تـدري وش أكبر ذنب في الشرع و الدين؟!..=إنك تسب اللي خلقك و تذمه
و تدري وش أكبر عيب عند الميامين؟!..=انك تخاوي لك من الناس رمه
و تدري وش أخطار التجاوز من يمين؟!..= إنه يكون اللي على الباب عمه
والمشكله لا سلهمت فيك بالعين= والريـح تنثر في شعرها وتلمه
يضيع فكـرك بين حد الحجاجين= و يمكن تجيب الكارثه و المطمه
و تدري وش اللي يدبل الكبد ويشين؟!..= بعض القصيد اللي على غير يمه
يا بندر ابن سرور وين أنت هالحين ؟= وين أنت يا زبن الأمور المهمه
وين القصيد اللي يدك الميادين ؟!.= و يهـز شيخ فوق رأسه معمه
الشعر والشعار صاروا عناوين= و مهـبل تشري القصيد وتصمه
صاروا مثل ما قال لعبة وراعين=وكـل(ن)تـربع له على رأس قمه
يقول أنا الشاعر و غيري مجانين= ودك على مجمع حنوكه تخمه
الناس تذبح في العراق و فلسطين=و قصايده يا حلو عينه وفمه
عساه يـؤخـذ في الضحى قولوا (آمين)= اللي بنات الناس شغله و همه
أحد يحاول ستر عذراء البعيدين= و أحـد يدور بالردىء بنت عمه
قد قالها بندر قبل عدة سنين = يثور معها الحـر و يثور دمه
ولا الردي لو مرته بين قوسين=تزول عن عينه مزول المغمه
يا بنت شومي عن أهـل الضعف تكفين=مالك ومال اللي قريب مجمه
والشاعر اللي من رجالٍ مسمين=عليك فرض لازم إنك تتمه
الدار .. والعادات .. والسلم..والدين=ثم عقبها وجه على أياة يمه