاجتني وأنا للوفا طربان = وعرفي مع اهل العرف والفكر مغنيني
واميز وافكر واعرف الزود والنقصان = وغيري رجالٍ في المعاني بخيصيني
حلاة القصيدة لا قريت البيوت سمان = وحنا على بعض الطواريق شفقيني
قريت البيوت اللي كما اللول والمرجان = عن الزاد والما يا هل العرف تقريني
وانا شاعر الوديان يا شاعر العتبان = ادل الدروب وشوف عيني مقديني
ومن يفعل الاحسان مااجزيه بالنكران = وسلم العرب تجزي هل العشر عشريني
بعدها باطرش لي كتابٍ على العنوان = على اللي محيلتٍ لها قيس حوليني
زواها الحيال اسديس ما درجت حيران = ومن جيش بن ثاني ثمنها ملاييني
ومبرومة الفخذين مفتولة الذرعان = وكن الشرار بعينها راسها زيني
رعت مقدم الوسمي خشوم الركا وذقان = ومصيافها بين الغراميل عاميني
تقطف زماليقٍ سقا نبتها الودان = بعد سيله الاول قفنه وداديني
غدت كنها الادمي بالاوصاف والالوان = تهوم الفحل لكن عنها معديني
عمانيةٍ لا زرفلت تسبق الغزلان = وفج الزغون ولا تنوش الذراعيني
عليها الشداد ومزهب الطرقي العجلان = تماوى جنايبها من يسار ويميني
وتسرح من الفيحا مع الصبح لا من بان = عليها غلامٍ كل ما انخاه يشفيني
مضراً على قطع الخرايم وسيع بطان = أمينٍ على الاسرار ما هوب مسكيني
تمر بهل الخرمة مع الظهر والاذان = ومقيالها في كشب بين الصلاتيني
ترحب بها روقيةٍ يذبحون الضان = وساع الصدور وبالجمايل حضيضيني
وتالي نهارك حسها تاصل امسيان = مساك المدينة غيبة الشمس ممسيني
ليا اصبحت زاور مسجد الهدي والايمان = وسلم على خاتم جميع النبييني
وتوكل على الله وارخ لشعيله الارسان = ترى اللي تبيهم يانديبي بعيديني
تنحرغروب الشمس كنك تبي عمان = تنحر تبوك قصورها والبساتيني
وتنشد ليامن جيتها وانشد العربان = عن اللي على شانه من البعد عانيني
ليا قلت ابي عايض تبين وذكره بان = يعرفونه العربان الادنى والاقصيني
ليا جيت بيته رحب وفز لك فرحان = مضرينه الترحيب اهله العريبيني
يعشيك حيل وقبلها الكيف بالرسلان = وعقب الصلف في مجلسه مستريحيني
وعطه الرسالة جعل يفدونك الرديان = وسلم عليه وقل رسولي موصيني
سلامٍ يخص اهل المواجيب والحقان = رجالٍ لهم قيمه وهيبه وذربيني
عتيبه من العارض ليا حرة العتبان = وساع الطعون بنجد مثل الصلاطيني
لهم يشهد عبيدالرشيد وشهد راكان = بيومٍِ على عروى يشيب الرضيعيني
يبي ياخذ الحاكم دبشهم بلا سمحان = وعيا عليه الله وهمه معييني
ولن جيت اعد فعولهم تعبت القلمان = وتعب اللسان وبتعب اللي يحاكيني
وحنا سبيع وسالفتنا لها ديوان = ثمان الخصال مدونه في الدواويني
نذكر بها بعض القبايل عن النسيان = ويدري بها الله والمخاليق داريني
نحط الثلاث لضيفنا والصحون رزان = لو ان الزمان شحيح كنا مريفيني
تسمى الثلاث البيض فازوا بها الظفران = وعمت قبايلنا من رماح لاتيني
ومرتنا تقصر لا خذت طبخة الجيران = على سلمنا ينزل على الراس والعيني
ونعرف قصير البيت ما نقطع العقلان = تجي بالرضا وان كان ما همب راضيني
وسلطان منا والصييفي وبن قطنان = وعجران بيته مثل عد المقاطيني
يعاف المعز ما يذبح الا من الطليان = ولا يثني الدله ليا جوه لافيني
وهذا ما اخذ المداد والراوي العطشان = والاخر يصوت بالعشا للمقليني
والادغم عطاه من الاصيلات بنت حصان = قلعها وطش حبالها للمواليني
وليا من زبن به مجرمٍ يطلبه ديان = ثنى دونه الادغم زبون المجنيني
وهل العشر منا والعوارض من المطران = هذولا وذولا بالفعول امتساويني
والاخرى ليا جتنا القبايل لها دندان = ضراماً يبون الغرس والمشرب الزيني
وقالوا وقلنا مثل ما قال بن هرسان = يجينا الدجر لا غطرفن المزاييني
رسا غرسنا بين القبايل على المشحان = ما بين الدواسر والبقوم وقحاطيني
وحمينا طوارفها بشلفٍ مع الفرسان = وقحص المهار وبالنواميس مرهيني
نعد الحقيقة والرعيه لها رعيان = سوالف عوارف من رواةٍ مواميني
وترى الطيب ما بين القبايل قسوم اخوان = وما قالوا العراف قبلي يكفيني
ليا قلت ذا طيب نشدت ولقيت فلان = وفي كل ديرة طيبين وردييني
تقول الرجال الحجة اللي بلا ثبتان = سواة الربا ما يغني اللي مرابيني
ولا ادخل بيوت الناس لين اطرق البيبان = ولن صكت البيبان ما الله بحاديني
وانا اخاوي اهل الصدق ما اخاوي الكذبان = وبلقا صدوقٍ مثل عايض يخاويني
اخاوي الاسد والنمر واخاوي السرحان = واجنب عن الحصني ويلقا له احصيني
واجنب عن اللي دلوهم تضرب الجيلان = تصدر ضوامينا وهمه محيميني
ودنياك هذي لو صفا لك هواها شان = لها مثل ما قالوا هل العرف وجهيني
تزين الك يوم ويوم تشري لك الاكفان = ويومٍ تضحكني ويومٍ تبكيني
تزخرف لناس وناس توريهم الحقران = وتساوت بها روس العرب والكراعيني
وكم واحدٍ مغرى برايه وهو غلطان = ولو تنصحه قال انت غاوي ومغويني
يبي يرمي البندق ويركز لها النيشان = هذورٍ يحط السود مثل الملاويني
وترى الرابح اللي يطلب الله في الرضوان = وصلى فروضه لا اذنن المواذيني
وزكا وصام وحج واطاف بالاركان = وصلى النفايل والمخاليق غافيني
وحمدناك ياربي على الامن والآمان = بظل الملوك اللي علينا مذريني
وراح الجهل ومكاون الكون والاكوان = عوافي كما قال المثل ومتعافيني
وترى الفضل للي جعل قبره رياض جنان = ويكسي ثرى قبره ورود ورياحيني
عشير الطموح اللي تكحل له الاعيان = تغزل لبو تركي وتطرق له العيني
بعد غاب عنها حرمت عقبه الخلان = ترجاه رجوى الغيث بدوٍ محيليني
وتوجه لها بالسيف والرمح من دسمان = بشلفاً بيمناً تودع الراس قسميني
من السيف وردهن كما يارد الضميان = على حزبٍ واللي عليهن شجيعيني
وتعزوى بنوره يوم حول على عجلان = تحت شلفهم قصوا علابيه عجليني
وله صوتوا بالحكم من عالي الدرجان = لعبد العزيز يبايعونه وفرحيني
وجمع شملها وارسى القواعد على سيسان = ودرس عيال اهل الغنم والبعاريني
وصارت سعودية من الشام لا نجران = وحكامنا منا وفينا واصيليني
صلاطين نجد اهل الفخر والاصل ويلان = ملوكٍ من اولهم على الحكم راسيني
صقورٍ ليا ضاقت تساجد لها العقبان = وحلوين للصاحب وللخصم مريني
وعسى الله يعاونا على طغمت الطغيان = يخذل اليهود وينصر الله فلسطيني
يعجل بنصره ضد عبادة الاوثان = وتفشل خطط شارون واسحاق رابيني
ويا احفاد ابي بكر وعمر وش هذا الخذلان = فلسطين تنخاكم ولا نتوا بموحيني
متى الله يقوم نصر من ينصر اليتمان = ورملاً ولدها ذابحينه بسكيني
هدم بيتها شارون وانهدت البنيان = وحول صواريخه على راس ياسيني
وترى القدس ياهل القدس ما غاب عن الاذهان = وحنا هله وليا متى عنه ساهيني
ومتى المسلمين من العرى تكسي العريان = وينخا فهد من عام سبعة وستيني
ومتى يا فهد تسجد وتقرا به القرآن = تجدد عهد فيصل بعد عام الالفيني
فهد يا فهد يا للي لك المسلمين اعوان = تراك الزعيم ومنك وبك امتقديني
على القدس قدها يافهد بمرة الرحمن = ترانا بحيل الله ودينه قوييني
وخله يقود الجيش عبد الله وسلطان = سلايل هل التوحيد في الحرب صاطيني
نجاهد عدو الله لو انا على الكيعان = ننال الشرف وان كان متنا شهيديني
حياة المذلة ما بنت للرجال اوطان = يشدون واصحاب الشجاعه مقيميني
ومن يامن العقرب كلت رجله الديبان = وعدوان ابوك وجدك النا مغليني
شباب الوطن عضوا على الدين بالاسنان = ولاتمرقون ولا تصيرون عاصيني
ترى الله ومرنا بالوسط مانجي رهبان = ولنا في حبيبه قدوةٍ يالمحبيني
ولا تنزلون بمنزل الجرب والهيمان = ترى الشر جوكم به هل الشر غازيني
غزوا بالحبوب اتدمر العقل والابدان = ورحتوا مهبل عقب مانتوا بصاحيني
ترى العقل للرجال هو شوكة الميزان = ليا مالت الشوكه تميل الموازيني
وانا قبل اقوله قالها قبلي الويحان = وحنا مع الغدرى على الجدي ساريني
وشعبٍ بدون ارجال لابد ما ينخان = تخيب البلاد ان كان اهلها ضعيفيني
شباب الوطن هم ثروته عسكر الميدان = عيال الرجال اللي على الحرب ضاريني
ليا ناحر الحراب ما دبروا ذلان = يخافون من هرج القفا في المقفيني
وتمت وتم القول يا عايض كحيلان = ولا ينقطع حبل الوصل بينك وبيني
ومنك اعتذر لا تحسب ان البطا هجران = ظروفي عن الواجب وشرواك تلهيني
عسفت المعاني لين صعب المعاني لان = وخليتها تسهل من الصعب وتليني
ومبدا الكلام انهاية القول والختمان = واصلي على خاتم جميع النبييني

المشاركة الأصلية كتبت بواسطة خلف الروقي (المشاركة 925087) قصائد رائعه صح لسان الشعراء .. لاهنت ياهايل على النقل الموفق دمت بود