ياسلامي ياسلامي للرجال اهل المعالي=للعموم اردده في كل يوم وكل ليله
يا علي يابن فلاح اقلط نبا معكم مجالي=اخبرك قرمٍ شجيع وحملكم قادر تشيله

يا هلا يا مرحبا عداد همّال الخيالي=قلتها باسمي وانا شاعر وأمثّلّي قبيله
هذا انا موجود وإسألني إذا .... عندك سوالي=والاجابه جاهزه ... و النار في خشم الفتيله

دمت يالفالح عساك بخير في كل الليالي=والنعم حازت عليه الهيلا اي والله مهيله
خابرك شاعر وانا معكم طويلاتٍ حبالي=قلتها وانا تراني شاربٍ بحره ونيله

المثل يقول ما شال الحمول الاّ الجمالي=وانت ما أظنّك جمل والحمله الليله ثقيله
بين ابن غانم ذياب و بين ابو زيد الهلالي=جابك الله وانت يا رجال ما في يدك حيله

المثل يقول من حاول اكيد انه ينالي=لكن الليله اظنك ما تحقق مستحيله
يا علي ترى دوام الحال يضرب بالمحالي=مير هد وخفظ السرعه ترى قدمك مسيله

ما يبيع و يشري الاّ رجل عنده راس مالي=العلوم تبين والماء ما تغطّيه النثيله
شدّ حيلك واحتزم ما عاد فالدعوى جدالي=لا تعوّد ما نصفت الدرب والطرقه طويــــــله

احمدالله ادخل الاسواق واشري وبحلالي=ما دخلته ياعلي ياكود ببضاعه جزيله
لا توصي ياعلي من معه قوة احتمالي=امشي الطرقه وانا ياخوك دايم لك دليله

سوقكم دايم رخيص وسوقنا حامي و غالي=ما يطبّه كل رجّالٍ محاريفه قليله
يوم انا اوصيك اعدّك صدق واحد من عيالي=ودّي انّك بالمعزّه تعتلي سرج الاصيله

سوقنا غالي وسوقك فيه نصبٍ واحتيالي=ياجماعه علي انا الليله ابا اطلع حفيله
من عيالك!! ياعلي يا كبرها يا هملالي=لا يغرك شطري الرابع ترى ممكن ازيله

يشهدون الناس فيما قلت الاقصى والموالي=تغلب اليمنى الكريمه مدّة اليمنى البخيله
القمر فبدايته يا صاحبي يطلع هلالي=الله انّه لا يشيلك خلّ شطرك لا تشيله

مابغيت اضربك ويقولون دم الشيخ سالي= يا علي خايف عليك اليوم يلحقكم فشيله
لا تنرفزني واقول اليوم راسك استوالي=وميسمي حامي واكيد اللي ينوشه عزتي له