سلام يا عتيبة زحول الرياجيل =لطامة العايل وذباحة الحيل=
لكن تو الليل لا يسري الليل= قال المثل من عز نفسه و جدها

ابتدى القاف يا معجب وليلك طويل= مير عطنا علومك كلها كلها
الحمول الثقيلة مالها ألا شعيل= وانت حملتك فوقك شلها شلها

يامرحبا ياحرب يا اهل المهابه=
في حلة العتبان ذروة شبابه=
والليل مايسريه غير الذيابه=
قال المثل من عز نفسه وجدها=

جيت يالحربي وناديت مالك مثيل=كان عندك سوالف هلها هلها
وكانك اعطيت درب احذر عنه لاتميل=والدروب التعيبه خلها خلها

إلك البقا وأعداد مارفرف الطير= ولا اقول فيكم يا بن الأجواد تقصير=
حذرا تقرّب للسيوف البواتير=قال المثل من عزنفسه وجدها]

ما نبالك كثير ولا نبالك قليل= مير عقدتك هاذي حلها حلها
المزون أمطرت والسيل جاله مسيل= قل لربعك يا معجب قلها قلها

الضيف نوفي الضيف كامل حقوقه=
وخوينا طول الزمن مانبوقه=
وعدونا للموت دايم نسوقه=
قال المثل من عز نفسه وجدها=

ودنا فيك يالحربي نسوي جميل=بعدها يالحريبي فلها قلها
نعمه وياعساها يم خالد تميل=وياعسى السيل دارك بلها بلها

الطيب و الناموس كل (ن) يجيبه= ما هو عليكم منحصر يا عتيبة
هاذي مصيبة يالعتيبي مصيبة= قال المثل من عز نفسه وجدها

صاحبك قرم ماهو يالعتيبي ذليل= والسيوف الصقيلة سَلها سَلها
من حمول الليالي وش تحط وتشيل= تِلها يالعتيبي تِلها تلها

عزالله انا ياهذا مانذمك=
واستغرب انه زاد ذالليل همك=
وكان الحقايق تزعلك لايهمك=
قال المثل من عز نفسه وجدها=

لايصيبك شكوك ولايزيد العويل=وان بدالك صعيبه جلها جلها
عن طريق الحقايق لاتدور بديل=والصلاة الصحيحه صلها صلها