ويلاه يازولٍ مع الخط لقيته=عمره من الخمسة عشر عام وأدون
أذكرك ياربٍ بفضلك عطيته=لين إنه أصبح كامل الزين مزيون
من ناحية شكله وعقله وصيته=وأيضاً عليه خدود ورموش وعيون
شفته نصاني راكبٍ في ونيته=ومن شوفته كني على الكبد مطعون
فكري تلخبط منه وإسمي نسيته=حتى يديني صلّبت فـــالدركسون
كني مريضٍ طامعٍ بالمميتة=وإلا سجينٍ خمسة أعوام مسجون
ياليتني في سكته مانصيته=ياليتني صديت لين يتعدون
ياليت لا جاني ولا كان جيته=كان أستريح ويجلس الهم مدفون
لكن صار مقابلٍ مابغيته=وبعد المقابل صرت أنا فيه مفتون
لو ينشري بالمال كله شريته=في ذمتي لأشريه باللي يقولون
ووالله لو أدري عنه وين بيته =لآجيه لو كل المخاليق يدرون
لو إني أغزي له على بسكليته=خل العرب عني يقولون مجنون!!