ياطير ياللي فالسماء تكفخ الريش=اقرب وابي عني تودي رساله
للصاحب اللي وقفته كنها جيش=يشفي غليلك لاوقف في مجاله
وصل له المكتوب في حزة غبيش=واوصل سلامي وانشده كيف حاله
وياطير لاشوش بماجبت تشويش=قله ترا هذي جواب ال سؤاله
والشعرصار اليوم ما يوكله عيش=لاصار ماهو عارفٍ راس ماله
مدام مايسرج على قب ويعيش=والذيب من فعله يعشي عياله
والله يسمونه بها الوقت درويش=ويصير في قومه مهمش وعاله
وياطير قله صاحبك لاحقه طيش=يمدح ثقيف ودوم يذكر غزاله
ماشافها مدري يتغزل على ويش=ويفهق حشاه ان لاح برق وخياله
ويسقي ضماه ان جتله ام العكاريش=يبدا يلاعبها ويسولف لحاله
وتطري على راسه بعيد الطواريش=ويسوق فكره مع معابر خياله
من غيرلايختم ولامرتفتيش=مخلين خلفه طويق وجباله
يالين ياصل دار حمرالطرابيش=بعدين وسط الريف يبسط رحاله
والنار تشعم صيدهامالي الخيش=واصرعيني ثم اذوق البياله
واقول زله بس بشو يش بشويش=شاهن ثقيل يثقل اهل الجهاله
واصحي من افكاري وانااقولك ليش=حبل الفكر تطويه طي المحاله
جتك القصيده يالعتيبي على ايش=في بحرهاالمسحوب فتل وجزاله

ياراكب اللي ماضرى بالمطاريش=جيبٍ جديدٍمن حفيز الوكاله
لادق سلفه مايجيله خرافيش=من صنعة اليابان صعبٍ مناله
تمشي به الطبلون كنه على شويش=راسي على خطه شديد البساله
منصاك رجلٍ مايجيب العراميش=لابالله الا جاب كل الجزاله
نايف ولد بندر زبون المباليش=من روس قومٍ وارثين الشكاله
سلم له المرسول وافي بلا طيش=من راس شاعر مايجيب الحثاله
واوضح له المكتوب من غيرتربيش=قله ترا سلطان كله جماله
يفرح بمكتوبك ولاجاه تطنيش=ولايذكر الكلمه ويوم المقاله
والشعر يانايف حصل فيه تشويش=كلٍ يجيب البيت في غير جاله
حتى ولو انه رمع فيه حتيش=وحتيش لوانه بغاه وعنى له
الطير مايكفخ بلاضفة الريش=والذيب ماهرول يريد الهزاله
وان كان ناوي دار شرابة الشيش=ناسٍ على الفطره وجاهم ضلاله
كانو على فتح الاراضي عواطيش=وكانو هل الدعوه ورمز الاصاله
ودك بالارض اللي غشاها تراشيش=في خايعٍ ماشيف حوله بداله
والا الفياض اللي لها صدرك يجيش=اللي لها قلبك يجيه استماله
اركب على اللي مايجيله تناتيش=وانس الخيال اللي يروح خياله
ثم سم باللي خابرٍقصدنا ويش=قدم النهار وقبل مدة ضلاله
ثم قفل الجوال مع فصلة الفيش=من شان ماتبلش بكثراتصاله
واللاش خله مع جميع الدراويش=وانا خويك فالامور الجلاله
ربعي هل الوقفات هم مقدم الجيش=اولاد ثابت داحرين الجهاله
والقاف لوانك بنيته على ايش=لاجيب مندوبه واوصل كماله
وختامها صلو على نقوة قريش=محمدرسول الله وكلي فداله

المشاركة الأصلية كتبت بواسطة مرزوق حمدان العتيبي (المشاركة 547288) .. . بيض الله وجهك ووجهه .. . وصحت الالسن .. ...

المشاركة الأصلية كتبت بواسطة يوسف المقاطى (المشاركة 547293) البارع صح لسانك ولسان المطيري وبيض الله وجيهكم

المشاركة الأصلية كتبت بواسطة هايل الهيلا (المشاركة 547911) والقاف لونك بنيته على ايش = لاجيب مندوبه واوصل كماله بارع يالبارع صح السنتكم ياالثنين ويعطيم الله العافيه وتقبلو اعجابي