يامرجح كان وقتك يسعفك يالله وهيا = غوص بحر المعرفه واجلب لنا لوله ودره
حلمنا حلم(ن) كبير مير عيا ماتهيا = يالله بخير الزمان وكافنا يالله شره

المرجح ياعميلي فالسما مثل الثريا=مايبين فالقوايل لو تناظر فالمجره
مار من شان الطلب جانا كذا (اضغط هنيا)=قلت أجرب واتسمع حلوها وان كان مره

يامرجح صاحبي ماعاد فالدنيا غبيا = البلد قام يتضايق عان بحره فوق بره
الاماني فالزمان الصلف ماتوخذ كذيا = من بغاها فالمسره لازم يدوس المضره

كان ضاقت بك ترى ما أحد"ن" جبرك ابها تفيا=بدل الديره بديره ,,والبلد لله دره
من تعلق بالاماني ميت"ن" لو كان حيا=ولا يحصل من طموحه فاللقا لو كبر ذره

بين وقفات القبول وبين وقفات الجفيا = يمكن اصلي صلاة الصبح في فندق مسره
انت لك عزم(ن) قوي مخاوين قلبن جريا = مير صدرك فاض فيضه مزري(ن) حتى تزره

الصلاة الها المساجد ..والفنادق للبغيا=والكلام الصدق واجب كل من مره يقره
وأنت حر"ن" يعجب القناص ويدق التحيا=مار فالمقناص يمكن يمنعه علم يصره

البيوت اللي ورى قصر الثقافه فالعليا = تاخذ من العلم راسه بالرضا ولا مغره
خيلنا في نجد تركض مانركضها هنيا = والله انه لاحقك منها على الدنيا مبره

أحد ينظر للطمان ,, وواحد"ن" عينه عليا=وأنت عاقل مار أظنك فالعقل من آل مره
قلت هاك العلم لكن هالولد,, :) ياناس عيا=مقفي"ن" والحبل الأصفر في عراقيبه يجره

ماتت الاجساد بس الذكر لازال حيا = رحمة الله تلحق الميت وجر الصوت جره
في ختام القول دامك تشرب العد الهنيا = لاتغثرب ماه وتعود على رزقك تذره

كان ضاقت بك ترى ما أحد"ن" جبرك ابها تفيا =بـدل الديـره بـديـره ,,والبـلـد لله دره