| معجب العتيبي |
22-Apr-2008 09:39 PM |
محمد صالح العطاوي
امس معجب يقول اني نصفت الطريق=والسعه ياعرب يامكثر اهروجها
صاحبي مالك له مزرعه بالحريق=مير تال الليالي قل منتوجها
معجب العتيبي
امس قال وصدق واليوم شكّل فريق=يوم بعض السفن ماجربت موجها
لاحصل شي قدم الناس فعله يليق=مشكله فالبلد لاكثرت لحوجها
محمد صالح العطاوي
الفضا في عيونك ياولد لايضيق=ارض ربي ترا ياموسع افجوجها
صاحبي طب وسط البحر واصبح غريق=ومن حسب للدخول يحسب خروجها
معجب العتيبي
ماتضيق الفجوج لكل مجدٍ عريق=والخيول الاصيله جهّز سروجها
البحر ممتلي لؤلؤ وجاله بريق=والعرب يامحمد عبّت دروجها
محمد صالح العطاوي
اطلع اطلع علي قمت جبال الطويق=لين حتي تشوف الدار وبروجها
البحر ماش وسطه ياصحيبي رحيق=وانت تدري بزين الهرج من عوجها
معجب العتيبي
اطلع اطلع وخلك فوق راسه تويق=واحفظ الديره وسلم على علوجها
ادري ان البحر ماطب فيه الدقيق=والجمل يختلف شكله عن نعوجها
محمد صالح العطاوي
انتبه للجمل لصار قدمك طليق=يمكن رقبت الاقشر يمك يعوجها
مير ريح ضميرك واشبع من السليق=بنت ابو زيد نعرف كلنا زوجها
معجب العتيبي
الجمل عاقله بعقال جداً وثيق=مايجي لأرضك ولايمكن يدوجها
بنت ابو زيد يمي قلبها ياصديق=غير يمناي محدٍ قد مسح روجها
محمد صالح العطاوي
ماتودك تجنب دربها يارفيق =يالله انك لبعض الناس لاتحوجها
انت غثيتها وازعجتها بالزعيق=روح لفريقيا واعشق من ازنوجها
معجب العتيبي
والله اني لها يافلان بليت ريق=لين صرت اسكن اللي داخلٍ عوجها
عقب زوّدت يامحمد صفير وصفيق=القلوب المريضه مااعشق تهوجها
|
