يابن فلاح اقرب هنا..وحسابك الليله عسير=وأحسب حساب الأوله واحسب حساب الثانيه!!
ياللي تقول أن (الفراع) احسن من (السيل الكبير)!!=وش رائك تقول (المحاني) قطعه من (اسبانيه)!!

الليل انا و ايّاك وتشوف اللذي رايح يصير=مدام ميزان العداله ساحة الميدانيه
آخير عندك سوريا ولاّ جبال السيل آخير=أظنّها افضل عندكم منها ومن لبنانيه

والله ماتاخذ غير قسمك..يالبنادم..لو تطير=ارضى بمقسوم الكريم..وسمّ بالرحمانيه!!
مايهضم حقوق النشاما غير معدوم الضمير=والحسْـد في قلب الحسود ..أكبر من الضلعانيه!!

الطايف أحلى لا تقل جدّه عروس البحر ( غير )=فيه الهوى البارد و فيه الخوخ و الرمّانيه
اليا نزل سعر الجواهر وإرتفع سعر الشعير=بيت الفقر يصبح غني والمغتني فقرانيه

عدّ المصايف في بلادك مير لاتنسى عسير=وأبها البهيه حبُّها بين الضلوع الحانيه!!
بشت الأماره مايليق الا على متن الأمير=وأنته متونك جب لها كوتاً من الدكانيه!!

المبتدى و المنتهى و العلم الاول و الاخير=حكم لك القاضي بلا حجّه و لا برهانيه
خلّ الإداره ما يدير الدايره غير المدير=طيّرتها يا كبتن عتيبه بلا جنحانيه

انا اتحمّل زلتك حيثك كما اخوي الصغير=لكن غيري من عتيبه واحداً زعلانيه!!
والحل عندي ,,كسّروا هاك الرحاء اللي تسدير=والا اتركوها تسدير ونادوا العتبانيه!!

عليك ما نشره يا بو قلبٍ كبر راس البعير=لكنّ شرهتنا على مرزوق بن حمدانيه
الحل عندي .... ما يفيد الحكي والهرج الكثير=بكره يبا يصدر بياناتٍ من الديوانيه