من ضمير الشاعر اللي يعشق الجزل ويقوله=مرحبا بالحربي اللي جرته ياطا علاها
خالد أقرب ودي آخذ معك فالميدان جولة=بندقك في ساحة الميدان ما نعرف مداها

البقا بك من ضمير (ن) يعشق الصعب ويطوله = واكثر العربان تدري جرتي تمشي وراها
ابتدى ليلي وليلك وابتدت جولة وصولة = بندقي تاصل هدفها مير لا تقرب سماها]

كلمتك هاذي تدينك معك للسارق عمولة=والحرامية نقصّ اثارها .. نلعن ثواها
الولد لو بس فكر... في خروجه من دخوله=كان يدرك كلمتي لا قلتها ويش مغزاها!!

كم واحد يالعتيبي يعجبه عرضــه وطـولـه=ثـم تطغيه اللعينة لين ياقع في هــواها
الحريب ألي يشب النار و يقرقع طبوله= يظهـر أنه ما يميز وجـه بقعا من قفاها

انت تسبر قمة الضلع الذي ترجي وصولة=مار رجلك ترتعد ما انته موصلها مداها
المراجل يالحريبي ماتجي لك بالسهولة=والليالي لا تغرك.. تحسبه دايم رخاها

هيه ياراع الذلول اللي على الدار معقوله = سرَها قدام ذيب الضلع لا يوحي رغاها
لو تبي كاس البطوله ماحصل كاس البطوله = لا تكحل عينك العورا تسبب في عماها

الولد مع السرعة يسحب في رجوله=والعلوم اللي نبيها ما يوصل مستواها
كلاً شيء نرغبه يالحربي بوقته ننوله=وانت مثل اللي يدور حاجةٍ له ما لقاها

قبل لا ترقى سنود الضلع فكر في نزوله = واعرف ان اللي كتبها قبل يكتبها قراها
العيون اللي تطالعنا بنظرات(ن) خجوله = والله انّا ماحسبنا حسابها لو فاض ماها