بسم الله الرحمن الرحيم

السلام عليكم ورحمة الله وبركاته




ديوان الشاعر الكبير عوض الله بن رجا - رحمه الله تعالى -

نسبه و نشأته :

هو عوض الله بن رجـا بن عايد بن بخيّت الجعيـد العتيبي
ولد و نشأ وترعرع كبقية أفراد القبيلة في شقصان وما حولها من مناطق الرعي حيث أعتاد أبناء القبيلة على التنقل من منطقة إلي أخرى طلباً للماء والكلى ، و بعد أن تقدم به العمر انتقل إلى مكة المكرمة - حي المعابدة - حيث يوجد منزله على الشارع العام ( الأبطح سابقاً ) ولم يحضرني تاريخ ولادته ولكنه توفى عام 1387 هـ بمحافظة الطائف عن عمر يزيد على المائة وقد برع في شعر النظم كما برع في شعر المحاورة حيث له عدة قصائد شعرية في وكذلك محاورات مع كبار شعراء المحاورة في تلك الحقبة من الزمن كأمثال شعراء بني الحارث – مريسي و مستور بن طمسه و إخوانه – و عوض الله بن مسيفر الزايدي وكذلك شعراء من الثبتة و المقطة .


قصائد النظـم

. القصيدة الأولى ( البيعة ) :

قال الجعيد اللـي ليـا قـال مـا تـاع=كلامه أحلـى مـن شـراب العـدودي
وأحلى من البـن اليمانـي ليـا فـاع=في مجلـس ٍ فيـه النشامـى قعـودي
وأكن سـري بيـن قلبـي والأضـلاع=وإن هاض صدري رد زيـن الـردودي
يـا الله ياللـي للمخالـيـق سـمّـاع=ياجيـد ٍ مـا مثلـه أحـد يـجـودي
ياللي ليـا مديـت مدتـك فـي سـاع=مـدك و لا مـد البخيـل الحـسـودي
طالبك مـن نـو ٍ سحابـه ليـا مـاع=يسـق الديـار المسنيـات الخمـودي
ياركـبٍ مـن عندنـا فـوق مطـواع=و قـم الربـاع مشرهينـه قـعـودي
يشدا الفريـد ليـا تميـز مـع القـاع=ماعـاود إلاّ فـي عــدام النـفـودي
ودوا كلامـي يـا موديـت الأسمـاع=ودوه لآل سعـود أهـل كـل جـودي
الحكـم لآل سعـود مـا هـو بـدّاع=مـوارثـاً لأبوانـهـم و الـجـدودي
يا ما بدوا بالجمع مـع رؤس الأرواع=كلٍ شـرب يـوم أصطفـاق الـورودي
هـدوا ومـدوا يـوم مـدات الأبـواع=ليـن ٍ قـر الحكـم بـيـن الـحـدو
ليـن ٍ كـل كـال بالمـد والـصـاع=مازعزعوهـم بايقـيـن العـهـودي
هـدوا وردوا ليـن راع الخـطـأ راع=ليـن ٍ عـود كـل عـاصٍ عـنـودي
وموج البحر ما يقطعـه غيـر شـرّاع=حظ الفتى من يوم هو فـي المهـودي
وإن جاء الولد من مجلس الجود وسباع=يصبح كماهم فـي المجالـس قعـودي
تـرى عريـب الجـد ينشـأ وبـتّـاع=يطلـع كمـا جـده ويرقـى سنـودي
بيـت الشجاعـة للشجيعيـن مرجـاع=والسلـم مـا يحفـظ يقـع بالعـدودي
والصقر أله في ماكر الصقـر ميقـاع=مـا يبـدي إلاّ فـي طويـل الحيـودي
والبيت ما يبنى بـلا أطنـاب و شـراع=مـا ينبنـى إلاّ بالـذرى والعـمـودي
والرأس ما يومـي بـلا جنـب وذراع=والجنب عزه مـن شديـد العضـودي
الحق أله سـدة وألـه بـاب وأسنـاع=مـا فيـه بـاع ومشتـرى بالنقـودي
ون كان جاء في الحق شاري وبيّـاع=يضيـع بيـن المدعـي والقـعـودي
أوصي هـل الذمـة مـدورة الأطمـاع=على رضا الله حد هم فـي الوجـودي
لابـد يـوم فيـه نـزلـه ومـطـلاع=مـا شاهـد إلاّ الله خيـار الشهـودي
يـوم مـال العبـد عانـي وفــرّاع=غيـر العمـل ومبايحـات السـدودي
هذا كـلام الصـدق مـا هـو تبـرّاع=ما هو كرم منـي ولا هـو حشـودي
الصدق أله وزاّن لن مـا وزن ضـاع=يضيع بيـن اثنيـن مـا فيـه فـودي
الصدق ما يوجد يقـاع عنـد صنـاع=يصنع كما رمي أم خمـس الركـودي
والكـذب لا يشـرى ولا هـو منبـاع=دائـم مثـل حـب الرحـاة اللكـودي
تسعين عام موزن الهـرج مـا تـاع=حافـظ جوابـي مـا تبيـح سـدودي
ردوا عليه يـا هـل الـذرع والبـاع=فيمـا عليـه تنـقـدون الــردودي
أنــا كـلامـي لا يـؤديـه تــواع=تـرى كـلامـي للقبـائـل فـيـودي
يا جعل من ودّاه فـي غيـر الأسنـاع=يبـات خائـف فـي طويـل اللحـودي
وأختم بذكـر الله علـى كـل الأنـواع=عـداد نـو ٍٍ مـن سحابـه يـقـودي
نو ٍ من المنشـأ يجـي لـه تزعـزاع=في الزعزعة جاء له تزاهـم رعـودي

------------------


. القصـيدة الثانيـة :

الأوله فتح بـاب : ذكـر الله أحسـب جـواب : اللـي ليـا راد جـاب=
اللي أعطى الماء بلاش : وأخرج من الماء المعاش : والكل منه استعاش=
أنا كلامي مليح : من اللسـان الفصيـح : مـا أقـول غيـر الصحيـح=
قال الجعيد العريب : اللي كلامه عجيـب : مثـل العسـل مـن صليـب=
ما جابه إلاّ النحال :من وادي ٍ عقـب سـال : نبـت الحيـا فيـه طـال=
بعـد تثنـى حيـاه : مـن كـل عـود أجتنـاه : جابـه وزيـن بنـاه=
يا حافظين الجواب : المـدح حـد الشبـاب : وإلاّ ليـا الـرأس شـاب=
يا اللي تبون الفيود : اخذوا مـن المـدح زود : قبـل القبـر واللحـود=
من فاد بنت النمور : يجي ولدهـا صبـور : وليـا دعـي مـا يبـور=
وليا دعاه العميـل : مـا قـط يبـدي ذليـل : يأخـذ ويعطـي الدليـل=
وليا بدأ في اللزوم : مـا يبـدي إلاّ عـزوم : لـو كـان مثنـي يقـوم=
أوصي ثقات الرجال : من أخذ بنت الهـزال : لـو كـان مثـل الغـزال=
يجي ولدها كتيع : وإن هرج هرجه يضيع : وإن بـدأ مـا سـد ريـع=
أناب مثل الثمـود : وأنسـاب مثـل العـدود : اللـي عليهـا الـورود=
الثمد مده قصيـف :جمـة وغـرف كليـف : مـا يـرده إلاّ الضعيـف=
من أتقـى وأستقام:وأعطـى دروب الإمـام :فـي الآخـرة مـا يضـام=
نهـار تشهـد يـداه :والشاهـد الله عــلاه : ويبـيـن الله خـطـاه=
الدين مثـل الوضيـع :مـن فادهـا مـا يضيـع : الله عليهـا وديـع=
الفيد فـرض الصـلاه :مـن فادهـا فـي الحيـاه :لا بـد علـم ٍنـراه=
بيت الشجاعـة عمار:فـي كـل ديـره يـزار: مثـل الحيـا فالديـار=
يـوم النهـار الكبيـر :نهـارة القنطريـر: يشيـب فـيـه الغـريـر=
وتجي الخلايق صفوف=والكـل منهـا يشوف=مـا فـاد مـن طيبـات=

--------------


. القصيدة الثالثة :

( أعتقد أنها اكثر من قصيده تداخلت عند الرواه بسبب تشابه القافيه سوف اقوم بفصلها لاحقاً )

آلا ياراكـبٍ حــر ٍ عــزوم=ليا أعطى مع شديدات الحـزوم
أخف من الطيور اللـي تحـوم=مثـل الذئـب قطـاع الرمالـي
يسرح من طرف مكـة صـلاه=والركّـاب مـا يلحـق قصـاه
أهل شقصـان بالهيـن مسـاه=آلاد جعيد أهل صبـح الدلالـي
أوصلـي أهـل الذمـة وصـاه=قل الصـف لا تشقـر عصـاه
ترى الحصن عـزه مـن بنـاه=يرسي مثل ما ترسـي الجبالـي
أودع لـي كلامـي لا يضـيـع=تـرى عزكـم فـي كـل ريـع
وجبراكم علـى كـل الوضيـع=وترى العز من جبـر الرجالـي
ترى ألكـم عميـلا مـا يهـاب=ولا لـه عندكـم سـده وبـاب
ولا له مـن مواهبكـم شـراب=ولا ني خابر ٍ لـه رأس مالـي
من دون الشفا مـا لـه حـدود=لا لـه لا ديــار ولا عــدود
ولا له عندكـم منـزل جـدود=رأس المسلمـه حـد ٍ هلالـي
روحوا له كما الضلـع العنيـف=اللـي بيـن ضلعانـه منيـف
ليـن يصـدر الـوارد معيـف=ويطـوي صميلـه والحبـالـي
ردوا كل مخطـي عـن خطـاه=وأسقـوا كـل ظامـي منتهـاه
ليـن يقصـب الـوارد رشـاه=ويصـدر عـن العـد الزلالـي
يقوله من بدى رؤس الـرزون=ويغنـي بزيـنـات الّلـحـون
تشـدي در نابـيـة المـتـون=أغني بهـا وإن هـاض بالـي
هـرج ٍ مثـل در المبـهـلات=اللـي ترتعـي زيـن النـبـات
حيـث الليـل يمسيهـا تبـات= ما ترعى يقع بيـض الرمالـي
ترعى في ذرى قيـف ٍ صـلاب=والله مـا يعلـق مـن صـواب
ومضريـن دائــم بالتـعـاب=وألهم فعل يـوم الحـظ عالـي
ذرى مـن يقاضـي كـل ديـن=اللـي فعلهـم دائــم يبـيـن
أهل الكيف والكبـش السميـن=وأهل الضيف في عسر الليالـي
يقوله مـن تهيّـض بالـردود=سوات العسل مـن كـل عـود
وألاّ در سمـحـات الـخـدود=يشدا الدر مـن خلـف ٍ متالـي
اللـي فـي الديـار مشرهـات=من شقصـان جايـه صـادرات
منهاهـا الـحـدود مرتـعـات=من خشم العمود اليـا الظلالـي
من برقه تغـوث اليـا العمـود=مر تعهـن مـن يـوم الجـدود
مـا أخذوهـا مبيحـة السـدود=الأقصيـن منهـم والمـوالـي
ترعى في ذرى سمـو الجعيـد=اللـي لبسهـم صافـي الحديـد
والمخطـي عليهـم مـا يزيـد=نثني شاربه لـو كـان غالـي
أبـن --- القيـف العـصـاه=قيفاً مـا أحـد يلحـق قصـاه
ثنينـاه عـن طـاري هــواه=وأسقينـاه مـن مـرٍ وحالـي
جزينـاه فـي ذبـحـة قـيـا=في قاصـاء ذبحناهـم قضـى
درى عنهـم اللـي مــا درى=على وضح النقى الأبيض يلالي
أخـذنـا الـلـوازم باليـديـن=مـن الأجنـبـي والأقربـيـن
وقضينـا مـن الدّيـان دينـأن=أن هبت صبا وأن جت عوالـي
ودورنـا --- فــي خـطـاه=من دوّر علـى المخطـي لقـاه
سبـع سنيـن موبلتـه يــداه=عنّا فـي ديـار هذيـل جالـي
جزينـاه فـي السبـع السنيـن=وجلانـا مـلامـه باليـديـن
الله ثـم القبـائـل خابـريـن=جزينـاه فـي طـول المهالـي
نقانـا بسبعـه فـي القصيـر=اللـي فـي ديارنـا مستجيـر
وش حده علـى ذبـح القطيـر=مـــا حـسّــب خـطــاه
أول وتالي والثامن --- ٍ صليب=-جانـا فـازع ٍ مالـه عزيـب
ولا لـه عندنـا حقـاّ مصيـب=وأخذ مع طلوع الشمس فالـي
وقف لـه صبـي ٍ مـا يهـاب=كمل به على السبعـه حسـاب
خلينـاه طايـح فـي الجنـاب=دمه في أسفل أم عظام سالـي
صبرنـا علـى الحمـل الثقيـل=وذبحنا الكحالـه فـي الصميـل
شقـه واحـدٍ مخـط الدلـيـل=ونقانـا بسابقـهـا الطـوالـي
آلا يـا لله يـا مبـري العليـل=تجافـي عنـي الحمـل الثقيـل
ليا هالوا علـى قبـري النثيـل=وفارقـت القرابـة والأهـالـي
وتهديني علـى تقـوى وديـن=وتعطينـي كتـابـي اليمـيـن
ليا جونـي بـه الربـع الثنيـن=وليا أنه مـن السيئـات خالـي
ليا واتيـت مامـؤن الحسـاب=وسألنـي يبـي منـي جـواب
وجاب اللي عملته فـي الكتـاب=وهو مرفوق وأما أنـا لحالـي
كـلامـي يــورخ بالثـبـوت=يقعـد حـي دائـم مـا يمـوت
ويذكر في القوائـم مـا يفـوت=يذكر في الكتاب وفي السؤالـي
كـلام الجعيـد اللـي قصـور=وليا أنه هـرج مـا قـال زور
وليا قـال ألـه قـول مخبـور=ينقـد جابتـه نقـد الريـالـي
ليا هاض صـدري بالهجـوس=أنقدهـا كمـا نقـد الفـلـوس
للـي فـي مجالسهـم جلـوس=كلامـي يــورخ للرجـالـي
كلامـي يفيـده مــن يفـيـد=ولا يفتـاد منـه إلاّ الرشـيـد
مثل اللي غـزى ويجيـب فيـد=يجيلـه بفـيـد ورأس مـالـي
كلامـي يــورخ وأحفـظـوه=ويا أهل الفيد بالسلـم أشتـروه
وليـا مـت عنـي ورخــوه=مثل اللي يضمن فـي السبالـي
يـاربـي طلبـتـك يــا ودود=ليا أمسيت مـن بيـن اللحـود
لا حولـي صديـق ولا ريــود=إلاّ جالـت القـبـر الهيـالـي
وأختـم بالله الـرب الجلـيـلد=ليـل مـن مـا لـه دلـيـل
مخلّـص عميـل مـن عميـل=آلا يـا الله يـا عـز الجلالـي

----------------

القصيـدة الرابعـة :

المحــاورات :

للأسف لم توثق ولم أجد منها إلا الآتي مع رجائي الحار من يحفظ من محاوراته شي لأن يضيفها لديوانه مع الشكر سلفاً ،،، هذه البيتين التالية قالها لأحد شعراء قبيلة الثبته عندما كان الجعدة في مبدأ علي جيرانهم الثبتة بخصوص زواج أو بناخي أو ما شابه ذلك ، وعند أنتهاء الموجب وركبوا الجعدة مطاياهم أنبرى شاعر الثبتة لا أعرف أسمه وقال :

أنا في آلاد ثبيت سم الجوف=وليـا لفيتونـا هـلا هـلا
أنا أحمد الله بعد زل الطوف=وليـا لفيتونـا هـلا هـلا

فترجل رحمة الله عليه عن ذلوله ورد عليه حيث قال :

أنا أحمد الله جئتكم بصفوف=مثل السحاب ليـا تهلهـلا
الله يخلي لي هل المعروف=جدك يصر وجـدي أبهـلا

وله محاورة مع عوض الله بن مسيفر الزايدي منها :

ابن رجـا :

أم الكباير يمكم تبـا تحيـل=عان العصامي عندكم حيا لها
ولياك ما نيخت للحمل الثقيل=ما ينقل الحملة يكود جمالها

ابن مسيفر :

أنا حكرت السيل في وسط المسيـل=وأقيّـس الحفـرة وأقيـس حبالهـا
خليت حب الحضر في رؤوس القصيل=مـا نـي بكـاره للبـلاد حيالـهـا

وكذلك محاورة أخرى منها :

ابن مسيفر :

والله ما جئت في العين الصغيرة=والشجار الخضر قومنا نصرها
عان من دار الرويس إلي نقيره=في متين العود عقرنـا بقرهـا

ابن رجـا :

يا هل الأمداح ديرتكم بجيـرة=يا حماة سهولها ويا عسرها
عان ابن حجي نزل فيها بغيره=بالجمل وألا بمحجانة كسرها

كما أن له محاورة مع أحد شعراء المقطة يدعى حويكم المقاطي عندما كان المقطة نازلين بجوار الجعدة في وادي الفرعة ، حيث مما قالة للمقاطي :

العافية يافهيـد* الليلـة العافيـة=نباك تشهد وبكرة تنتظـر عيبهـا
أنته ورى مدركة في اللبة الدافيـة=ماشفت بقعى ليا مـدت مخاليبهـا
والله لولا كلمـة للعـرب خافيـه=لتبين لك من ورى الدفه مضاريبها

المشاركة الأصلية كتبت بواسطة داهية العرب (المشاركة 748788) ووووووووووووووووووووووووونعم شاعر قدير ومعروووووووووووووف

الله يرحمه ويغفر له صقر الجعده الله لا يهينك على القصايد الطيبه للشاعر عوض الله بن رجا الجعيد الله يرحمه ولكن تمنيت ان يكون تنسيق القصايد اكثر جماليه لتليق بالقصايد .

عموما الله لا يهينك لجهدك الطيب ونطمع بقصايد شعراء الجعده .

المشاركة الأصلية كتبت بواسطة الاصمعي (المشاركة 748853) الله يرحمه ويغفر له صقر الجعده الله لا يهينك على القصايد الطيبه للشاعر عوض الله بن رجا الجعيد الله يرحمه ولكن تمنيت ان يكون تنسيق القصايد اكثر جماليه لتليق بالقصايد . عموما الله لا يهينك لجهدك الطيب ونطمع بقصايد شعراء الجعده .